អ្នកនាំពាក្យគណបក្សប្រជាជនកម្ពុជាលោកសុខ ឥសានបាន សរសេរនៅក្នុងប្រព័ន្ធតេឡេក្រាមរបស់លោកថ្ងៃទី១១ខែមិថុនានេះថា អ្នកណាក៏ដឹងដែរថា លោកសម រង្ស៊ីបានប្រកាសស្នាដៃរបស់ខ្លួនក្នុងការជំរុញឲ្យសហគមន៍អឺរ៉ុបព្យួរប្រព័ន្ធអនុគ្រោះពន្ធពីកម្ពុជា។
ប៉ុន្តែឥឡូវស្រាប់តែមកប្រកាសឲ្យជួយការពារទៅវិញដែលលោកហៅថា ល្បិចបោកប្រាស់សាធារណមតិឲ្យយល់ ច្រឡំថា ខ្លួនខិតខំការពារ EBAណាស់ តែតាមការណ៍ពិតគឺលោកសម រង្ស៊ីនិងបក្ខពួកជាអ្នកបំផ្លាញEBAទៅវិញទេ។
ការលើកឡើងរបស់លោកសុខ ឥសានបែបនេះធ្វើឡើងក្រោយពេលនេះគណបក្សសង្រ្គោះជាតិបានចេញសេចក្តីថ្លែងការណ៍មួយចុះថ្ងៃទី៩ ខែមិថុនាអំពាវនាវទៅពលរដ្ឋគ្រប់និន្នាការនិងគ្រប់គណបក្សនយោបាយឱ្យរួមកម្លាំងគ្នារក្សាប្រព័ន្ធអនុគ្រោះពន្ធ EBAរបស់សហភាពអឺរ៉ុបនិងGSPរបស់សហរដ្ឋអាមេរិក។
គណបក្សនេះលើកឡើងទៀតថា ការអំពាវនាវនេះធ្វើឡើង«ដើម្បីបញ្ចៀសនូវការឈឺចាប់និងសេចក្តីទុក្ខលំបាករបស់ពលរដ្ឋខ្មែរ»។
ប៉ុន្តែអ្នកនាំពាក្យគណបក្សប្រជាជនកម្ពុជាលោកសុខ ឥសានបានចោទជាសំណួរថា ប្រទេសវៀតណាម ថៃ និងបណ្តាប្រទេសអាស៊ានមួយចំនួនទៀតអត់មានEBA ម្តេចបានជាគេរស់បាន?
លោកបន្តថា កម្ពុជាក៏ដូច្នេះដែរ យូរឬឆាប់គង់តែបាត់ទៅឯងដោយសារមានការរីកចម្រើនដល់កម្រិតដែលគេត្រូវផ្តាច់។
អ្នកនយោបាយលើកឡើងបញ្ហាEBAនេះ ខណៈសហភាពអឺរ៉ុបកំពុងសិក្សានិងស្វែងរកការណ៍ពិតមុននឹងសម្រេចថា គួរព្យួរ ឬបន្តផ្តល់ EBAឲ្យកម្ពុជាជាបន្តទៀត ខណៈសហភាពអឺរ៉ុបបានក្រើនរំឭករបបក្រុងភ្នំពេញឲ្យស្តារលទ្ធិប្រជាធិបតេយ្យនិងសិទ្ធិមនុស្សឡើងវិញ។
ចំណែកប្រទេសក្រុមអ្នកបញ្ជាទិញបានផ្ញើលិខិតរំឭករដ្ឋាភិបាលក្រុងភ្នំពេញថា ប្រព័ន្ធអនុគ្រោះពន្ធ EBA និងGSP ផ្តល់អត្ថប្រយោជន៍ដល់កម្ពុជាក្នុងការនាំទំនិញទៅលក់នៅសហភាពអឺរ៉ុប និងសហរដ្ឋអាមេរិក៕