មន្ត្រីជំនាញសអង្គការសហប្រជាជាតិទទួចឲ្យផ្ដល់យុត្តិធម៌ដល់លោក កឹម សុខា

អ្នករាយការណ៍ពិសេស​ទទួលបន្ទុកសិទ្ធិមនុស្ស​កម្ពុជា​របស់អង្គការសហប្រជាជាតិ​អ្នកស្រី រ៉ូណា ស្មីត និងអ្នកជំនាញពីររូបទៀត បានអំពាវនាវ​ដល់អាជ្ញាធរ​លោក ហ៊ុន សែន ធានានូវយុត្តិធម៌សម្រាប់លោក កឹម សុខា។

ការអំពាវនាវ​ពីសំណាក់​មន្ត្រីជំនាញ​សិទ្ធិមនុស្ស​អង្គការសហប្រជាជាតិ​នេះ ស្របពេល​ សំណុំរឿង​សន្ទិដ្ឋភាព​ជាមួយបរទេស ឬ រឿងក្បត់ជាតិ​របស់លោក កឹម​ សុខា បានចាប់ផ្តើម​ជំនុំជម្រះនៅសាលាដំបូងរាជធានីភ្នំពេញក្នុងសប្តាហ៍នេះ។

ក្នុងសេចក្តីថ្លែងការណ៍របស់ខ្លួននៅថ្ងៃនេះ​ អ្នកស្រី រ៉ូណា ស្មីត និងអ្នកជំនាញឯករាជ្យនៃអង្គការសហប្រជាជាតិពីររូបទៀត បានចេញមុខអំពាវនាវជាម្តងទៀតឱ្យដកចេញជាបន្ទាន់នូវលក្ខខណ្ឌធានានៅក្រៅឃុំដែលមានការរិតត្បិតលើប្រធានគណបក្សសង្រ្គោះជាតិ​លោក កឹម សុខា។ លើសពីនេះ រដ្ឋាភិបាល​លោកហ៊ុន សែនត្រូវផ្តល់សិទ្ធិនយោបាយរបស់លោក កឹម សុខា ឡើងវិញ និង ធានាថាសិទ្ធិរបស់លោកក្នុងការទទួលបានសំណង និងជួសជុលការខូចខាតផ្សេងទៀត​ដល់មេបក្សប្រឆាំង​រូបនេះ ចំពោះការរិតត្បិតសេរីភាព និងសិទ្ធិនយោបាយ​កន្លងមក។

តុលាការក្រុងភ្នំពេញ របស់លោក ហ៊ុន សែន បាន​ចាប់ផ្តើម​បើកសវនាការ​លើសំណុំរឿងលោក កឹម សុខា ​ដោយអះអាងថាជា​សវនាការសាធារណៈ ប៉ុន្តែ​សង្គមស៊ីវិល​ថារងការរិតត្បិត​សិទ្ធិ​ចូលរួម​ពីភាគីអ្នកឃ្លាំមើល ដូចជាពលរដ្ឋ សង្គមស៊ីវិល​ អ្នកសារព័ត៌មាន​ជាតិ និងអន្តរជាតិ​​។ កាលពីថ្ងៃម្យិលមិញ អង្គការសង្គមស៊ីវិល សហគមន៍ និងអ្នកសារព័ត៌មានជិត១រយ ក៏បានសម្តែងការខកចិត្តចំពោះការរិតត្បិត​សេរីភាពក្នុងការចូលរួម​សវនាការ​ដ៏ចម្រូងចម្រាសនេះផងដែរ។

សវនាការ​ប្រធានគណបក្សសង្រ្គោះជាតិ​រូបនេះ ត្រូវបានមន្ត្រីជាន់ខ្ពស់​សាលាដំបូងរាជធានីភ្នំពេញ​អះអាងថា​គ្រោងនឹងធ្វើឡើងរយៈពេល៣ខែ ដោយធ្វើឡើងក្នុង១សប្តាហ៍ពីរថ្ងៃ ព្រោះថាជាសំណុំរឿងធំ ហើយការកម្រិត​មនុស្សចូលរួម​សវនាការនេះ ដោយសារបន្ទប់សវនាការមានកម្រិត។

​កាលពីថ្ងៃម្សិលមិញ ភ្នាក់ងារសារព័ត៌មានរ៉យទ័រ បានចុះផ្សាយថា សហរដ្ឋអាមេរិកក៏បានជំរុញឱ្យតុលាការកម្ពុជា​អនុញ្ញាតឱ្យអ្នកសារព័ត៌មានចូលរួមក្នុងការជំនុំជម្រះទោសក្បត់ជាតិរបស់មេដឹកនាំគណបក្សប្រឆាំងលោក កឹម សុខា ដែលរងការចោទប្រកាន់ថាបានរៀបចំផែនការផ្តួលរំលំមេដឹកនាំហ៊ុនសែនដែលមានរយៈពេលយូរណាស់មកហើយ។

