24 C
Phnom Penh

កម្ពុជា​អះអាង​ថា វៀតណាម​បោះតង់​នៅ​តំបន់​មិនទាន់​ឯកភាព​ចំនួន២៥៦កន្លែងនៅ​តាម​ខ្សែរ​បន្ទាត់​ព្រំដែន​

បទវិភាគ

មន្ត្រី​ជាន់ខ្ពស់​អគ្គស្នងការ​នគរបាល​ជាតិ​នៃ​ក្រសួងមហាផ្ទៃ និង​ជា​ប្រធាន​នាយកដ្ឋាន​កណ្តាល​នគរបាល​ព្រំដែន លោក ហ៊ូ សា​គុណ បាន​អះអាង​ថា​វៀតណាម​បាន​បោះតង់​ដោយ​ឯកតោភាគី ចំនួន២៥៦កន្លែង នៅ​តាម​បណ្ដោយ​ព្រំដែន​ជាប់​កម្ពុជា នា​ពេល​កន្លង​មក្នុង​តំបន់​ដែល​មិនទាន់​មាន​ឯកភាព​គ្នា​នៅឡើយ។

សារព័ត៌មាន​ស្និទ្ធ​រដ្ឋាភិបាលFresh News បាន​ចុះផ្សាយ​ដោយ​ដកស្រង់​សម្តី​របស់​ប្រធាន​នាយកដ្ឋាន​កណ្តាល​នគរបាល​ព្រំដែន លោក ហ៊ូ សា​គុណ ដែល​ថ្លែង​ក្នុង​ពិធី​ប្រកាស​ផ្ទេរ​ភារកិច្ច តែងតាំង​មុខតំណែង និង​បំពាក់​ឋានន្តរសក្តិ ដល់​មន្ត្រី​នគរបាល នៃ​អគ្គស្នងការ​ដ្ឋាន​នគរបាល​ជាតិ កាលពី​ថ្ងៃទី១០ មិថុនា​ថា ចាប់តាំងពី​មាន​វិបត្តិ​កូ​វីដ​-១៩មក ភាគី​វៀតណាម​បាន​បោះតង់​ដោយ​ឯកតោភាគី​នៅ​តាម បណ្តា​ខេត្ត​មួយចំនួន​ជាប់​ព្រំប្រទល់​កម្ពុជា។លោក​បញ្ជាក់​ថា តង់​ចំនួន២៥៦ទីតាំង​ដែល​វៀតណាម​បោះ​នោះ សុទ្ធតែ​ជា​តំបន់​មិនទាន់​បាន​ឯកភាព​គ្នា​ក្នុង​ការវាស់វែង​ខណ្ឌសីមា និង​បោះបង្គោល​ព្រំដែន​នៅឡើយ។ប៉ុន្តែ​ដោយសារ​មានការ​តវ៉ា​ពីសំណាក់​រដ្ឋបាល​កម្ពុជា​នោះ ទើប​ភាគី វៀតណាម បានសម្រេច​រើចេញ និង​ដកថយ​ជាច្រើន​កន្លែង​ទៅវិញ។លោក​ថា ការដែល​វៀតណាម​បោះតង់​នោះ គឺ​ពិបាក​និយាយ​ថា​ជា​តំបន់​សនោះ​ណាស់ ពីព្រោះ​ថា​វា​នៅ​មិនទាន់​បាន​ឯកភាព​គ្នា​ក្នុង​ការវាស់វែង​នោះ​ឡើយ។ លោក​បន្ត​ថា កន្លងទៅ​មាន​សាធារណជន​មួយចំនួន បាន​លើកឡើង​ថា តំបន់​នោះ ជា​តំបន់​ស តែ​តាមពិត​ទៅ​វា​មិនមែន​ជា​តំបន់​សឡើយ ប៉ុន្តែ​វា​ជា​តំបន់​ដែល​មិនទាន់​មានការ​ឯកភាព​គ្នា​ក្នុង​ការ​វាស​វែង​ខណ្ឌសីមា និង​ការ​បោះបង្គោល​ព្រំដែន​ទៅវិញ​ទេ។

