លោក ហ៊ុន សែន កាលពីថ្ងៃទី០៤ ខែមិថុនា បានចេញសេចក្តីសម្រេច បង្កើតគណៈកម្មការត្រួតពិនិត្យការអភិវឌ្ឍន៍នៅកោះកុងក្រៅ ខេត្តកោះកុង ដែលមានសមាសភាព ១០រូប ដឹកនាំដោយលោក សាយ សំអាល់ រដ្ឋមន្ត្រីក្រសួងបរិស្ថាន។
សេចក្តីសម្រេចរបស់លោក ហ៊ុន សែន ឲ្យដឹងថា តំបន់កោះកុងក្រៅ ត្រូវបានគណៈរដ្ឋមន្ត្រីរបស់លោកកាលពីថ្ងៃទី១៩ ខែមិថុនា ឆ្នាំ២០១៩ បានសម្រេចប្រគល់ឲ្យក្រុមហ៊ុន កោះកុង អេសអ៊ីហ្សិត ខូអិលធីឌី (SEZ Co.LTD) ធ្វើការអភិវឌ្ឍ។
ទោះជាយ៉ាងណាក៏ដោយលោក ហ៊ុន សែន មិនបានបញ្ជាក់ឲ្យបានច្បាស់ថាការអភិវឌ្ឍន៍របស់ក្រុមហ៊ុនឯកជន SEZ នោះជាអភិវឌ្ឍន៍អ្វីឲ្យពិតប្រាកដនោះឡើយ ហើយថាតើក្រុមហ៊ុនឯកជនមួយនេះមានប្រវត្តិល្អ ឬអាក្រក់យ៉ាងណានោះដែរ។
សេចក្តីសម្រេចរបស់លោក ហ៊ុន សែន ក្នុងការបង្កើតគណៈកម្មការត្រួតពិនិត្យការអភិវឌ្ឍន៍នៅកោះកុងក្រៅ ខេត្តកោះកុង នេះ ធ្វើឡើង ស្របពេលដែលមានក្រុមយុវជនស្រឡាញ់បរិស្ថាននាំគ្នាធ្វើយុទ្ធនាការ ជិះកង់ ពីខេត្តកោះកុង មកភ្នំពេញ ក្នុងបំណងដាក់ញត្តិឲ្យលោក ហ៊ុន សែន ជួយការពារតំបន់កោះកុងក្រៅ និងសង្គ្រោះកោះកុងក្រៅមួយនេះឲ្យមានសុវត្ថិភាព។
ប៉ុន្តែយុទ្ធនាការជិះកង់នេះត្រូវបានហាមឃាត់ និងរំខានដោយអាជ្ញាធរខេត្តកោះកុង។ ទោះជាយ៉ាងណាក៏ដោយ អង្គការការពារសិទ្ធិមនុស្សលីកាដូ អះអាងថា ការរារាំង និងសាកសួរក្រុមយុវជនបរិស្ថានអស់ជាច្រើនម៉ោងពីសំណាក់អាជ្ញាធរខេត្តកោះកុង គឺជាការបំភិតបំភ័យមួយដល់យុវជន ដែលស្រលាញ់ និងចង់ការពារធនធានធម្មជាតិរបស់ប្រទេស ។
សកម្មជនបរិស្ថានទាំងនេះ ត្រូវបាននគរបាលរារាំង ដោយមិនឱ្យបន្តការជិះកង់ពីទីក្រុងខេមរភូមិន្ទនៃខេត្តកោះកុង ឆ្ពោះមកកាន់រាជធានីភ្នំពេញ ហើយសមត្ថកិច្ចបានចាប់យកកង់របស់ពួកគេទៅរក្សាទុកនៅអធិការនគរបាលស្រុកកោះកុងថែមទៀត ។
សមត្ថកិច្ចខេត្តកោះកុងអះអាងថាខ្លួននឹងប្រគល់សងកង់របស់ក្រុមយុវជនទាំងនេះវិញ នៅក្រោយថ្ងៃទី៥ ខែមិថុនា ដែលជាទិវាបរិស្ថានពិភពលោក ។កាលពីថ្ងៃទី៣ ខែមិថុនា ក្រសួងបរិស្ថានសេចក្តីប្រកាសព័ត៌មានដោយសម្តែងការសោកស្តាយចំពោះក្រុមជនមួយចំនួនតូចដែលសម្តែង ធ្វើជាអ្នកការពារបរិស្ថាន ដោយបានធ្វើសកម្មភាពទាមទារឱ្យមានការសង្គ្រោះតំបន់កោះកុងក្រៅ នៃខេត្តកោះកុង ឱ្យដាក់ជាតំបន់ការពារ។
