27 C
Phnom Penh

ក្រុមប្រឹក្សា​ឃ្លាំមើល​កម្ពុជា ជំទាស់​គម្រោង​សាងសង់​បន្ថែម​នូវ​ស្តូប វៀតណាម ឬស្តូប​នយោបាយ​ឈ្នះ​ៗ នៅ​កម្ពុជា​

ដោយ ឌឹ ខេមបូឌា ដេលី

បទវិភាគ

ក្រុមប្រឹក្សា​ឃ្លាំមើល​កម្ពុជា ជំទាស់​ដាច់​អហង្កា ចំពោះ​គម្រោង​ណាមួយ​របស់ក្រ​សួង​ការពារ​ជាតិ និង​រដ្ឋាភិបាល​លោក ហ៊ុន សែន ក្នុង​ការសាងសង់​បន្ថែម​នូវ​ស្តូប​វៀតណាម ឬស្តូប​អនុស្សាវរីយ៍​នៃ​នយោបាយ​ឈ្នះ​ៗ ក្នុង​ន័យ​លើកទឹកចិត្ត​វៀតណាម និង​រំលឹក​នូវ​ការ​ដឹងគុណ​វៀតណាម កាលពី ៤០ ឆ្នាំមុន។

សេចក្តី​ថ្លែងការណ៍​របស់​ក្រុមប្រឹក្សា​ឃ្លាំមើល​កម្ពុជា​ដែល​មាន​មូលដ្ឋាន​ក្នុង​ប្រទេស Norway ដែល​ចេញផ្សាយ​ជា​សាធារណៈ​នៅ​ថ្ងៃច័ន្ទ ទី០១ ខែមិថុនា នេះ​ឲ្យដឹង​ថា ការ​លើកទឹកចិត្ត​ក្តី និង​ការ​ដឹងគុណ​ក្តី សុទ្ធតែ​ធ្វើឲ្យ​វៀតណាម បន្ត​មើលស្រាល ឬបន្ទាបបន្ថោក ដល់​ការដឹកនាំ​រដ្ឋាភិបាល​របស់​លោក ហ៊ុន សែន កាន់តែ​ហួស​ហេ​តុ​ឡើង​ៗ។

ប្រធាន​ក្រុមប្រឹក្សា​ឃ្លាំមើល​កម្ពុជា​លោក ម៉ែ​ន ណាត បាន​អះអាង​នៅក្នុង​សេចក្តី​ថ្លែងការណ៍​នេះ​ថា រដ្ឋាភិបាល​វៀតណាម បាន​បញ្ជា​ឲ្យ​ទាហាន​របស់​ខ្លួន ចូល​បោះជំរំ ឬបោះតង់ ១១៤ កន្លែង​ផ្សេងគ្នា នៅ​តាម​បណ្តា​យព្រំដែន​ក្នុង​ខេត្តកណ្តាល​ចំនួន ៣១ កន្លែង និង​ខេត្ត តាកែវ ចំនួន ៨៣ កន្លែង ហើយដែល​តង់​ទាំងនោះ​នៅ​មិនទាន់​ត្រូវ​បាន​រុះរើ​ចេញ​វិញ​ទាំងស្រុង​នៅឡើយ​ទេ។លោក​បន្ត​ថា ទង្វើ​របស់​វៀតណាម គឺជា​ការ​គំរាមកំហែង​យ៉ាង​ពិតប្រាកដ មក​លើ​ប្រទេស​កម្ពុជា ទោះបី​នៅ​ក្រោម​លេស​ថា «វិធានការ​រឹត​បន្តឹង​ការ​ចេញ​-ចូល​តាម​ច្រកព្រំដែន ដើម្បី​ទប់ស្កាត់​ការ​រីក​រាលដាល​ជំងឺ​កូ​វីដ១៩ (Covid​-19​)» ក្តី។

