រដ្ឋាភិបាលបញ្ជាឱ្យមានការត្រួតពិនិត្យសំណង់អគារទូទាំងប្រទេស

រដ្ឋាភិបាលតាមរយៈក្រសួងរៀបចំដែនដី នគរូបនីយកម្ម និងសំណង់ បានបញ្ជាឱ្យស្ថាប័នពាក់ព័ន្ធ និងអាជ្ញាធរថ្នាក់ក្រោមជាតិសហការគ្នាដើម្បីត្រួតពិនិត្យរាល់សំណង់អគារទាំងអស់ឡើងវិញ។

ការបញ្ជានេះ ធ្វើឡើងក្រោយពេលមានហេតុការណ៍បាក់រលំសំណង់អគារធំៗ រយៈពេល៧ខែចុងក្រោយនេះ បណ្តាលឱ្យមានមនុស្សជាង៦០នាក់ ស្លាប់ និងរងរបួសរាប់សិបនាក់ផ្សេងទៀត។ ហេតុការណ៍បាក់រលំសំណង់អគារទាំងនោះ រួមមានការបាក់រលំអគារកម្ពស់៧ជាន់ នៅខេត្តព្រះសីហនុកាលពីថ្ងៃទី២២មិថុនា ឆ្នាំមុន ដែលមានថៅកែជាជនជាតិចិនបណ្តាលឱ្យកម្មករខ្មែរ២៨នាក់ស្លាប់ និង២៦នាក់ទៀតរងរបួស។ ការបាក់រលំសំណង់អគារសាលាឆាន់វត្តគោកចក ក្រុងសៀមរាប កាលខែធ្នូ ឆ្នាំ២០១៩ បណ្តាលឱ្យមនុស្សស្លាប់៣នាក់ និងរបួសជាង១០នាក់។ ចុងក្រោយករណីបាក់រលំអគារកម្ពស់៧ជាន់នៅខេត្តកែបកាលពីថ្ងៃទី ៣មករា ឆ្នាំនេះ បណ្តាលឱ្យមនុស្សស្លាប់៣៦នាក់ និងរបួស២៣នាក់។ 

ក្រសួងរៀបចំដែនដី នគរោបនីយកម្ម និងសំណង់នៅថ្ងៃនេះ បានចេញសេចក្តីណែនាំទៅមន្ត្រីក្រសួង និងអាជ្ញាធរពាក់ព័ន្ធទាំងអស់ត្រូវពង្រឹងការអនុវត្តច្បាប់ ស្តីពីសំណង់ និងលិខិតបទដ្ឋានគតិយុត្ត ពាក់ព័ន្ធជាធរមាន។  

យ៉ាងណាក៏ដោយចុះ សង្គមស៊ីវិលដែលធ្វើការងារលើវិស័យនេះ យល់ថាករណីបែបនេះ នឹងកើតមានបន្តទៀត ប្រសិនបើរដ្ឋាភិបាលមិនអាចលុបបំបាត់អំពើពុករលួយ និងបក្ខពួកនិយមបាន។ បន្ថែមពីនេះ វប្បធម៌ការពារគ្នា ឬ វប្បធម៌គ្មានការទទួលខុសត្រូវ ដែលជាហេតុធ្វើឱ្យប្រព័ន្ធច្បាប់នៅកម្ពុជាកាន់តែទន់ខ្សោយ។

កាលពីថ្ងៃទី ៥ មករា លោកនាយករដ្ឋមន្ត្រី ហ៊ុន សែន បានថ្លែងការពារចៅហ្វាយខេត្តកែប និងមន្ត្រីពាក់ព័ន្ធផ្សេងទៀត ថាករណីបាក់រលំសំណង់អគារកម្ពស់៧ជាន់នៅខេត្តកែប នឹងគ្មាននរណាត្រូវដកចេញពីតំណែងឡើយ។ លើសពីនេះ លោក ព្រមានចាត់វិធានការលើមន្ត្រីណា ឬ បុគ្គលណាដែលជំរុញឱ្យលោកដកតំណែងចៅហ្វាយខេត្តនេះ ឬ មន្ត្រីពាក់ព័ន្ធផ្សេងទៀត ដោយលោកចាត់ទុកថាជាការរុញឱ្យខ្លោច រោចឱ្យឆៅទៅវិញ។

ក្នុងសម័យតេជោ គេនៅមិនទាន់ឃើញមានមន្ត្រីណាម្នាក់ ត្រូវបានលាលែងឬដកចេញពីតំណែង នៅពេលមានហេតុការណ៍អាក្រក់កើតឡើងលើប្រជាជន ឬ ជាតិនោះឡើយ ក្រៅពីអតីតអភិបាលខេត្តព្រះសីហនុលោក យន្ត មីន ប៉ុន្តែអតីតចៅហ្វាយខេត្តរូបនេះ ត្រូវបានដកចេញពីតំណែងចៅហ្វាយខេត្តព្រះសីហនុក្រោយហេតុការណ៍បាក់រលំអគារបណ្តាលឱ្យមនុស្សស្លាប់និងរបួសជាង៥០នាក់កាលពីឆ្នាំមុននោះ គឺ គ្រាន់តែដកឱ្យតែល្អមើលប៉ុណ្ណោះ ពោល លោកយន្ត មីន ត្រូវបានតំណែងនៅក្រសួងការពារជាតិកាន់តែធំជាងមុន ដែលធ្វើឱ្យការងារស៊ើបអង្កេតពាក់ព័ន្ធ នឹងលោក យន្ត មីន ត្រូវជួបឧបសគ្គ៕  

© 2020, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.