អង្គការអន្តរជាតិ Global Witness បានទាមទារឱ្យរដ្ឋាភិបាល និងតុលាការកម្ពុជា បញ្ចប់ការយាយីដល់សកម្មជនការពារបរិស្ថាន លោក អ៊ូច ឡេង និងបណ្តាញស្នូលការពារព្រៃឡង់៣ រូបទៀត ព្រោះពួកគេមិនមែនជាជនល្មើស តែជាក្រុមអ្នកការពារផលប្រយោជន៍រួមរបស់ជាតិ និងពិភពលោកប៉ុណ្ណោះ។
សេចក្តីថ្លែងការណ៍របស់អង្គការឃ្លាំមើលពិភពលោក Global Witness ដែលចេញផ្សាយជាសាធារណៈកាលពីថ្ងៃច័ន្ទ បានសាទរចំពោះការដោះលែងសកម្មជនការពារបរិស្ថានទាំង៤រូប ឱ្យផុតពីការឃុំឃាំងរបស់ប៉ូលិស ប៉ុន្តែអង្គការអន្តរជាតិមួយនេះ បានអំពាវនាវឱ្យអាជ្ញាធរកម្ពុជាបញ្ឈប់រាល់ការស៊ើបអង្កេតលើសកម្មភាពរបស់ពួកគេបន្តទៀត។
កាលម្សិលមិញ ម្ចាស់ពានរង្វាន់វីរជនបរិស្ថានអន្តរជាតិឬហៅថា Goldman Environmental Prize និងសកម្មជនការពារព្រៃឡង់៣រូបទៀត រួមមានលោក លោក ខេម សុឃី លោក ស្រី ថី និងលោក មេន ម៉ាត់ ត្រូវបានដោះលែងឱ្យមានសេរីភាពវិញ បន្ទាប់ពីសន្តិសុខក្រុមហ៊ុន ស៊ីងបាយអូតិក (Think Biotech) នៅខេត្តក្រចេះ ចាប់ខ្លួនពួកគេកាលពីថ្ងៃទី១៣ ខែមីនា ហើយបញ្ជូនមកឱ្យសមត្ថកិច្ច និងបានបញ្ជូនមកសាកសួរនៅអយ្យការអមសាលាដំបូងខេត្តក្រចេះ។
ត្បិតតែពួកគេទាំង៤នាក់ ត្រូវបានដោះលែងឱ្យមានសេរីភាពវិញ ប៉ុន្តែពួកគេត្រូវស្ថិតនៅក្រោមការតាមដានឬ ក្រោមលក្ខខណ្ឌរបស់តុលាការនៅឡើយ។
ប្រធានយុទ្ធនាការអ្នកការពារដីធ្លី និងបរិស្ថាននៃអង្គការ Global Witness លោក Man-Kwun Chan បានហៅការដោះលែងសកម្មជនការពារបរិស្ថានទាំង៤រូបថាបានធ្វើស្ថានការណ៍ធូរស្រាលមួយកម្រិត ប៉ុន្តែលោកថាការដាក់ពួកគេក្រោមការស៊ើបអង្កេត ក្នុងឋានៈជាជនសង្ស័យនជ គឺជាការគំរាមកំហែងប្រឆាំងនឹងពួកគេព្រមទាំងជាសារគំរាមកំហែងទៅលើអ្នកការពារបរិស្ថានដទៃទៀត។
លោកថា ជារួមគឺអាជ្ញាធរកម្ពុជាបន្តការធ្វើទុក្ខបុកម្នេញសកម្មជនព្រៃឈើដែលធ្វើការងារដើម្បីការពារបេតិកភណ្ឌធម្មជាតិ ដ៏មានតម្លៃបំផុតរបស់ប្រទេសរបស់ពួកគេ ដោយរដ្ឋាភិបាលមិនបានការពារនិងគាំទ្រការងារដ៏សំខាន់របស់ពួកគេនោះទេ។ លោកថា រាល់នីតិវិធីតុលាការប្រឆាំង លោក អ៊ូច ឡេង និងសហសេវិករបស់គាត់ផ្សេងទៀត ត្រូវតែបញ្ចប់ដោយគ្មានល័ក្ខខ័ណ្ឌនិងដោយគ្មានការពន្យាពេលទៀតនោះឡើយ។
