30 C
Phnom Penh

កូនប្រុស​ច្បង​លោក ហ៊ុន សែន ត្រូវ​បាន​ដំឡើង​តំណែង​ជា​ប្រធាន​យុវជន​គណបក្សប្រជាជន​កម្ពុជា​ថ្នាក់​កណ្តាល

ដោយ ឌឹ ខេមបូឌា ដេលី

បទវិភាគ

កូនប្រុស​ច្បង​របស់​លោកនាយក​រដ្ឋមន្ត្រី​ហ៊ុន សែន គឺ លោក ហ៊ុន ម៉ា​ណែ​ត ត្រូវ​បាន​ប្រធាន​គណបក្សប្រជាជន​កម្ពុជា ដែល​ជា​ឪពុកបង្កើត​របស់​លោក ដំឡើង​តំណែង​នៅក្នុង​ជួរ​គណបក្ស ពី​តំណែង​អនុប្រធាន ទៅជា​ប្រធាន​យុវជន​គណបក្ស​កាន់អំណាច​ថ្នាក់​កណ្តាល។

ក្នុង​សេចក្តី​សម្រេច​របស់​បក្ស​កាន់អំណាច ដែល​មាន​ត្រា​និង​ហត្ថលេខា​របស់​ប្រធាន​បក្ស​នេះ​គឺ លោក​ហ៊ុន សែន សែន នៅ​ថ្ងៃ៨មិថុនា បានសម្រេច​ជា​ផ្លូវការ​ដំឡើង​តំណែង​ឧត្តមសេនីយ៍ឯក និង​ជា​អគ្គ​មេបញ្ជាការ​រង​នៃ​កងយោធពល​ខេមរភូមិន្ទ ព្រមទាំង​ជា​មេបញ្ជាការ​កងទ័ពជើងគោក លោក ហ៊ុន ម៉ា​ណែ​ត ពី​តំណែង​អនុប្រធាន ទៅជា​ប្រធាន​យុវជន​គណបក្សប្រជាជន​កម្ពុជា​ថ្នាក់​កណ្តាល។

អ្នកវិភាគ​នយោបាយ​លោក គឹម សុខ យល់ឃើញ​ថា​ការដំឡើង​តំណែង​កូនប្រុស​នាយក​រដ្ឋមន្ត្រី​នៅក្នុង​ជួរបក្ស​ប្រជាជន​បន្ថែម​ទៀត​នេះ ព្រោះ​លោក ហ៊ុន សែន ជា​មនុស្ស​ជាប់ពាក់ព័ន្ធ​នឹង​បទ​ល្មើស​ធំៗ​រាប់មិនអស់ ហើយ​លោក មាន​អារម្មណ៍​មិន​ស្ងប់​ក្នុង​រឿង​នេះ។ លោក គឹម សុខ អះអាង​ថា លោក ហ៊ុន សែន ត្រូវ​ឈ្មូស​ឈ្មុល​ប្រឹង​លើក​លោក ហ៊ុន ម៉ា​ណែ​ត ជា​កូន​ឲ្យ​ដល់កម្រិត​កំពូល​កាន់តែ​ឆាប់ ដើម្បី​ជួយ​សំអាត​ផ្លូវ ការពារ​កិត្តិយស​របស់​ខ្លួន។អ្នកវិភាគ​ដដែល​ថា ពិត​ណាស់ ការដំឡើង​តំណែង​កូនប្រុស​របស់​ខ្លួននេះ នឹង​បង្កទំនាស់​នៃ​មន្ត្រី​ផ្ទៃក្នុង​បក្ស ប៉ុន្តែ​ពុំ​មាន​ភាព​ប្រទូស្ត​រាយ​ជាក់ស្ដែង​ទេ ព្រោះ​លោក ហ៊ុន សែន ក្ដោប​ក្តាប់​ផ្ទៃក្នុង​គណបក្សប្រជាជន​កម្ពុជា​ស្ទើរតែ​ណែន​ក្នុង​ដៃ​ទៅ​ហើយ ហើយក៏​ពុំ​មាន​មន្ត្រី​ណា​ហ៊ាន​សម្ដែង​ឲ្យ​ឃើញ​សកម្មភាព​ទំនាស់​ជាក់ស្ដែង​នោះ​ដែរ។

កាលពី​ចុងឆ្នាំ២០១៨ លោក​ហ៊ុន ម៉ា​ណែ​ត ត្រូវ​បាន​គណបក្ស​សម្រេច​ដាក់​តែងតាំង​តំណែង​ស្ទើរ​កំពូល​ក្នុង​បក្ស គឺជា​សមាជិក​គណៈ​អចិន្ត្រៃយ៍​របស់​គណៈកម្មាធិការ​កណ្ដាល​គណបក្ស​កាន់អំណាច រួម​ជាមួយ​មនុស្ស​កំ​ពូល​ៗ៦នាក់​ផ្សេងទៀត រួមមាន​រដ្ឋមន្ត្រី​ក្រសួង​ដែនដី លោក ជា សុ​ផា​រ៉ា រដ្ឋមន្ត្រី​ក្រសួង​ការបរទេស​លោក ប្រាក់ សុ​ខុន រដ្ឋមន្ត្រី​ក្រសួងសេដ្ឋកិច្ច លោក អូន ព័ន្ធ​មុនី​រ័ត្ន អគ្គ​មេបញ្ជាការ​កងទ័ព​លោក វង្ស ពិ​សេន អគ្គ​មេបញ្ជាការ​រង និង​ជា​មេបញ្ជាការ​កងរាជអាវុធហត្ថ​លោក សៅ សុខា និង​នាយសេនាធិការ​ចម្រុះ​កងទ័ព លោក ឥត សារ៉ា​ត់ ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស