ស្ថានទូតកម្ពុជាប្រចាំប្រទេសថៃ បានអះអាងថាប្រទេសថៃបានសម្រេចពន្យារពេលដាក់ប្រទេសខ្លួនក្នុងគ្រាអាសន្នរយៈពេល១ខែទៀត ។
សេចក្តីជូនដំណឹងរបស់ស្ថានទូតកម្ពុជាប្រចាំក្រុងបាងកកបានឱ្យដឹងកាលពីថ្ងៃទី២៦ ខែឧសភា ថា ចាប់ពីថ្ងៃទី១ ខែមិថុនា រហូតដល់ថ្ងៃទី៣០ ខែមិថុនា រដ្ឋាភិបាលបានកំណត់ពន្យារពេលដាក់ប្រទេសក្នុង គ្រាអាសន្នដំណាក់កាលទី៣ ដើម្បីទប់ស្កាត់និងការពារការរីករាលដាលជំងឺកូវីដ១៩ ក្នុងប្រទេសរបស់ខ្លួន។
ស្ថានទូតកម្ពុជា បានជំរុញឱ្យពលរដ្ឋដែលរស់នៅ និងកំពុងបំពេញការងារនៅប្រទេសទាំងអស់ ឱ្យចូលរួមសហការជាមួយអាជ្ញាធរថៃឱ្យកាន់តែសកម្មបន្ថែមទៀត ក្នុងការអនុវត្តវិធានការនានារបស់រដ្ឋាភិបាលថៃឱ្យបានខ្ជាប់ខ្ជួនដើម្បិទប់ស្កាត់ការរីករាលដាលជំងឺកូវីដ១៩។
ក្នុងករណីមានបញ្ហានៅក្នុងប្រទេសថៃ ស្ថានទូតកម្ពុជាបានណែនាំឱ្យពលរដ្ឋខ្មែរទាក់ទងទៅកាន់ស្ថានទូតផ្ទាល់ តាមរយៈទំព័រហ្វេសប៊ុកស្ថានទូត និងតាមរយៈលេខទូរស័ព្ទ ០៩២ ៨០ ៥០ ៥៦១ ដែលលេខទទួលបន្ទុកផ្នែកកុងស៊ុល និងតាមរយៈលេខទូរស័ព្ទទទួលបន្ទុកពលករផ្ទាល់ គឺ លេខ ០៩៤ ០៩២ ៥៩ ០៥។
ចាប់តាំងពីមុនបុណ្យចូលឆ្នាំថ្មីមកប្រទេសថៃ បានប្រកាសដាក់ប្រទេសខ្លួនក្នុងគ្រាអាសន្ន ដើម្បីទប់ស្កាត់ជំងឺកូវីដ១៩ ចំនួន៣លើករួចមកហើយ ដោយមួយលើកៗមានរយៈពេល១ខែ។
នៅពេលដាក់ប្រទេសក្នុងគ្រាអាសន្ននេះ រដ្ឋាភិបាលថៃ បានចេញបម្រាមមួយចំនួនដូចជាហាមពលរដ្ឋក្នុងប្រទេសនេះធ្វើដំណើរ ពីម៉ោង១០យប់ រហូតដល់ម៉ោង៤ព្រឹក ឬ ៤ភ្លឺ។ ហាមមិនឱ្យមានការជួបជុំមនុស្សច្រើន ពិសេសការជួបជុំគ្នាគ្នាផឹកស៊ី ជាដើម ហើយអ្នកល្មើសបម្រាមត្រូវផាកពិន័យម្នាក់ៗ ៤ម៉ឺនបាត្រ ឬស្មើប្រមាណ១២០០ដុល្លារ។
កាលពីខែមេសា អំឡុងពិធីបុណ្យចូលឆ្នាំថ្មី អាជ្ញាធរថៃខេត្តផាធុមថានី បានឃាត់ខ្លួនពលករខ្មែរចំនួន១៧នាក់ ដោយសារពួកគេជួបជុំគ្នាផឹកស៊ីល្មើសបម្រាមរបស់អាជ្ញាធរថៃ។
ក្រោយឃាត់ខ្លួនមួយរយៈមក ក៏មានពលរដ្ឋជាង១០នាក់បានយល់ព្រមបង់ប្រាក់ពិន័យចំនួន៤ម៉ឺនបាត្រទៅឱ្យអាជ្ញាធរថៃ និងបានត្រឡប់ទៅរស់នៅ ព្រមទាំងប្រកបការងារនៅកន្លែងដើមរបស់ពួកគេជាធម្មតា ដោយឡែកអ្នកដែលមិនទាន់មានលទ្ធភាពបង់ប្រាក់ពិន័យទៅឲ្យ អាជ្ញាធរថៃនឹងត្រូវកសាងសំណុំរឿងបញ្ជូនទៅតុលាការបន្តទៀត៕