យុទ្ធនាការ​បោះតង់​នៅ​តាម​ខ្សែរ​បន្ទាត់​ព្រំដែន​ពីសំណាក់​យោធា​វៀតណាម​នេះ​កើតឡើង​តាំងពី​ខែមីនា ក្រោម​ហេតុផល​បង្ការ និង​ការពារ​មិន​ឱ្យ​មានការ​រីក​រាលដាល​ជំងឺ​កូ​វីដ១៩។ការ​បោះតង់​នៅ​តាម​បណ្តោយ​ព្រំដែន​កម្ពុជា​-វៀតណាម រួមមាន​ក្នុង​ខេត្តកណ្តាល​ចំនួន៣១កន្លែង និង​ជាប់​ខេត្តតាកែវ​ចំនួន​ជិត១០០កន្លែង ហើយក៏​មាននៅ​តាម​បណ្តា​ខេត្ត​ផ្សេងទៀត​ដែរ។ កន្លងមក ក្រសួង​ការបរទេស​កម្ពុជា និង​អាជ្ញាធរ​ខេត្តកណ្តាល​ជាដើម ធ្លាប់​បាន​ផ្ញើ​លិខិត​និង កំណត់​ទូត​ទៅកាន់​ភាគី​វៀតណាម​ឱ្យ​រុះរើ​តង់​ចេញពី​តំបន់​ដែល​មិន​ទាន​ឯកភាព​គ្នា​នោះ ប៉ុន្តែ​ភាគី​វៀតណាម​នៅតែ​មិនបាន​អនុវត្ត​តាម ទោះបីជា​ស្ថានទូត​របស់​ខ្លួន​ប្រចាំ​កម្ពុជា​បាន​អះអាង​ថា ភាគី​វៀតណាម​បាន​រុះរើ​តង់​ដែល​បោះនៅ​ខេត្តកណ្តាល​ចេញ​អស់​តាំង​មុន​ថ្ងៃទី ១៣ ឧសភា ក្តី។

ជាក់ស្តែង​កាលពី​ថ្ងៃទី២ ខែមិថុនា ក្រសួង​ការបរទេស​កម្ពុជា​បាន​ចេញ​លិខិត​មួយ ដោយ​អះអាង​ថា មន្ត្រី​ជាន់ខ្ពស់​របស់​ខ្លួន​ដែល​មាន​រដ្ឋលេខាធិការ​ក្រសួង គឺ​អ្នកស្រី អ៊ា​ត សោភា បាន​កោះហៅ​ឯកអគ្គ​រដ្ឋទូត​វៀតណាម​ប្រចាំ​កម្ពុជា លោក វ៉ូ ក្វាង​មិញ (Vu Quang Minh​) មក​ពិភាក្សា​គ្នា និង​ស្នើ​ឱ្យ​ភាគី​វៀតណាម​រុះរើ​តង់​ទាំងអស់​ចេញ​ឱ្យ​បាន​ឆាប់។លើស​ពីនេះ កម្ពុជា​ស្នើ​បន្ត​រក្សា​ស្ថានភាព​ដើម​មិន​កែប្រែ​នៅ​តំបន់​បោះតង់​ទាំងនោះ ដើម្បី​ប្រែក្លាយ​តំបន់​ព្រំដែន​ប្រកបដោយ​សន្តិភាព មិត្តភាព សហប្រតិបត្តិ​ការ និង​ការ​អភិវឌ្ឍ ជា​ប្រយោជន៍​រួម​សម្រាប់​ប្រជាជន​ប្រទេស​ទាំងពីរ។

អ្នកឃ្លាំមើល​កិច្ចការ​ព្រំដែន​យល់ឃើញ​ថា ចំណុច​នេះ​បង្ហាញថា​អ្វី​ដែល​ភាគី​វៀតណាម​អះអាង​ថា​បាន​រុះរើ​តង់​ចេញពី​តំបន់​មិនទាន់​ឯកភាព​គ្នា​ក្នុង​ខេត្តកណ្តាល​អស់​មុន​ថ្ងៃទី១៣ ខែឧសភា នោះ​គឺ​គ្រាន់តែ​ជា​ការ​ភូ​តភរ​បស់​វៀតណាម​មក​លើ​កម្ពុជា និង​ជា​ចេតនា​នៃ​ការអនុវត្ត​យុទ្ធសាស្ត្រ​ឈ្លានពាន​កម្ពុជា​តាម​តំបន់​ព្រំដែន​តែប៉ុណ្ណោះ​៕

© 2021, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស