រដ្ឋាភិបាលណែនាំឱ្យពលរដ្ឋប្រុងប្រយ័តុ្ននឹងវីរុសប្រភេទថ្មីវាយប្រហារលើផ្លូវដង្ហើមដែលមានប្រភពនៅប្រទេសចិន

ក្រសួងសុខាភិបាលកម្ពុជាបានក្រើនរំឭកដល់ពលរដ្ឋកម្ពុជាទាំងអស់ឱ្យប្រុងប្រយ័ត្នចំពោះជំងឺប្រភទេថ្មី ឬ វីរុសថ្មីមួយ ដែលវាយប្រហារលើផ្លូវដង្ហើមរបស់មនុស្ស ហើយទើបផ្ទុះឡើងនៅខេត្តហ៊ុយបេ ប្រទេសចិន។

យោងតាមលិខិតជូនដំណឹងរបស់ក្រសួងសុខាភិបាល ចេញផ្សាយនៅថ្ងៃនេះ បានឱ្យដឹងថា បើគិតត្រឹមថ្ងៃទី៥ ខែមករា មានមនុស្សជិត៦០នាក់ នៅទីក្រុងវូហាន ខេត្តហ៊ុយបេ ប្រទេសចិន ត្រូវបានរកឃើញមានបញ្ហារលាកសួត។ 

មូលហេតុបណ្តាលឱ្យមានបញ្ហារលាកសួត ដោយសារវីរុសមិនស្គាល់អត្តសញ្ញាណមួយប្រភេទ ដែលរដ្ឋាភិបាលចិនកំពុងដាក់ឱ្យឋិតក្រោមការតាមដាននៅបន្ទប់ដាច់ដោយឡែក។

ជាមួយគ្នានេះ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានអំពាវនាវក្នុងលិខិតដដែល ដល់ពលរដ្ឋពិសេសអ្នកធ្វើដំណើរចេញចូល តំបន់កើតហេតុខាងលើនេះ ត្រូវមានការប្រុងប្រយ័ត្នខ្ពស់បំផុត និងចេះប្រើវិធីបង្ការខ្លួនកុំឱ្យឆ្លងជំងឺរលាកសួតមិនស្គាល់អត្តសញ្ញាណមួយ ដែលអាចកើតមានជាយថាហេតុ។

លើសពីនេះ លោក ម៉ម ប៊ុនហេង ក៏បានណែនាំឱ្យពលរដ្ឋគ្រប់រូបគួរចៀសវាងទៅតំបន់ផ្ទុះជំងឺ ឬ ប៉ះពាល់អ្នកជំងឺផ្លូវដង្ហើមធ្ងន់ធ្ងរ និងត្រូវសម្អាតដៃ និងបរិភោគចំណីអាហារដែលមានអនាម័យ។ ក្រសួងថា បើមានអាការៈផ្លូវដង្ហើម ត្រូវខ្ទប់មាត់ និងច្រមុះពេលក្អក ឬកណ្ដាស់ និងពាក់ម៉ាស់ការពារជាដើម។

យ៉ាងនេះក្តី ក្រសួងសុខាភិបាលបញ្ជាក់ថា កម្ពុជាមិនទាន់រកឃើញករណីជំងឺនេះនៅឡើយ ប៉ុន្តែ ខាងក្រសួងបានដាក់ម៉ាស៊ីនស្គេនកម្ដៅ និងមន្ត្រីជំនាញ ដើម្បីស្រាវជ្រាវករណីសង្ស័យនៅតាមព្រលានយន្តហោះអន្តរជាតិក្នុងប្រទេសរួចហើយដែរ។

អង្គការសុខភាពពិភពលោក បានឱ្យដឹងកាលពីថ្ងៃទី៥ ខែមករា ថា ករណីជំងឺរលាកផ្លូវដង្ហើមដោយសារវីរុសចម្លែកនេះ ត្រូវបានរកឃើញលើកដំបូងនៅថ្ងៃទី៣១ ខែធ្នូ ឆ្នាំ២០១៩ ក្នុងទីក្រុងវូហាន ប្រទេសចិន។ ក្រោយមក នៅថ្ងៃទី៣ ខែមករា ឆ្នាំ២០២០ មានមនុស្ស៤៤នាក់ ត្រូវបានពិនិត្យឃើញផ្ទុកវីរុសនោះ ហើយពួកគេមួយចំនួនជាអាជីវករនៅផ្សារលក់គ្រឿងសមុទ្រឈ្មោះ ហួណានក្នុងទីក្រុងវូហាន នេះ ។ អង្គការអន្តរជាតិដដែលឱ្យដឹងទៀតថា ក្នុងចំណោមពួកគេភាគច្រើនមានអាការៈក្តៅខ្លួន ហើយមួយចំនួនតូចមានបញ្ហាពិបាកដកដង្ហើម ព្រោះតែសួតទាំងសងខាងមានដំបៅ៕