ស្ថានទូតខ្មែរប្រចាំនៅសហរដ្ឋអាមេរិក បានអំពាវនាវឱ្យពលរដ្ឋខ្មែរនៅរស់នៅប្រទេសមហាអំណាចលោកសេរីមួយនេះ ពិសេសក្នុងតំបន់មានផ្ទុះការតវ៉ាដោយហិង្សាខ្លាំង ឱ្យមានការប្រុងប្រយ័ត្នខ្ពស់ចំពោះសុវត្ថិភាព និងការពារទ្រព្យសម្បត្តិរបស់ខ្លួន។សេចក្តីអំពាវនាវរបស់ស្ថានទូតកម្ពុជានេះ ធ្វើឡើងនៅថ្ងៃទី១ ខែមិថុនា ដោយ ណែនាំឲ្យពលរដ្ឋខ្មែរ នៅឲ្យឆ្ងាយពីការជួបជុំ ឬការប្រមូលផ្តុំនានា ទោះក្រោមរូបភាព ឬមូលហេតុអ្វីក៏ដោយ ហើយត្រូវកាត់បន្ថយឲ្យបានច្រើនបំផុត ក្នុងការចេញទៅខាងក្រៅ ដើម្បីបញ្ចៀសគ្រោះថ្នាក់ដោយប្រការណាមួយ។
ស្ថានទូតកម្ពុជា ក៏បានបង្ហាញការសោកស្តាយចំពោះការខូចខាតទ្រព្យសម្បតិ្ត និងមានការព្រួយបារម្ភចំពោះសុវត្ថិភាពពលរដ្ឋខ្មែរ ដោយទទួលបានព័ត៌មានថា ទ្រព្យសម្បត្តិរបស់ពលរដ្ឋខ្មែរមួយចំនួន ក្នុងទីក្រុងឡុងប៊ិច (Long Beach) រងការខូចខាត ដោយសារបាតុកម្មហិង្សាទាមទាររកយុត្តិធម៌ឲ្យបុរសអាមេរិកស្បែកខ្មៅម្នាក់ ដែលបានស្លាប់ដោយសារប៉ូលិសស្បែកស សង្កត់ការរហូតដល់ស្លាប់។
ស្ថានទូតកម្ពុជា លើកឡើងថា ចំពោះមុខសភាពការណ៍ប្របូកច្របល់ និងហានិភ័យនេះ អាចកើតឡើងពីបាតុកម្ម ដែលកំពុងរាលដាល និងកាន់តែមានភាពហិង្សា តាមបណ្តាទីក្រុងនានានៅអាមេរិក បានអំពាវនាវឲ្យពលរដ្ឋខ្មែរទាំងអស់ មានការប្រុងប្រយ័ត្នខ្ពស់ ក្នុងការការពារសុវត្ថិភាពផ្ទាល់ខ្លួន និងក្រុមគ្រួសារ រួមទាំងទ្រព្យសម្បត្តិផងដែរ។
បាតុកម្មដោយហិង្សានៅសហរដ្ឋអាមេរិក បានកើតឡើងចំពេលប្រទេសនេះកំពុងប្រឈមនឹងវិបត្តិកូវីដ១៩ខ្លាំង ដែលធ្វើឱ្យអ្នកឆ្លងជំងឺនេះបានកើនឡើងដល់ទៅជិត២លាននាក់ និងបណ្តាលឱ្យមានមនុស្សស្លាប់ជាង១០ម៉ឺននាក់។ ជាមួយគ្នានេះ ស្ថានទូតកម្ពុជា ក៏បានឆ្លៀតរម្លឹកពលរដ្ឋខ្មែរ ឲ្យប្រុងប្រយ័ត្នខ្ពស់បំផុត ចំពោះពីការឆ្លងជំងឺកូវីដ-១៩ ដោយជំរុញពលរដ្ឋខ្មែរ គោរពឲ្យបានខ្ជាប់ខ្ជួន តាមបម្រាមគោចរ និងបម្រាមនានា របស់អាជ្ញាធរមូលដ្ឋាន ដែលខ្លួនកំពុងស្ថិតនៅ។