ក្នុងពេលសវនាការពីរថ្ងៃមកនេះ មេធាវី​រដ្ឋាភិបាល​បានអះអាងថា មានអង្គការ បុគ្គល និង ប្រទេសចំនួន៩ ដែលពាក់ព័ន្ធសំណុំរឿងលោក កឹម សុខា។ ក្នុងចំណោមប្រទេស៩នោះ រួមបញ្ចូលទាំងសហភាពអឺរ៉ុបដែលមានរដ្ឋជាសមាជិកចំនួន២៨ប្រទេសទៀតផង។

ទោះបីជា​មេធាវីការពារក្តី​ឱ្យរដ្ឋាភិបាល​រកឃើញថា​សំណុំរឿង​លោក កឹម សុខា មានពាក់ព័ន្ធ នឹងប្រទេសចំនួន៩ ក៏ដោយ ប៉ុន្តែសម្រាប់មន្ត្រី​អ្នកនាំពាក្យ​ក្រសួង​ការបរទេស​ លោក កុយ គួង អះអាងប្រាប់សារព័ត៌មានវីអូឌី​កាលពីថ្ងៃម្សិលមិញ​ថា​ ​​កម្ពុជា​មិនទាន់​មាន​ចំណាត់ការ​លើ​ប្រទេសទាំងនោះនៅឡើយទេ។ ​​

ក្រៅពីបដិសេធ នៅ​មុខអង្គសវនាការចំពោះរាល់ការចោទប្រកាន់ទាំងឡាយ លោក កឹម សុខា ក៏​បានចោទសួរទៅខាងតុលាការវិញថា ​សំណុំរឿងរបស់លោក​គឺតុលាការបានរកភស្តុតាងដាក់បន្ទុក​ចន្លោះឆ្នាំពី១៩៩៣ ដល់ឆ្នាំ២០០៧ ខណៈច្បាប់​ដែលយកមកប្រើប្រាស់​ដាក់ទោសទណ្ឌលើរូបលោក ទើបតែដាក់ឱ្យប្រើប្រាស់នៅឆ្នាំ២០១០ ប៉ុណ្ណោះ។

លោក កឹម សុខា ​ ​បញ្ជាក់​កាលពីថ្ងៃទី ១៥ មករា ថា លោកមិនបាននាំរដ្ឋបរទេស ឬភ្នាក់ងារបរទេសណាមកប្រទូសរ៉ាយ ឬឈ្លានពាន ព្រះរាជាណាចក្រកម្ពុជាឡើយ។

លើសពីនេះទៀត មិនបានប្រព្រឹត្តដូចការចោទនេះទេ ជាពិសេសលោកមិនបានប្រព្រឹត្តនូវអំពើទាំង ឡាយណាដែលនាំឲ្យប៉ះពាល់ដល់ផលប្រយោជន៍ប្រទេសជាតិឡើយ។

ប្រធានគណបក្សសង្រ្គោះជាតិ បន្ថែមថា សកម្មភាពទាំងអស់របស់លោក គឺផ្តោតលើសិទ្ធិមនុស្ស និងលទ្ធិប្រជាធិបតេយ្យ ដោយអហិង្សា និងសន្តិវិធី ស្របតាមរដ្ឋធម្មនុញ្ញ នៃព្រះរាជាណាចក្រកម្ពុជា ហើយ គ្រប់សកម្មភាពនយោបាយរបស់ខ្លួន គឺផ្តោតលើការបោះឆ្នោតដោយសេរី ត្រឹមត្រូវ យុត្តិធម៌ ដែលឆ្លុះបញ្ចាំងពីឆន្ទៈរបស់ប្រជាពលរដ្ឋខ្មែរ។

លោក កឹម សុខា នៅតែទាមទារឲ្យតុលាការទម្លាក់ចោលជាស្ថាពរចំពោះបទចោទមកលើរូបលោក ដើម្បីឱ្យលោកអាចអនុវត្តបាននូវសិទ្ធិ សេរីភាពនយោបាយពេញលេញ ក្នុងការចូលរួមបម្រើជាតិមាតុភូមិ និងការពារផលប្រយោជន៍របស់ប្រជាពលរដ្ឋខ្មែរ៕

© 2020, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.