មន្រ្តីជាន់ខ្ពស់គណបក្សសង្គ្រោះជាតិលើកឡើងថា ការផ្សះផ្សាជាតិមិនមែនជាការយកខ្មែរណាជាសត្រូវនោះទេ ហើយដើម្បីប្រយោជន៍ជាតិ កម្ពុជាត្រូវការមិត្តល្អទាំងអស់មិនថា អាមេរិកចិន អឺរ៉ុប ជប៉ុន ឬប្រទេសដទៃទៀតឡើយ។
លោកយ៉ែម បុញ្ញឫទ្ធិបានសរសេរនៅលើហ្វេសប៊ុករបស់លោកថា ដើម្បីឲ្យមានកិច្ចសហប្រតិបត្តិការអន្តរជាតិល្អ រក្សាផលចំណេញពីEBA និងGSP កម្ពុជាត្រូវស្តារ និងពង្រឹងលទ្ធិប្រជាធិបតេយ្យ ការគោរពសិទ្ធិមនុស្ស សិទ្ធិសេរីភាព យុត្តិធម៌សង្គម និងការដោះលែងលោកកឹម សុខា។
ការទាមទារឲ្យមានដំណោះស្រាយជាតិ ស្តារប្រជាធិបតេយ្យ និងដោះលែងលោកកឹម សុខានេះធ្វើឡើងខណៈគណៈប្រតិភូមួយក្រុមនៃតំណាងពាណិជ្ជកម្មរបស់សហភាពអឺរ៉ុបកំពុងបំពេញបេសកកម្មនៅកម្ពុជាពីថ្ងៃទី៣ដល់ថ្ងៃទី៧ ខែមិថុនាដើម្បីស្វែកការណ៍ពិតមុននឹងសម្រេចបន្តផ្តល់ ឬព្យួរប្រព័ន្ធអនុគ្រោះពន្ធ EBA។
លោកយ៉ែម បុញ្ញឫទ្ធិបានរំឭកទៀតថា ក្រៅពីមន្ត្រីសហភាពអឺរ៉ុបក៏មានវត្តមានមន្រ្តីរបស់សហរដ្ឋអាមេរិក និងមន្រ្តីជាន់ខ្ពស់ ដែលជាបេសកជនចិន២ពាន់នាក់ មកទស្សនកិច្ចនៅកម្ពុជាដែរ។
ការលើកឡើងរបស់មន្រ្តីជាន់ខ្ពស់គណបក្សសង្រ្គោះជាតិបែបនេះ គឺស្រដៀងគ្នាទៅនឹងអតីតតំណាងរាស្ត្រគណបក្សសង្គ្រោះជាតិបីរូបដែលបានអំពាវឲ្យគណៈកម្មការពាណិជ្ជកម្មអឺរ៉ុបសម្របសម្រួលឲ្យស្តារលទ្ធិប្រជាធិបតេយ្យនិងរក្សាទុកEBA សម្រាប់កម្ពុជាដដែល។
អតីតតំណាងរាស្ត្រគណបក្សសង្គ្រោះជាតិទាំង៣រូបគឺលោកអ៊ូច័ន្ទរ័ត្ន លោកជីវ កក្តា លោកកងគឹមហាក់បានលើកឡើងក្នុងសេចក្តីថ្លែងការណ៍ចុះនៅថ្ងៃទី៥ ខែមិថុនានេះដោយប្រាប់ទៅអ្នកដឹកនាំនយោបាយគ្រប់និន្នាការគួរតែងាកមកស្វែងរកដំណោះស្រាយនយោបាយ បញ្ហាចំពោះមុខរវាងខ្មែរនិងខ្មែរ ក្រោមម្លប់នៃអង្គព្រះមហាក្សត្រ ស្របតាមរដ្ឋធម្មនុញ្ញដើម្បីបញ្ចប់វិបត្តិនយោបាយ រក្សាប្រព័ន្ធអនុគ្រោះEBA របស់អឺរ៉ុប GSP របស់អាមេរិកនិងស្តារលទ្ធិប្រជាធិបតេយ្យនិងការគោរពសិទ្ធិមនុស្សពេញលេញឡើងវិញ។
ធនាគារពិភពលោកបានព្រមានថា បើកម្ពុជាបាត់បង់ប្រព័ន្ធអនុគ្រោះEBA នោះសេដ្ឋកិច្ចប្រទេសនឹងជួបបញ្ហា។ ទិន្នន័យចុងក្រោយ របស់ក្រុមហ៊ុនអ្នកបញ្ជាទិញបង្ហាញថា ទំហំនាំទំនិញចេញពីកម្ពុជាតាមរយៈការអនុគ្រោះពន្ធ EBA របស់សហភាពអឺរ៉ុបនិងGSPរបស់សហរដ្ឋអាមេរិកកាលពីឆ្នាំ២០១៨កន្លងទៅ មានទឹកប្រាក់៩,៥ពាន់លានដុល្លារ ឬស្មើនឹងជាង៤៣% នៃផលទុនក្នុងស្រុកសរុប (ឬ GDP)។
នេះមានន័យថា ដង្ហើមសេដ្ឋកិច្ចកម្ពុជាពឹងផ្អែកជាង១/៣ ឬ ស្ទើរតែពាក់កណ្តាលលើការអនុគ្រោះពន្ធទាំងនេះ។ បើកម្ពុជាបាត់បង់ការអនុគ្រោះពន្ធ EBAមែននោះកម្ពុជាមិនត្រឹមតែខាតបង់ប្រាក់ប្រហែល៧០០លានដុល្លារ ដែលចំណេញពីការរួចពន្ធនោះទេ ប៉ុន្តែកម្ពុជានឹងបាត់បង់កម្លាំងប្រកួតប្រជែងផ្នែកពាណិជ្ជកម្មយ៉ាងសម្បើម និងបង្កជាវិបត្តិសង្គមធ្ងន់ធ្ងរថែមទៀតផង៕