អតីតអ្នកយកព័ត៌មានរបស់វិទ្យុអាស៊ីសេរីទាំងពីររូបគឺ លោកអ៊ួន ឈិននិងលោកយាង សុធារិនហៅយាង សុជាមេត្តាស្នើឱ្យតុលាការចេញលិខិតជាផ្លូវការ ដោយបញ្ជាក់ថាពួកគេពិតជាមិនបានស្ថិតនៅក្រោមការត្រួតពិនិត្យរបស់តុលាការបន្តទៀតនោះឡើយ។
ការលើកឡើងនេះ ធ្វើឡើងក្រោយពេលបញ្ចប់សវនាការបណ្តឹងជំទាស់របស់ពួកគេទាំងពីររូបនៅសាលាឧទ្ធរណ៍នាព្រឹកនេះពាក់ព័ន្ធនឹងការសុំឱ្យតុលាការបញ្ចប់ការដាក់ឱ្យខ្លួនស្ថិតនៅក្រោមការត្រួតពិនិត្យតាមផ្លូវតុលាការនោះ។
ថ្លែងប្រាប់ក្រុមអ្នកសារព័ត៌មានលោកយាង សុធារិនបានលើកឡើងថា ចៅក្រមសាលាឧទ្ធរណ៍បានបញ្ជាក់ថា ពួកគាត់ទាំងពីរ មិនស្ថិតនៅក្រោមការត្រួតពិនិត្យរបស់តុលាការទៀតនោះទេ ប៉ុន្តែពួកលោកនៅពុំទាន់ស្ងប់ចិត្តឡើយ ដោយសារមិនទាន់មានលិខិតជាលាយលក្ខណ៍អក្សរណាមួយពីតុលាការដើម្បីបញ្ជាក់ឱ្យច្បាស់លាស់អំពីបញ្ហានេះនៅឡើយទេ។
លោកយាង សុធារិនថា ដីកោះដំណោះស្រាយរបស់សាលាដំបូងកាលពីពេលកន្លងមកក៏មិនបានបញ្ជាក់ឱ្យច្បាស់អំពីបញ្ហានេះដែរ ទើបធ្វើឱ្យពួកលោកពិបាកក្នុងការដើរហើរទៅក្រៅប្រទេសនិងរស់នៅក្នុងប្រទេស ដោយត្រូវបង្ហាញខ្លួននៅមុខមន្ត្រីនគរបាលមូលដ្ឋានជារៀងរាល់ខែ។
លោកយាង សុធារិនបញ្ជាក់ថា បញ្ហានេះខាងលោកនិងមេធាវីការពារក្តី គ្រោងនឹងពិភាក្សាគ្នា ដើម្បីជជែកជាមួយមន្ត្រីតុលាការនៅសាលាដំបូងរាជធានីភ្នំពេញ ដើម្បីឱ្យពួកគេបង្ហាញឱ្យច្បាស់អំពីបញ្ហានេះ និងស្នើសុំសម្ភារៈប្រើប្រាស់របស់ខ្លួនត្រឡប់មកវិញ។
ចំណែកមេធាវីការពារក្ដីអតីតបុគ្គលិកវិទ្យុអាស៊ីសេរីទាំងពីររូបនោះ គឺ លោកសំ ចំរើនបានប្រាប់ក្រុមអ្នកសារព័ត៌មានថា កូនក្ដីរបស់លោកមិនត្រូវដាក់ឱ្យស្ថិតនៅក្រោមការត្រួតពិនិត្យតាមផ្លូវតុលាការបន្តទៀតនោះទេ ចាប់តាំងពីចៅក្រមស៊ើបសួរបិទការស៊ើបអង្កេតក្នុងសំណុំរឿងនេះកាលពីខែមីនា។
លោកថា ដូច្នេះពីពេលនេះទៅ កូនក្តីរបស់លោកពុំចាំបាច់ទៅបង្ហាញខ្លួននៅមុខមន្ត្រីនគរបាលមូលដ្ឋានរៀងរាល់ខែទៀតនោះទេ ដោយលោកថា ដីកាដែលចៅក្រមស៊ើបសួរឱ្យចេញកន្លងមកនោះ អស់សុពលភាពហើយ គឺចាប់តាំងពីចៅក្រមសាលាដំបូងរាជធានីភ្នំពេញបិទការស៊ើបអង្កេតក្នុងសំណុំរឿងនេះកាលពីខែមីនាមកម៉្លេះ។
ការបើកសវនាការបញ្ចប់ការដាក់ក្រោមការត្រួតពិនិត្យរបស់តុលាការនៅពេលនេះ ធ្វើឡើងស្របពេលអង្គការHuman Right Watch កាលពីថ្ងៃទី១៩មិថុនា និងក្រុមអ្នកសារព័ត៌មាននៅកម្ពុជាកាលពីថ្ងៃម្សិលមិញ បានចេញសេចក្តីថ្លែងការណ៍ និងលិខិតចំហរបស់ខ្លួន ដោយស្នើឱ្យតុលាការបញ្ចប់ការដាក់អតីតបុគ្គលិកវិទ្យុអាស៊ីសេរីទាំងពីររូបនេះឱ្យស្ថិតនៅក្រោមការតាមដានរបស់ផ្លូវតុលាការបន្តទៀត ព្រមទាំងឱ្យទម្លាក់ចោលរាល់បទចោទប្រកាន់ទៅលើពួកគេផងដែរ។
លោកអ៊ួន ឈិននិងលោកយាង សុធារិនត្រូវបានឃាត់ខ្លួនកាលពីថ្ងៃទី ១៤វិច្ឆិកាឆ្នាំ២០១៧ ដោយតុលាការចោទប្រកាន់ពួកគេតាមមាត្រា៤៤៥នៃក្រមព្រហ្មទណ្ឌពីបទ ប្រគល់ឱ្យរដ្ឋបរទេសនូវព័ត៌មានជាអាទិ៍ដែលបង្កឱ្យមានការអន្តរាយដល់កិច្ចការការពារជាតិ ។
ពួកគាត់ត្រូវបានតុលាការឃុំខ្លួនរយៈពេល៩ខែចាប់តាំងពីខែវិច្ឆិកាឆ្នាំ២០១៧មក និងត្រូវដោះលែងឱ្យនៅក្រៅឃុំបណ្តោះអាសន្នកាលពីខែសីហាឆ្នាំមុន៕