ក្រសួងបរិស្ថានបានចាត់ទុកសកម្មភាពនោះគ្រាន់តែជាលេស ដើម្បីបិទបាំងនូវឧបាយកលនយោបាយទុច្ចរិតដែលស្ថិតក្រោមការរៀបចំមួយដ៏ច្បាស់លាស់ប៉ុណ្ណោះ។ក្រសួងបរិស្ថាន បញ្ជាក់ថា ទោះបីជាគ្មានយុទ្ធនាការ ឬការទាមទារណាមួយក៏ដោយ ក៏រាជរដ្ឋាភិបាលកម្ពុជា តាមរយៈក្រសួងបរិស្ថានបានយកចិត្តទុកដាក់ខ្ពស់លើការងារការពារនិងអភិរក្សតំបន់កោះកុងក្រៅនេះ ដោយបានបញ្ជូនក្រុមមន្ត្រីជំនាញ បានធ្វើការសិក្សាស្រាវជ្រាវ រៀបចំឯកសារ និងទិន្នន័យផ្សេងៗទាក់ទងនឹងតំបន់កោះកុងក្រៅនេះ តាំងពីឆ្នាំ ២០១៦ មកម្ល៉េះ ដើម្បីដាក់តំបន់នេះ ជា«ឧទ្យានជាតិសមុទ្រ » ព្រោះតំបន់នេះសម្បូណ៍ទៅដោយសក្តានុពលផ្នែកធនធានធម្មជាតិ និងជីវៈចម្រុះ និងមានឆ្នេរខ្សាច់ល្អស្រស់ស្អាត ដែលត្រូវការពារនិងអភិរក្ស។ នៅក្នុងគម្រោងផែនការ ក្រសួង បរិស្ថានក្រសួង រំពឹងថានឹងអាចប្រកាសតំបន់កោះកុងក្រៅនេះជា«ឧទ្យានជាតិសមុទ្រ»អំឡុងឆ្នាំ ២០២១ ខាងមុខនេះ ក្រោយការបញ្ចប់ការសិក្សារួចរាល់។
ជាមួយគ្នានេះ ក្រសួងបរិស្ថាន សង្ឃឹមថាក្រុមជនមួយចំនួនតូចនេះ នឹងយល់ដឹងកាន់តែច្បាស់ ហើយខិតខំរៀនធ្វើការរួមគ្នាប្រកបដោយភាពស្មោះត្រង់ជាមួយអាជ្ញាធរពាក់ព័ន្ធដើម្បីបុព្វហេតុបរិស្ថាន និងធនធានធម្មជាតិ ហើយជៀសវាងការបង្កើតឆាកល្ខោនសម្តែងនិងធ្វើអាជីវកម្មដើម្បីកេងចំណេញនយោបាយ។
ទោះជាយ៉ាងណាក៏ដោយ ក្រុមយុវជនអះអាងថា សកម្មភាពពួកគេពុំមែនជាការកេងចំណេញនយោបាយ ហើយក៏មិនពាក់ព័ន្ធរឿងនយោបាយដូចការចោទប្រកាន់នោះដែរ។ទោះបីជាមានឧបសគ្គបែបនេះក្តី ក្រុមយុវជនបញ្ជាក់ថាយុទ្ធនាការដាក់ញ្ញត្តិជូនរដ្ឋាភិបាល នឹងនៅតែបន្ត ដោយគ្រាន់តែប្តូរពីការជិះកង់ ការដើរដោយថ្មើជើង មកជាការជិះឡានឈ្នួលដើម្បីសម្រេចតាមគោលដៅប៉ុណ្ណោះ។
សកម្មជនបរិស្ថាន បានលើកឡើងពីគុណវិបត្តិ ប្រសិនបើរាជរដ្ឋាភិបាលមិនអាចការពារតំបន់នេះបាន ដែលអាចនាំឲ្យមានមហន្តរាយ ផ្នែកបរិស្ថាន ប្រសិនបើធនធានធម្មជាតិក្នុងតំបន់នេះ ត្រូវបានលក់ទៅឱ្យក្រុមហ៊ុនឯកជន ៕