មន្ត្រីនគរបាលឋានៈឧត្តមសេនីយ៍ត្រីឬផ្កាយ១ និងជាស្នងការរងខេត្តកណ្តាលចំនួន៦នាក់ត្រូវបានក្រុមអធិការកិច្ចនៃក្រសួងមហាផ្ទៃសាកសួរដើម្បីប្រមូលភស្តុងបន្ថែមជុំវិញបណ្តឹងអនាមិកដែលប្តឹងស្នងការរបស់ខ្លួន គឺ លោកអ៊ាវ ចំរើន ថា បានប្រើអំណាចផ្ដាច់ការ ធ្វើបាបកូនចៅនិងប្រព្រឹត្តអំពើពុករលួយជាដើម។
លិខិតក្រសួងមហាផ្ទៃ កាលពីថ្ងៃទី២៤ខែឧសភាលើកឡើងថា ការចេញលិខិតអញ្ជើញស្នងការរងទាំង៦នាក់មកសាកសួរនៅថ្ងៃនេះតបតាមលិខិតអនាមិក ប្តឹងសុំដកតំណែងស្នងការនគរបាលខេត្តកណ្ដាល លោកអ៊ាវ ចំរើន ដោយចោទថា ស្នងការខេត្តនេះប្រព្រឹត្តអំពើពុករលួយ និងគាបសង្កត់កូនចៅរបស់ខ្លួន ព្រមទាំងភាពអសកម្មមួយចំនួនទៀត។
សារព័ត៌មានសំឡេងប្រជាធិបតេយ្យ VOD បានដកស្រង់សម្តីស្នងការនគរបាលខេត្តកណ្ដាល លោកអ៊ាវ ចំរើនចុះផ្សាយថា ជាការពិតលោកមិនមានពាក់ព័ន្ធនឹងរឿងដែលបានចោទប្រកាន់នោះទេ។
កាលពីថ្ងៃទី១៩ ខែមេសា លិខិតអនាមិកដែលបានប្ដឹងលោក អ៊ាវ ចំរើន ដោយបានផ្ញើទៅរដ្ឋមន្ត្រីក្រសួងមហាផ្ទៃលោកស ខេង បានលើកឡើងពីបញ្ហាចំនួន១៦ចំណុច ដែលថា ប្រព្រឹត្តដោយដោយស្នងការរូបនេះ រួមមាន ការទារលុយដើម្បីតែងតាំងតួនាទី ឋានន្តរសក្ដិពី២ពាន់ដល់៣ពាន់ដុល្លារ ការយកលុយពីកន្លែងហ្គេម ចាក់បាល់ កន្ទុយលេខ និងបង្កើតគ្រួសារនិយមនៅប៉ុស្តិ៍ច្រកទ្វារព្រំដែនជ្រៃធំ ជាដើម។
បណ្ដឹងដែលអមទៅដោយស្នាមមេដៃ និងគ្មានឈ្មោះ ដោយក្រុមមន្ត្រីនគរបាលខេត្តកណ្ដាលបានស្នើ ឲ្យលោក ស ខេងដកហូតតំណែងស្នងការនគរបាលខេត្តកណ្ដាលរូបនេះចេញឱ្យខាងតែបាន។
ស្នងការរងខេត្តកណ្តាល ដែលក្រសួងមហាផ្ទៃហៅមកសាកសួរនោះ រួមមានលោករឿន ណារ៉ា លោកវ៉ែន សុវិន លោកចាន់ សាវឿន លោកតុប សុវណ្ណ លោកសេង គឹមឃន និងលោក ឈឿន សុចិត្ត៕