មនុស្សជំនិតប្រធានគណបក្សសង្រ្គោះជាតិបានអះអាងថា លោក កឹម សុខា នៅតែមានឆន្ទៈឥតប្រែប្រួលដោយប្រាថ្នាចង់ឲ្យមានការផ្សះផ្សា និងការបង្រួបបង្រួមជាតិពិតប្រាកដកើតឡើងនៅកម្ពុជា។
នាយខុទ្ទកាល័យលោក កឹម សុខា គឺលោកមុត ចន្ថា បានលើកឡើងទៅគណនីហ្វេសប៊ុករបស់ខ្លួនថា ប្រធានគណបក្សសង្រ្គោះជាតិរូបនេះបានបញ្ជាក់ប្រាប់អ្នកនយោបាយខ្មែរ និងមជ្ឈដ្ឋានអង្គទូតប្រទេសប្រជាធិបតេយ្យ អំពីគោលជំហររបស់លោកថា កម្ពុជាជាប្រទេសដែលផ្តល់កំណើតឲ្យលោក។ លើសពីនេះ លោកកំពុងរស់នៅក្រមដំបូលប្រទេសកំណើតនេះ ដូច្នេះលោក កឹម សុខា នឹងមិនបង្កបញ្ហាអ្វីដល់ប្រទេសនេះ ហើយលោកក៏មិនដុតបំផ្លាញប្រទេសនេះដែរ។ ជាងនេះទៀតលោក កឹម សុខា បញ្ជាក់ជំហរទៀតថាលោកនឹងមិនចូលរួមជាមួយអ្នកណាឲ្យមកដុតបំផ្លាញប្រទេសនេះដែលលោកកំពុងរស់នៅជាដាច់ខាត។
នេះមិនមែនជាលើកទី១ទេ ចំពោះការប្រកាសជំហររបស់មេបក្សប្រឆាំងរូបនេះ ដែលប្រាថ្នាចង់ឲ្យមានការផ្សះផ្សា និងការបង្រួបបង្រួមជាតិពិតប្រាកដកើតឡើងនៅកម្ពុជា តាមមាគ៌ាអហិង្សា ព្រមទាំងមិនយកខ្មែរណាជាសត្រូវនោះឡើយ បើទោះបីជាលោករងការឈឺចាប់រាប់មិនអស់ពីសំណាក់អាជ្ញាធររដ្ឋាភិបាលលោកហ៊ុន សែន ក្តី។លោក កឹម សុខា ធ្លាប់ជាប់ពន្ធនាគារជាច្រើនសារ ធ្លាប់ជាឃុំនៅស្នាក់ការបក្សរាប់ខែ និងធ្លាប់ជាប់ឃុំនៅផ្ទះប្រមាណ១ឆ្នាំ ក្នុងរយៈពេលចុងក្រោយនេះ មុនពេលលោកត្រូវបានតុលាការក្រុងភ្នំពេញកែប្រែលក្ខខណ្ឌក្នុងការឃុំខ្លួនលោកកាលពីចុងឆ្នាំមុន ដែលតម្រូវឱ្យលោកមានសេរីភាពច្រើនជាងមុន ប៉ុន្តែសិទ្ធិធ្វើនយោបាយនិងសិទ្ធដើរហើរទៅក្រៅប្រទេសនៅតែត្រូវបានហាមឃាត់។
ទោះបីជារងឈឺចាប់ ហើយសំណុំរឿងក្តីរបស់ខ្លួនកំពុងដំណើរការនៅតុលាការមិនទាន់បញ្ចប់បែបនេះក៏ដោយ ក៏មេបក្សប្រឆាំងរូបនេះមិនបានបង្ហាញការគុំគួនទៅលោកហ៊ុន សែន ឬក្រុមរបស់លោកនោះឡើយ។ ជាក់ស្តែងកាលពីពេលថ្មីៗនេះ លោកមិនត្រឹមតែផ្ញើរសាររំលែកទុក្ខដល់លោកហ៊ុន សែន និងក្រុមគ្រួសាររបស់លោកប៉ុណ្ណោះទេ ខណៈម្តាយក្មេករបស់លោកនាយករដ្ឋមន្ត្រី គឺមហាឧបាសិកាប៊ុន ស៊ាងលី បានទទួលមរណៈភាព។ ប៉ុន្តែលោកកឹម សុខា ក៏បានដឹកនាំប្រតិភូរបស់ខ្លួនចូលគោរពវិញ្ញាណខន្ធសព និងបានជជែកជាមួយលោកហ៊ុន សែន តែពីរនាក់ផ្ទាល់កាលពីថ្ងៃទី ៥ ឧសភា ក្នុងកាយវិការទន់ភ្លន់ដាក់គ្នាថែមទៀតផង។
ជំនួបរវាងដៃគូប្រកួតនយោបាយចាស់វស្សាទាំងពីររូបពេលនោះ ត្រូវបានសហគមន៍ជាតិនិងអន្តរជាតិសារទរ ដោយចាត់ទុកថាជាគម្រូដ៏ល្អមួយសម្រាប់អ្នកនយោបាយជំនាន់ក្រោយ និងចាត់ទុកថាជាជំហានវិជ្ជមានដំបូងសម្រាប់នយោបាយនៅកម្ពុជាផងដែរ៕