មេដឹកនាំ និងក្រុមមន្រ្តីរដ្ឋាភិបាលទីក្រុងភ្នំពេញនាំគ្នាប្រតិកម្មនឹងសម្តីនាយករដ្ឋមន្រ្តីសិង្ហបុរីដែលអះអាងថា វៀតណាមចូលឈ្លានពានកម្ពុជា។
លោកហ៊ុន សែនបានសរសេរនៅលើហ្វេសប៊ុករបស់លោកទាំងកណ្តាលយប់ថ្ងៃទី៦មិថុនា ដោយចោទនាយករដ្ឋមន្ត្រីសិង្ហបុរី លោកលី ស៊ានឡុងថា គាំទ្ររបបខ្មែរក្រហម។
មេដឹកនាំដែលរងការរិះគន់ថា ឡើងកាន់អំណាចតាមការលើកបន្តុបរបស់វៀតណាមរូបនេះបន្តទៀតថា លោកសោកស្ដាយជាខ្លាំង ដែលលោកលី ស៊ានឡុងបានចាត់ទុកការណ៍ដែលកងទ័ពវៀតណាម លើកទ័ពចូលលុកលុយប្រទេសកម្ពុជាកាលពីឆ្នាំ១៩៧៩ ថា ជាការឈ្លានពានរបស់វៀតណាមមកលើទឹកដីកម្ពុជា។
មេដឹកនាំរូបនេះចោទប្រកាន់នាយករដ្ឋមន្ត្រីសិង្ហបុរីថា ចង់ឱ្យរបបប្រល័យពូជសាសន៍វិលត្រឡប់មកកម្ពុជាវិញ និងថា នេះជាការប្រមាថដល់ពលិកម្មសាច់ស្រស់ឈាមស្រស់របស់កងទ័ពវៀតណាម។
ក្រៅពីលោកហ៊ុន សែនថ្លែងការពារថា វៀតណាមចូលមកកម្ពុជាកាលពីឆ្នាំ១៩៩៧ជាការជួយរំដោះកម្ពុជាក៏មានមន្រ្តីផ្សេងទៀតដូចជារដ្ឋមន្រ្តីក្រសួងការរទេស និងអ្នកនាំពាក្យរដ្ឋាភិបាលរបស់លោកជាដើមក៏និយាយស្រដៀងគ្នាទៅនឹងលោកហ៊ុន សែនដែរ។
ចំណែកអ្នកនាំពាក្យក្រសួងការពារជាតិលោកឈុំ សុជាតិបានសរសេរលើហ្វេសប៊ុករបស់លោកថ្ងៃទី៧ខែមិថុនាដោយចោទថា លោកលី ស៊ានឡុងកំពុងភាន់ច្រឡំចំពោះប្រវត្តិសាស្រ្ត។
លោកបន្តថារាជរដ្ឋាភិបាលកម្ពុជាយុទ្ធជនកម្ពុជា និងពលរដ្ឋកម្ពុជាចេះទទួលស្គាល់ការណ៍ពិត នៃការធ្វើពលិកម្មរបស់កងទ័ពស្ម័គ្រចិត្តវៀតណាម។ បើគ្មានការចូលរួមពីកងទ័ពវៀតណាមក្នុងការវាយផ្តួលរំលំរបបប៉ុលពតទេ ម្ល៉េះពេលនោះ ប្រជាជនកម្ពុជាត្រូវពួកប៉ុល ពត សម្លាប់យ៉ាងអយុត្តិធម៌ ហើយគ្មានបរទេសណាជួយរកយុត្តិធម៌នោះឡើយ។
អ្នកនាំពាក្យក្រសួងការពារជាតិរូបនេះយល់ថា នាយករដ្ឋមន្រ្តីសិង្ហបុរី គួរតែកែតម្រូវការលើកឡើងដោយភាន់ច្រឡំប្រវត្តិសាស្រ្ត ខ្វះសច្ចភាព ដែលអាចបង្កឱ្យមានការយល់ច្រឡំចំពោះកិច្ចសហប្រតិបត្តិការរវាងកងទ័ពស្ម័គ្រចិត្តវៀតណាមជាមួយកងទ័ពរណសិរ្យសាមគ្គី សង្គ្រោះជាតិក្នុងការផ្តួលរំលំរបបប្រល័យពូជសាសន៍ប៉ុល ពត។
ប្រតិកម្មទាំងនេះធ្វើឡើងក្រោយពេលនាយករដ្ឋមន្រ្តីសិង្ហបុរីលោកលី ស៊ានឡុងលើកឡើងជាសាធារណៈថាអន្តរាគមន៍របស់កងទ័ពវៀតណាមក្នុងការវាយផ្តួលរំលំរបបខ្មែរក្រហមនៅឆ្នាំ១៩៧៩នោះ គឺជាអំពើឈ្លានពាន ដែលប៉ះពាល់យ៉ាងខ្លាំងដល់សន្តិសុខតំបន់។
អ្នកសិក្សាប្រវត្តិសាស្ត្រនិងអ្នកវិភាគឯករាជ្យយល់ថា សម្តីរបស់មេដឹកនាំសិង្ហបុរីរឿងវៀតណាមឈ្លានពានកម្ពុជានេះ គឺជាការលាតត្រដាងប្រវត្តិសាស្ត្រពិតតែប៉ុណ្ណោះ។
ពួកគេយល់ថា វៀតណាមបានចូលឈ្លានពានកម្ពុជាដោយយកលេសថា ជួយរំដោះកម្ពុជា ហើយបញ្ជូនកងទ័ពរបស់ពួកគេ ចូលលុកលុយកម្ពុជាដោយមានការរៀបចំទុកជាមុន។ ប្រវត្តិវិទូជាច្រើននិយាយថា ការឈ្លានពានដំបូងបង្អស់របស់វៀតណាមគឺចាប់ផ្ដើមនៅថ្ងៃ២៥ ខែធ្នូឆ្នាំ១៩៧៨និងក្រោយមកទៀតគឺថ្ងៃទី៧ខែមករាឆ្នាំ១៩៧៩៕