លោក​បន្ត​ថា ទង្វើ​ទាំងនោះ ជា​កា​រំលោភ​ធ្ងន់ធ្ងរ​ទៅលើ​កិច្ច​ព្រមព្រៀង​ទីក្រុង​ប៉ារីស ឆ្នាំ១៩៩១ ដែល​វៀតណាម ជា​ម្ចាស់​ហត្ថលេខី ត្រង់​មាត្រា១ ចំណុច ២-គ. ដែល​ចែងថា «ជៀសវាង​ការ​ជ្រៀតជ្រែក​របស់​រដ្ឋ​ដទៃ​ៗទៀត ដោយ​ផ្ទាល់ ឬដោយប្រយោល ទោះ​តាម​រូបភាព​ណាក៏ដោយ» និង​ត្រង់​ចំណុច ២-ង. ដែល​ចែងថា «ជៀសវាង​ការ​គំរាមកំហែង ឬប្រើ​កម្លាំង​ប្រឆាំង​នឹង​បូរណភាព​ដែនដី ឬឯករាជ្យ​នយោបាយ​នៃ​រដ្ឋ​ណាមួយ ឬដោយ​ឥរិយាបថ​ណាមួយ ដែល​មិន​ស្រប​នឹង​គោលបំណង​របស់​អង្គការសហប្រជាជាតិ (អ.ស.ប​)»។

ប្រតិកម្ម​របស់​ក្រុមប្រឹក្សា​ឃ្លាំមើល​កម្ពុជា​ធ្វើឡើង​បន្ទាប់ពី​គេហទំព័រ របស់ក្រ​សួង​ការពារ​ជាតិ​កាលពី​ថ្ងៃទី២០ ខែឧសភា បាន​ចុះផ្សាយ​ថា រដ្ឋាភិបាល​មាន​គម្រោង​កសាង​ស្តូប​អនុស្សាវរីយ៍​នៃ​យោ​បាយ​ឈ្នះ​ៗបន្ថែម ខេត្តកោះកុង ឧត្តរមានជ័យ ប៉ៃលិន និង កំពង់ស្ពឺ។

ចំណែក​ស្តូប​អនុ​ស្សាយ៍​នយោបាយ​ឈ្នះ​ឈ្នះ​បី​កន្លែង​ទៀត នឹង​ត្រូវ​កសាង​ឡើង នៅ​តំបន់​អន្លុង​វែង ខេត្ត​ឧត្តរមានជ័យ នៅ​ក្រុងប៉ៃលិន និង​នៅ ខេត្ត​កំពង់ស្ពឺ ហើយ​ស្តូប​ទាំង​បី​កន្លែង​នេះ នឹង​ត្រូវ​ចាប់ផ្តើម​សាងសង់​ជាបន្តបន្ទាប់​គ្នា នៅ​ក្រោយពី​រដ្ឋាភិបាល សាងសង់​នៅ​ខេត្តកោះកុង​រួច។

ទោះជាយ៉ាងណា​ក៏ដោយ ក្រុមប្រឹក្សា​ឃ្លាំមើល​កម្ពុជា​អំពាវនាវ​យ៉ាង​ទទូច​ដល់​រដ្ឋាភិបាល​លោក ហ៊ុន សែន ឲ្យ​ផ្អាក​គម្រោង​ទាំងអស់ លើ​ករណី​សាង​ស្តូប​វៀតណាម ឬស្តូប​អនុស្សាវរីយ៍​នៃ​នយោបាយ​បាយ​ឈ្នះ​ៗ ដោយ​ងាក​ទៅ​ពិនិត្យមើល «ដំណោះស្រាយ​នយោបាយ​កម្ព​ជា ស្វែងរក​ឯកភាពជាតិ» រួច​ត្រូវ​ប្រើប្រាស់​យន្តការ​អន្តរជាតិ​នានា ទប់ស្កាត់​ទាហាន​វៀតណាម កំពុងតែ​គំរាមកំហែង​មក​លើ​ភាគី​កម្ពុជា នៅ​តាម​បណ្តោយ​ព្រំដែន​សព្វថ្ងៃ​នេះ​៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស