ប្រធានគណបក្សសង្រ្គោះជាតិ ដែលត្រូវបានរដ្ឋាភិបាលលោកហ៊ុន សែនរំលាយចោលចេញពីបញ្ជីនយោបាយហើយដែលកំពុងត្រូវឃុំឃាំងក្នុងផ្ទះគឺលោកបានបញ្ជាក់ជំហរថា គ្មានឡើយពាក្យថា ស្តាយក្រោយសម្រាប់លោកក្នុងការបូជាជីវិតជូនជាតិជូនប្រជាពលរដ្ឋ ដើម្បីលទ្ធិប្រជាធិបតេយ្យ សិទ្ធិសេរីភាព អធិបតេយ្យភាព និងការផ្សះផ្សាជាតិ។
ថ្លែងនៅលើទំព័រហ្វេសប៊ុករបស់លោកកាលពីថ្ងៃម្សិលមិញ លោកកឹម សុខា ប្រធានគណបក្សប្រឆាំងដែលកំពុងជាប់ឃុំក្នុងផ្ទះបានលើកឡើងថា មិនមានអ្វីដែលអាចរារាំងមនោសញ្ចេតនារបស់លោកដែលមានចំពោះប្រជាជាតិមួយនេះឡើយ។ លោកបន្តថា បើទោះបីជា មិនអាចជួបជុំប្រជាពលរដ្ឋដូចកាលពីមុនបាន ទោះបីលោកមិនអាចស្តាប់ឮដោយផ្ទាល់នូវទុក្ខកង្វល់របស់ពលរដ្ឋ ទោះបីមានឧបសគ្គយ៉ាងណាក៏ដោយ បើដរាបណាព្រះអាទិត្យនៅតែរះ នោះលោកនៅតែមានសង្ឃឹមមកជួបជុំ និងបម្រើជាតិខ្មែរតទៅទៀត។
សារនយោបាយរបស់លោកកឹម សុខាបែបនេះធ្វើឡើងក្នុងឱកាសខួបកំណើតគម្រប់៦៦ឆ្នាំឈានចូល៦៧ឆ្នាំរបស់លោកកាលពីថ្ងៃម្សិលមិញ។
លោកថា ទឹកចិត្តនិងសេចក្តីនឹករឮករបស់ជនរួមជាតិគឺបានផ្តល់ដល់រូបលោកនូវកម្លាំងចិត្តដែលជាថាមពលជំរុញឲ្យ មេបក្សប្រឆាំងរូបនេះបន្តនូវស្មារតីសេ្នហាជាតិ បើទោះជារូបកាយលោកត្រូវបានបាត់បង់សេរីភាពអស់ជិត២ឆ្នាំមកហើយក្តី។
ក្នុងឱកាសថ្ងៃខួបកំណើតឆ្នាំនេះ លោកក៏បានបួងសួងសុំសេចក្តីសុខសន្តិភាពសិទ្ធិសេរីភាព វឌ្ឍនភាពនិងយុត្តិធម៌សម្រាប់ប្រជារដ្ឋខ្មែរគ្រប់ស្រទាប់វណ្ណៈ។
លោកកឹម សុខាត្រូវបានរដ្ឋាភិបាលលោកហ៊ុន សែនចាប់ និងឃុំខ្លួននៅគុកត្រពាំងផ្លុងជាប់ព្រំដែនវៀតណាមនាខេត្តត្បូងឃ្មុំ កាលពីថ្ងៃទី ៣វិច្ឆិកាឆ្នាំ២០១៧ ក្រោមការចោទប្រកាន់ពីលោកហ៊ុន សែន ថា ក្បត់ជាតិ។ លោកត្រូវបានផ្ទេរមកឃុំខ្លួននៅក្នុងផ្ទះរបស់លោកនៅភ្នំពេញវិញកាលពីខែកញ្ញាឆ្នាំមុន ក្រោមហេតុផលរបស់រដ្ឋអំណាចពាក់ព័ន្ធបញ្ហាសុខភាព។
រហូតមកទល់ពេលនេះតុលាការនៅមិនទាន់ប្រកាសអំពីទោសកំហុសរបស់លោកនៅឡើយ ប៉ុន្តែតុលាការកំពូលក៏បានសម្រេចរំលាយគណបក្សសង្រ្គោះជាតិ និងដាក់បម្រាមមន្ត្រីជាន់ខ្ពស់បក្សនេះចំនួន១១៨នាក់មិនឱ្យធ្វើនយោបាយរយៈពេល៥ឆ្នាំ ហើយដកហូតតំណែងរបស់មន្ត្រីបក្សប្រឆាំងទាំងអស់ផងដែរ។
តុលាការរបស់លោកហ៊ុន សែន បានប្រកាសម្តងហើយម្តងទៀតថា ការឃុំខ្លួនក្នុងផ្ទះនោះមិនមែនជាការឃុំខ្លួនទេ តែជាការដាក់ក្រោមការត្រួតពិនិត្យរបស់តុលាការប៉ុណ្ណោះ ស្របពេលសហគមន៍អន្តរជាតិ រួមមានអាមេរិក និងអឺរ៉ុបបានចាត់ទុកការឃុំខ្លួនលោកកឹម សុខាជាការធ្វើឡើងដោយបំពានគ្មានភ័ស្តុតាងនិងអយុត្តិធម៌បំផុត៕