ប្រភពដដែលឲ្យដឹងទៀតថា ក្រុមសង្គមស៊ីវិលកម្ពុជារាយការណ៍ថា លោក មេន ម៉ាត់ ត្រូវបានវាយធ្វើបាបលើរាងកាយ ដោយកម្មករក្រុមហ៊ុន ស៊ីងបាយអូតិច (Think Biotech) ។ ករណីនេះធ្វើឱ្យគេនឹកឃើញដល់ ដល់ការឃុបឃិតគ្នារវាងសន្តិសុខក្រុមហ៊ុនឯកជន និងកងកម្លាំងរបស់រដ្ឋក្នុងអំពើឃាតកម្មដ៏សាហាវមួយ ទៅលើអ្នកការពារបរិស្ថាន គឺអតីតប្រធានអង្គការការពារធនធានធម្មជាតិ លោកឈុត វុទ្ធី កាលពីឆ្នាំ ២០១២ ។
អង្គការ Global Witness ឱ្យដឹងថា កាលពីខែតុលាឆ្នាំមុន ការិយាល័យសហភាពអឺរ៉ុប និងទីភ្នាក់ងារ USAID នៅកម្ពុជា បានបញ្ជូនរបាយការណ៍នៃការកាប់ឈើខុសច្បាប់ពីសំណាក់ក្រុមហ៊ុនដីសម្បទានសេដ្ឋកិច្ច Think Biotech ដែលជាសម្ព័ន្ធមិត្តជាមួយក្រុមហ៊ុនកែច្នៃឈើមួយឈ្មោះ Angkor Plywood ទៅក្រសួងបរិស្ថានដើម្បីធ្វើការស៊ើបអង្កេត។
Global Witness ថា អ្នកជំនួញជនជាតិតៃវ៉ាន់ឈ្មោះលូ ជូចាង (Lu Chu Chang) ដែលជានាយកក្រុមហ៊ុនទាំងពីរមានទំនាក់ទំនងយូរមកហើយជាមួយនឹងការកាប់ឈើខុសច្បាប់ ព្រមទាំងការរំលោភសិទ្ធិពលរដ្ឋកម្ពុជា។ កាលពីឆ្នាំ ២០០១ ការស៊ើបអង្កេតរបស់ Global Witness បានបង្ហាញថាក្រុមហ៊ុនដែលលោកបើកដំណើរការនោះមានឈ្មោះ Cherndar Plywood បានកាប់ដើមច្បោះជ័ររបស់អ្នកភូមិដោយខុសច្បាប់នៅខេត្តព្រះវិហារ ស្ថិតនៅក្បែរក្រុមហ៊ុនរបស់ខ្លួន។
អង្គការអន្តរជាតិមួយនេះ បានបកអាក្រាតម្តងហើយម្តទៀត ជុំវិញអំពើពុករលួយរបស់មន្ត្រីរដ្ឋបាលព្រៃឈើ ពាក់ព័ន្ធការកាប់បំផ្លាញឈើខុសច្បាប់ពេលនោះ ក្រោយមកក៏មានការចាត់វិធានការចំពោះក្រុមហ៊ុនខុសច្បាប់ខ្លះដែរ។
ទោះបីជាយ៉ាងនេះក្តី លោក Man-Kwun Chan បានមានប្រសាសន៍ថា“ ការឃុំខ្លួននិងការស៊ើបអង្កេតលើលោកអ៊ូច ឡេង និងសហការីរបស់គាត់បានចោទជាសំណួរ តើថាហេតុអ្វីបានជារដ្ឋាភិបាលកម្ពុជាកំពុងការពារផលប្រយោជន៍របស់ក្រុមហ៊ុនដែលប្រឈមនឹងការចោទប្រកាន់ជុំវិញការកាប់ឈើខុសច្បាប់ និងជាក្រុមហ៊ុនមានទំនាក់ទំនងជាមួយការកាប់បំផ្លាញព្រៃឈើយ៉ាងយូរនៅក្នុងប្រទេសកម្ពុជានោះ?
មន្ត្រីអង្គការអន្តរជាតិមួយនេះយល់ថា អាជ្ញាធរគួរតែផ្តោតលើការស៊ើបអង្កេតចំពោះការកាប់ឈើខុសច្បាប់ដោយក្រុមហ៊ុនដីសម្បទានសេដ្ឋកិច្ច Think Biotech និងស្រាវជ្រាវជុំវិញការរារាំងសកម្មជនបរិស្ថានក្នុងគោលបំណងការពារព្រៃឈើរបស់ប្រទេស ពីសំណាក់កម្លាំងសន្តិសុខក្រុមហ៊ុនឯកជនមួយនេះប្រសើរជាជាង៕