សមត្ថកិច្ចរបស់លោក ហ៊ុន សែន ឲ្យដឹងថា យ៉ាងហោចណាស់មានមនុស្សចំនួន ៥៩ នាក់ ត្រូវបានចាប់ និងបញ្ជូនខ្លួនទៅតុលាការ ពាក់ព័ន្ធបទល្មើសព្រៃឈើកាលពីឆ្នាំ២០១៩។
សេចក្ដីប្រកាសព័ត៌មានរបស់គណៈកម្មការជាតិដើម្បីទប់ស្កាត់ និង បង្ក្រាបបទល្មើសធនធានធម្មជាតិដែលចេញផ្សាយកាលពីថ្ងៃទី២ ខែកុម្ភៈ ឲ្យដឹងថា កម្លាំងបង្ក្រាបកាលពីឆ្នាំ ២០១៩ ចាប់ និងរឹបអូសបានឈើចម្រុះជិត១ម៉ឺនម៉ែត្រគុប (៩.២១៥) និងរឹបអូសសម្ភារនានាដែលជាមធ្យោបាយបម្រើឲ្យការធ្វើអាជីវកម្មសរុបជិត៥រយគ្រឿង(៤៩១) ព្រមទាំងបំផ្លាញ រថយន្តបាកុង និងមធ្យោបាយកែច្នៃចំនួនជាង២រយគ្រឿង(២១២)។
គណៈកម្មការនេះ បានអះអាងថា ឈើចាប់បានទាំងអស់ត្រូវរក្សាទុកមិនឱ្យបាត់បង់ ដើម្បីដាក់ដេញថ្លៃប្រមូលថវិកាចូលរដ្ឋ។
សេចក្ដីប្រកាសព័ត៌មាននេះបានឲ្យដឹងទៀតថា នាពេលបច្ចុប្បន្ន តាមរយៈការស្រាវជ្រាវ និងស៊ើបអង្កេតរបស់ជំនាញបានបញ្ជាក់ថា ការកាប់ឈើ និងការដឹកជញ្ជូនឈើខុសច្បាប់ជាលក្ខណៈទ្រង់ទ្រាយធំមានសភាពស្ងប់ស្ងាត់។
ប៉ុន្តែគណៈកម្មការនេះទទួលស្គាល់ថា នៅមានការលួចបន្លំដឹកជញ្ជូនផលអនុផលព្រៃឈើដោយខុសច្បាប់តាមរូបភាពជារថយន្តសាំយ៉ុង រថយន្តកែច្នៃធុនតូច គោយន្ត ម៉ូតូ រទេះគោ រទេះក្របី រ៉ឺម៉កជាដើម។
ក្នុងចំណោមមនុស្ស៥៩ នាក់ដែលត្រូវបានសមត្ថកិច្ចចាប់និងបញ្ជូនខ្លួនទៅតុលាការ ក៏មានវត្តមានឧកញ៉ារកស៊ីឈើ២រូប រួមមានឧកញ៉ា ស៊ឹង សំអុល និង ឧកញ៉ា គង់ ក្រឹង។
កាលពីខែកញ្ញា ឆ្នាំ២០១៩
សាលាដំបូងខេត្តមណ្ឌលគិរីបានចេញដីកាមួយឱ្យសមត្ថកិច្ចចាប់ខ្លួនឧកញ៉ា វន់ ប៊ុនថៃ
ឧកញ៉ា នៅស្រុកអូររាំងឪ ខេត្តត្បូងឃ្មុំ ដែលមានផ្ទះក្បែរសាលាស្រុកត្បូងឃ្មុំតែម្តង។
ក្រៅពីនេះ ឧកញ៉ា ស្រ៊ុន ម៉េងលាង ជាម្ចាស់ក្រុមហ៊ុន ម៉េងលាង និងឧកញ៉ា តុប វីរដា
ជាម្ចាស់ក្រុមហ៊ុនវិជ្ជរី ពាក់ព័ន្ធសំណុំរឿងបទល្មើសកាប់បំផ្លាញព្រៃឈើ
និងជួញដូរឈើដោយខុសច្បាប់។ ដីកាបញ្ជាឱ្យចាប់ខ្លួនឧកញ៉ាទាំង៣រូបនេះ
ធ្វើឡើងក្រោយពីឧកញ៉ាទាំង នោះរត់គេចខ្លួនមិនចូលបំភ្លឺ ពាក់ព័ន្ធនឹងបទល្មើសព្រៃឈើ ។
សកម្មជនការពារព្រៃឈើ លោក ហេង ស្រស់ ធ្លាប់សម្តែងក្តីបារម្ភចំពោះវាសនាព្រៃឈើនៅឆ្នាំ២០២០នេះ។ ការព្រួយបារម្ភនេះ ដោយលោកថា ឆ្នាំនេះនឹងក្លាយជាឆ្នាំដែលមានការបំផ្លាញព្រៃឈើបន្តទៀត ដោយឧក្រិដ្ឋជនដែលរងការខាតបង់ក្នុងជំនួញឈើរបស់ខ្លួនកាលពីឆ្នាំមុនដោយសារសមត្ថកិច្ចចាប់ នឹងមកស្តារដើមឡើងវិញនៅឆ្នាំនេះ។
លោក ហេង ស្រស់ យល់ថាដើម្បីទប់ស្កាត់និងបង្ក្រាបបទល្មើសព្រៃឈើឱ្យមានប្រសិទ្ធភាព គឺរដ្ឋាភិបាលតាមរយៈគណៈកម្មការជាតិមួយនេះ ត្រូវចាប់ខ្លួនឧកញ៉ារកស៊ីឈើធំៗ និងដុះស្លែជាច្រើនទៀត យកមកផ្តន្ទាទោសតាមច្បាប់។ បន្ថែមពីនេះ រដ្ឋាភិបាលត្រូវបញ្ឈប់គម្រោងផ្តល់ដីសម្បទានសេដ្ឋកិច្ចឱ្យទៅក្រុមហ៊ុនឯកជន ហើយបញ្ឈប់ការផ្តល់លិខិតអនុញ្ញាតធ្វើអាជីវកម្មឈើ និងដឹកជញ្ជូនឈើទូទាំងប្រទេសជាដើម៕