សក្រុមយុវជនបានអះអាងថា អាជ្ញាធរ និងសមត្ថកិច្ចស្រុកកោះកុង ខេត្តកោះកុង បានហាមឃាត់យុទ្ធនាការជិះកង់ ហើយពួកគេបានឃាត់កង់របស់របស់ក្រុមយុវជនទៅរក្សាទុកនៅអធិការស្រុកទៀតផង។យុទ្ធនាការជិះកង់ របស់ក្រុមយុវជនប្រមាណ២០នាក់ពេលនេះធ្វើឡើង ក្នុងគោលបំណងយកញ្ញត្តិមកដាក់ជូនលោកនាយរដ្ឋមន្ត្រី ហ៊ុន សែន ស្នើសុំឱ្យដាក់តំបន់កោះកុងក្រៅ ជាតំបន់អភិរក្សធម្មជាតិ ឬ តំបន់ឧទ្យានជាតិសមុទ្រជាផ្លូវការ។
វីដេអូដែលបង្ហោះនៅលើទំព័រហ្វេសប៊ុកស្ថាបនិកអង្គការចលនាមាតាធម្មជាតិលោកអាឡិច ហ្គន់សាឡេសដេវីដសិននៅថ្ងៃនេះ បានចោទជាសំណួរ តើអាជ្ញាធរខេត្ដកោះកុង មិនស្រលាញ់បរិស្ថាន និងធនធានធម្មជាតិមែនទេ?លោកឱ្យដឹងថា នៅក្នុងយុទ្ធនាការជិះកង់ថ្ងៃទី២ នៃក្រុមយុវជនចលនាមាតាធម្មជាតិ ក្នុងគោលបំណងដាក់ញតិឲ្យលោកនាយករដ្ឋមន្ត្រី ហ៊ុន សែន ដាក់កោះកុងក្រៅទៅជាតំបន់ការពារដោយច្បាប់ ប៉ុន្ដែពេលនេះកំពុងត្រូវបានរអាជ្ញាធររារាំង នៅក្នុងឃុំត្រពាំងរូង ស្រុកកោះកុង ខេត្ដកោះកុង តាំងតែពីព្រឹករហូតមកដល់ពេលរសៀលនេះ។
លោកថាយុវជនដ៏អង់អាចក្លាហាន ដែលសុខចិត្ដចំណាយពេលវេលាដ៏មានតម្លៃរបស់ពួកគាត់ មិនខ្លាចក្ដៅ ជួបព្យុះភ្លៀងនៅតាមផ្លូវ ហើយសុខចិត្ដលំបាកក្នុងការជិះកង់ មានចម្ងាយផ្លូវរាប់រយគីឡូ ដើម្បីសង្រ្គោះកោះកុងក្រៅ ដែលមានសក្ដានុពលធនធានធម្មជាតិយ៉ាងច្រើន ប៉ុន្ដែបែរជាអាជ្ញាធរខេត្ដកោះកុង មករារាំង និងគម្រាមកំហែងពួកគាត់ទៅវិញ។
លោកឱ្យដឹងថា តាមសាច់រឿងដែលក្រុមយុវជនបានប្រាប់ អាជ្ញាធរ បានឃាត់មិនឲ្យពួកគាត់ជិះកង់បន្ដតាំងពីម៉ោង ៦:៣០នាទីព្រឹក ដោយប្រើលេសស្ទង់កំដៅរឿងកូវីដ-១៩ បន្ទាប់ពីរួចរាល់រឿងនេះ អាជ្ញាធរក៏តម្រូវឲ្យមានការចុះឈ្មោះ ការទាមទារឲ្យផ្ដល់អត្ដសញ្ញាណប័ណ្ណ ទាមទារមើលញ្ញតិ្តរបស់ក្រុមយុវជន ព្រមទាំងទាមទារឲ្យក្រុមយុវជនផ្ដិតមេដៃ ទៅលើក្រដាសស្នាមដែលពួកគេសរសេរ ប៉ុន្តែក្រុមយុវជនបដិសេធចំពោះការផ្តិតមេដៃនោះ។
នៅម៉ោងប្រមាណ១២ ថ្ងៃត្រង់ អាជ្ញាធរបានលើកកង់ពួកគាត់ដាក់ឡាន ដើម្បីយកទៅទុកនៅអធិការស្រុកកោះកុង។
ស្ថាបនិកអង្គការចលនាមាតាធម្មជាតិរូបនេះ ទាមទារឱ្យអាជ្ញាធរខេត្ដកោះកុង ត្រូវតែបើកផ្លូវឲ្យពួកគាត់បន្ដដំណើរជិះកង់ទៅមុខ ជាដាច់ខាត និងស្នើឱ្យ។ ជាមួយគ្នានេះពលរដ្ឋប្តេជ្ញាថានឹងនាំគ្នាចូលរួមជាមួយពួកក្រុមយុវជន ដើម្បីសង្គ្រោះកោះកុងក្រៅឲ្យទាល់តែបាន។
ក្រុមយុវជនបានលើកឡើងក្នុងវីដេអូនោះ ដោយហៅការឃាត់និងចាប់យកកង់របស់ពួកគាត់ទៅរក្សាទុកនេះ ជាការរំលោភសិទ្ធិយុវជនក្នុងការចូលរួមថែរក្សា និងការពារធនធានធម្មជាតិនៅកម្ពុជា ដែលផ្ទុយទាំងស្រុងពីច្បាប់ និងការលើកឡើងរបស់ប្រមុខរដ្ឋាភិបាលកន្លងមក ដែលប្រាប់ឱ្យពលរដ្ឋទាំងអស់ចូលរួមការងារបរិស្ថាន ពិសេសធនធានធម្មជាតិនៅកម្ពុជា។
ចំណែកសកម្មជន១០០រាត្រី លោក មួង សុភ័គ្រណា ដែលចូលរួមក្នុងយុទ្ធនាការជិះកង់នេះដែរនោះ បានប្រាប់សាព័ត៌មាន The Cambodia Daily នៅមុនការផ្សាយនេះបន្តិចថា ក្រុមយុវជនបានសម្រេចចិត្តនាំគ្នាដើរពីឃុំត្រពាំងរូង ស្រុកកោះកុង ឈ្ពោះមកកាន់ឃុទ្ទកាល័យលោក ហ៊ុន សែន វិញ ដោយសារកង់របស់ពួកគេត្រូវបានសមត្ថកិច្ចខេត្តកោះកុងរឹបអូសអស់បាត់ទៅហើយ។
លោកបន្តថាទោះជាបីជាក្រុមយុវជននាំគ្នាដើរយ៉ាងណាក៏ដោយ ក៏អាជ្ញាធរនៅតែតាមថត និងតាមឃ្លាំមើលសកម្មភាពគ្រប់ពេលវេលា ដែរ ហើយរហូតមកទល់ពេលនេះ ក្រុមយុវជនបានដើរមកដល់ជិត ទឹកដីស្រុកបុទុមសាគរហើយ។
យុទ្ធនាការជិះកង់នេះ មានយុវជនជិត២០នាក់ គ្រោងធ្វើរយៈពេល៤ថ្ងៃ ចាប់ផ្តើមចេញដំណើរពីថ្ងៃទី ២ មិថុនា ដល់ថ្ងៃទី៤មិថុនា ដោយចេញដំណើរពីទីរួមខេត្តកោះកុង ឆ្ពោះមកកាន់រាជធានីភ្នំពេញ៕