សមាគមសម្ព័ន្ធនិស្សិតបញ្ញវន្តខ្មែរបានសម្តែងការគាំទ្រចំពោះអ្វីដែល នាយករដ្ឋមន្ត្រីប្រទេសសិង្ហបុរីលោកលី សៀនឡុងលើកឡើងកាលពីពេលថ្មីៗនេះដោយថា វៀតណាមបានឈ្លានពានកម្ពុជានៅក្នុងឆ្នាំ១៩៧៩។
សេចក្តីថ្លែងការណ៍របស់សមាគមសម្ព័ន្ធនិស្សិតបញ្ញវន្តខ្មែរដែលទើបចេញផ្សាយនៅថ្ងៃច័ន្ទនេះឲ្យដឹងថា មូលហេតុដែលសមាគមនេះគាំទ្រ សម្តីរបស់លោកលី សៀនឡុងគឺដោយសារក្រោយពេលវៀតណាមបញ្ជូនកងទ័ពជាង២០ម៉ឺននាក់មករំដោះកម្ពុជាពីរបបប្រល័យពូជសាសន៍ខ្មែរក្រហម វៀតណាមមិនព្រមដកកងទ័ពត្រឡប់ទៅវិញភ្លាមៗឡើយ ដោយរង់ចាំ១០ឆ្នាំក្រោយទើបដកទ័ពចេញ។ សមាគម នេះបញ្ជាក់ថា វៀតណាមបានរៀបរចនាសម្ព័ន្ធគ្រប់គ្រងកម្ពុជា ដែលរំលោភទៅនឹងច្បាប់អន្តរជាតិយ៉ាងពិតប្រាកដ។
បន្ថែមពីនេះទៀត រដ្ឋាភិបាលកុម្មុយនីស្តវៀតណាមបានបង្ខំឲ្យរដ្ឋាភិបាលខ្មែរពេលនោះ ដែលលើកបន្តុបដោយវៀតណាម ចុះហត្ថលេខាទទួលយកសន្ធិសញ្ញាឆ្នាំ១៩៨១, ឆ្នាំ១៩៨២និងឆ្នាំ១៩៨៥ ដែលបានកាត់ដែនកោះរបស់កម្ពុជាពិសេសកោះត្រល់ទៅឱ្យវៀតណាម និងបង្ខំឱ្យអនុវត្តផែនការក៥ និងការបញ្ជូនអន្តោប្រវេសន៍វៀតណាមរាប់ម៉ឺននាក់មករស់នៅកម្ពុជាដោយខុសច្បាប់ថែមទៀតផង។
សមាគមដដែលនេះអះអាងថា កងទ័ពវៀតណាមព្រមដកចេញពីកម្ពុជាពុំមែនដកដោយឆន្ទៈពិតប្រាកដនោះឡើយ ប៉ុន្តែជាការរងសម្ពាធអន្តរជាតិតែប៉ុណ្ណោះ។
យ៉ាងណាសេចក្តីថ្លែងការណ៍នេះក៏បានទទួលស្គាល់ថា វៀតណាមតាមរយៈលោកប៉ែន សុវណ្ណ លោកហ៊ុន សែន លោកហេង សំ រិនលោកជា ស៊ីមនិងក្រុមអ្នកស្នេហាជាតិផ្សេងទៀត ពិតជាបានជួយរំដោះកម្ពុជាឱ្យចាកផុតពីរបបប្រល័យពូជសាសន៍ផងដែរ។
កាលពីចុងខែឧសភា លោកលី សៀនឡុងនាយករដ្ឋមន្ត្រីសិង្ហបុរីសរសេរនៅលើហ្វេសប៊ុករបស់លោកថា អតីតនាយករដ្ឋមន្ត្រីថៃលោកព្រេមដែលស្លាប់កាលពីថ្ងៃទី២៦ខែឧសភានោះ បានដើរតួនាទីសំខាន់ក្នុងការប្រឆាំងវៀតណាមដែលចូលឈ្លានពានកម្ពុជានៅដើមឆ្នាំ១៩៧៩។ ក្រោយការថ្លែងរបស់លោកនាយករដ្ឋមន្ត្រីសិង្ហបុរីនេះ មានប្រតិកម្មបន្តបន្ទាប់ពីរដ្ឋាភិបាលកម្ពុជា និងវៀតណាម។
កាលពីថ្ងៃទី៥ខែមិថុនា អ្នកនាំពាក្យក្រសួងការបរទេសវៀតណាមអ្នកស្រីLe Thi Thu Hangបានបញ្ជាក់ថា ការថ្លែងរបស់នាយករដ្ឋមន្ត្រីសិង្ហបុរីនេះមិនឆ្លុះបញ្ចាំងពីការណ៍ពិតនោះទេ។ អ្នកស្រីបញ្ជាក់ថា អន្តរាគមន៍របស់កងទ័ពវៀតណាមពេលនោះគឺវៀតណាមជួយដោយស្មោះចង់បញ្ចប់របបប្រល័យពូជសាសន៍នៅកម្ពុជា។ មួយថ្ងៃក្រោយមកលោកហ៊ុន សែនអះអាងថា ការថ្លែងរបស់លោកលី គឺជាគាំទ្ររបបប្រល័យពូជសាសន៍ខ្មែរក្រហម និងជាការប្រមាថអាយុជីវិតប្រជាជនខ្មែរ។
ក្រោយប្រតិកម្មទាំងនោះ ប្រទេសសិង្ហបុរី ក៏បានចេញសេចក្តីថ្លែងការណ៍របស់ខ្លួនមួយបន្ថែមទៀត ដោយថា រដ្ឋាភិបាលសិង្ហបុរី បានជួយឱ្យប្រជាជនកម្ពុជាមានសិទ្ធិសម្រេចលើជោគវាសនាអនាគតរបស់ខ្លួនដោយគ្មានការជ្រៀតជ្រែកពីបរទេសក្នុងអតីតកាលប៉ុណ្ណោះ៕