កម្មកររោងចក្រជាង៦០នាក់នៅខេត្តស្វាយរៀង បានរងរបួសធ្ងន់និងស្រាល នៅក្នុងហេតុការណ៍គ្រោះថ្នាក់ចរាចរណ៍ដែលបង្កឡើងដោយរថយន្តស្ទួចមួយគ្រឿងនៅព្រឹកថ្ងៃទី៣ខែមិថុនានេះ។
ហ្វេសប៊ុករបស់សហភាពចលនាកម្មករឲ្យដឹងថា មានរថយន្តស្ទូច១គ្រឿងបើកឡើងមកលើផ្លូវជាតិ ដោយមិនមានអ្នកធ្វើចរាចរណ៍ស្របពេលនោះ រថយន្តម៉ាកហាយលែនឌ័រនិងរថយន្តសាំយ៉ុងដឹកកម្មករ២គ្រឿងទៀតបើកមកប្រទះនឹងរថយន្តស្ទូចហើយក៏បុកបន្តកន្ទុយគ្នាតែម្ដង។ ហេតុការណ៍នេះកើតឡើងនៅភូមិលាប ឃុំកណ្ដៀងរាយ ស្រុកស្វាយទាប ខេត្តស្វាយរៀង។
អធិការរងនគរបាលស្រុកស្វាយទាបទទួលបន្ទុកផ្នែកសណ្តាប់ធ្នាប់ចរាចរណ៍លោកឡឹក នាងប្រាប់ក្រុមអ្នកសារព័ត៌មានថា គ្រោះថ្នាក់ចរាចរណ៍នេះបានកើតឡើង ខណៈដែលរថយន្តស្ទូចមួយគ្រឿង បានបើកឡើងមកលើផ្លូវជាតិលេខ១ ហើយស្របពេលនោះ រថយន្តហាយឡែនឌ័របានមកដល់ ក៏ចៀសនិងជាន់ហ្វ្រាំង ធ្វើឲ្យរថយន្តស៊ាំយ៉ុងដឹកកម្មករពីរគ្រឿងដែលបើកបរមកពីក្រោយបានបុកបន្តកន្ទុយគ្នាតែម្តង។ ក្រោយហេតុការណ៍នេះ កម្មការិនីរងគ្រោះទាំងនោះ ត្រូវបានបញ្ជូនទៅសម្រាកព្យាបាលនៅមន្ទីរពេទ្យបង្អែកជីភូ និងមន្ទីរពេទ្យទីរួមខេត្តស្វាយរៀង៕