បាតុកម្មនៅអាមេរិក បានធ្វើឱ្យលោកប្រធានាធិបតីដូណាល់ ត្រាំ សម្រេចបញ្ចេញកម្លាំងដើម្បីទប់ទល់បាតុករ ខណៈបាតុកម្មនោះបានឈានដល់ការប្រើប្រាស់អំពើហិង្សា ដុតបំផ្លាញទ្រព្យសម្បត្តិរដ្ឋ នឹងឯកជនមួយចំនួន ហើយក៏មានជនឱកាសនិយមចូលលួចទំនិញឬ ទ្រព្យសម្បត្តិរបស់ពលដ្ឋផងដែរ។
ទាក់ទងនឹងការបង្ក្រាបបាតុកម្មនេះ លោកនាយករដ្ឋមន្ត្រីហ៊ុន សែន កាលពីថ្ងៃម្សិលមិញបានឌឺដងទៅនាយកអង្គការឃ្លាំមើលសិទ្ធិមនុស្សអន្តរជាតិ Human Right Watch លោក ប្រែត អាដាម ដោយថាបើមិនថ្កោលទោសអាមេរិករឿងបង្ក្រាបបាតុករនេះទេ លោកមិនមែនជាមនុស្សឡើយ ព្រោះអង្គការមួយនេះតែងថ្កោលទោសរដ្ឋាភិបាលលោកហ៊ុន សែន រហូតមក ខណៈដែលលោកហ៊ុន សែន បញ្ជាក់ថា រដ្ឋាភិបាលគ្រាន់តែបង្ក្រាបក្រុមអ្នកតវ៉ាដើម្បីរក្សាសណ្តាប់ធ្នាប់និងសន្តិសុខសង្គមប៉ុណ្ណោះ។
យ៉ាងនេះក្តីកន្លងមក របាយការណ៍របស់អង្គការអន្តរជាតិមួយនេះបានលើកឡើងដោយថ្កោលទោសរាល់ទម្រង់បង្ក្រាបដោយហិង្សាឬរំលោភសិទ្ធិមនុស្ស ទៅលើពលរដ្ឋ សង្គមស៊ីវិល អ្នកសារព័ត៌មាន ឬការធ្វើទុកបុកម្នេញទៅលើអ្នកនយោបាយមិនមែនមានតែនៅកម្ពុជានោះទេ ដោយមានទាំងនៅតំបន់អាស៊ី អាហ្វ្រិក និងនៅអាមេរិកជាដើម។
ក្រុមអ្នកឃ្លាំមើលនិយាយថាអំពើហិង្សារដែលឈានទៅដល់ដុតកំទេច ហាងលក់ទំនិញ ដុតកំទេចឡានប៉ូលិស វ៉ៃបំបែកហាងលក់ទំនិញធំៗដែលមានយីហោរល្បីៗដើម្បីលួចអ៊ីវ៉ាន់ មិនមែនជាការរកយុត្តិធម៌ឲ្យបុរសអាមេរិកាំងស្បែកខ្មៅឈ្មោះ George Floy ស្លាប់ដោយសា្នដៃប៉ូលិសនោះទេ។
ប៉ុន្តែពួកគេជាក្រុមចោរ និងក្រុមឈ្លាតឱកាសលួចទ្រព្យសម្បត្តិអ្នកដ៏ទៃ និងបំផ្លាញសេដ្ឋកិច្ចរបស់អាមេរិកខ្លួនឯងប៉ុណ្ណោះ។លោកប្រធានាធិបតី ដូណាល់ ត្រាំ កាលពីថ្ងៃច័ន្ទ បានថ្លែងនៅខាង មុខសួនច្បារនៃសេតវិមានថា ជាតិរបស់យើងឥលូវនេះរងគ្រោះដោយសារក្រុមឥតសាសនា ក្រុមចោរប្លន់ ឧក្រិដ្ឋជន ក្រុមបង្កអគ្គិភ័យ ហ្វូងមនុស្សដែលពោរពេញដោយសេចក្ដីក្រេវក្រោធ ឥតសណ្ដាប់ធ្នាប់វាយគប់បំផ្លាញរបស់អ្នកដទៃ។ លោកបន្តថានេះមិនមែនជាសកម្មភាពបាតុកម្មដោយសន្ដិវិធីអ្វីនោះទេ ប៉ុន្តែវាជាទង្វើភេរវកម្មក្នុងប្រទេស៕