32 C
Phnom Penh

កម្ពុជា​-ឥណ្ឌា សម្រេច​បញ្ជូន​ពលរដ្ឋ​ប្រទេស​ទាំងពីរ​ដែល​ជាប់​ដោយ​ជំងឺ​កូ​វីដ១៩ត្រឡប់​មក​ប្រទេស​រៀងខ្លួន

ដោយ ឌឹ ខេមបូឌា ដេលី

បទវិភាគ

​ថ្នាក់ដឹកនាំ​កម្ពុជា​និង​ឥណ្ឌា បានសម្រេច​សម្រួល​ដល់​ការ​ធ្វើដំណើរ​របស់​ប្រជាពលរដ្ឋ​ទាំងពីរ​ប្រទេស ដែល​ជាប់​ឬខកខាន​ក្នុង​ការ​ត្រឡប់ទៅ​ប្រទេសកំណើត​របស់​ខ្លួន​ដោយសារ​ជំងឺ​កូ​វីដ១៩។សេចក្តី​ប្រកាស​ព័ត៌មាន​របស់ក្រ​សួង​ការបរទេស​កម្ពុជា​នៅ​ថ្ងៃទី១១ ខែមិថុនា​នេះ បានឱ្យ​ដឹង​ថា​ការសម្រេច​នេះ ធ្វើឡើង​បន្ទាប់ពី​មាន​កិច្ច​សន្ទនា​តាម​ខ្សែរ​ទូរស័ព្ទ​រវាង​នាយក​រដ្ឋមន្ត្រី​កម្ពុជា លោក​ហ៊ុន សែន និង​នាយ​រដ្ឋមន្ត្រី​ឥណ្ឌា លោក ណា​រិ​នដ្រា ម៉ូ​ឌី កាលពី​ថ្ងៃម្សិលមិញ។

ក្រសួង​ការបរទេស​បាន​បន្ត​ថា កិច្ច​សន្ទនា​រវាង​ថ្នាក់ដឹកនាំ​ប្រទេស​ទាំងពីរ​បាន​ពិភាក្សា​គ្នា​អំពី​ការ​រួមគ្នា​ប្រយុទ្ធ​ប្រឆាំង​ជំងឺ​កូ​វីដ១៩ ព្រមទាំង​បាន​ពិភាក្សា​ពី​ទំនាក់​ទង​ទ្វេភាគី និង​ក្នុង​តំបន់។ បន្ថែម​ពីនេះ សម្រេចសម្រួល​ការ​ធ្វើដំណើរ​តាម​ជើង​យន្តហោះ​រវាង​ប្រជាជន​ប្រទេស​ទាំងពីរ ដើម្បី​ឱ្យ​ពួក​គេ​បាន​ត្រឡប់ទៅ​ប្រទេស​កំ​ណើ​តរៀង​ៗខ្លួន​វិញ បន្ទាប់ពី​ខកខាន​ដោយសារ​ជំងឺ​កូ​វីដ១៩។

ប្រភព​ដដែល​បន្ត​ថា យន្តហោះ​មួយ​គ្រឿង នឹង​ដឹក​ពលរដ្ឋ និង​និស្សិត​កម្ពុជា​ចំនួន៦០នាក់ ពី​ឥណ្ឌា​មក​កម្ពុជា​វិញ​នៅ​ថ្ងៃទី១២មិថុនា ហើយ​ពលរដ្ឋ​ឥណ្ឌា ដែល​មាន​ចំនួន​សរុប​ជិត៣០០នាក់​(២៨០​) នឹង​ត្រឡប់ទៅ​ស្រុកកំណើត​វិញ​តាម​ជើង​យន្តហោះ​ពីរ​ជើង ដោយ​ជើងហោះហើរ​ទី១នៅ​ព្រឹក​ថ្ងៃទី១១ ខែមិថុនា​នេះ និង​មួយ​ជើង​ទៀត​នៅ​ថ្ងៃទី ១៩ខែមិថុនា។

ជំងឺ​កូ​វីដ១៩ បាន​ធ្វើ​ឱ្យ​ប្រជាជន​កម្ពុជា​ត្រូវ​ជាប់​ឬ ខកខាន​នៅ​ក្រៅប្រទេស​ជាច្រើន​រយ​នាក់ ពិសេស​បញ្ហា​ពលរដ្ឋខ្មែរ​ដែល​កំពុង​ជាប់​នៅ​ប្រទេស​ម៉ាឡេស៊ី ប្រមាណ១៥០នាក់ ហើយ​មាន​ពលរដ្ឋ​មួយចំនួន​កំពុង​ជួប​បញ្ហា​ប្រឈម​ជាច្រើន។ការ​ខកខាន​របស់​ពលរដ្ឋខ្មែរ​នៅ​ម៉ាឡេស៊ី​នោះ ក្រោយពី​លោកនាយក​រដ្ឋមន្ត្រី​ហ៊ុន​សែន បាន​បញ្ជា​ឱ្យ​ផ្អាក​ជើងហោះហើរ​ពី​ម៉ាឡេស៊ី​មក​កម្ពុជា ក្រោម​ហេតុផល​ដើម្បី​បង្ការ​ជំងឺ​កូ​វីដ១៩មិន​ឱ្យ​ឆ្លង​បន្ថែម​ទៀត​នៅ​កម្ពុជា។

យ៉ាងនេះ​ក្តី កាលពី​ថ្ងៃទី ៩មិថុនា ស្ថានទូត​កម្ពុជា​ប្រចាំ​ទីក្រុង​កូឡាឡាំពួរ ប្រទេស​ម៉ាឡេស៊ី បាន​អះអាង​ថា​ក្រុមការងារ​របស់​ខ្លួន​កំពុងធ្វើការ​ជាមួយ Malaysian Airlines ដើម្បី​រៀបចំ​ជើងហោះហើរ​សំរាប់​អ្នក​ខកដំណើរ​កាលពី​ថ្ងៃទី៧ ខែមេសា កន្លងទៅ​ចំនួន១៤៣នាក់ ឱ្យ​បាន​ត្រឡប់​មក​កម្ពុជា​វិញ។

ស្ថានទូត​ដដែល​អះអាង​ថា ប្រសិនបើ​មាន​អ្នកដំណើរ​គ្រប់​ចំនួន​ក្រុមហ៊ុន​អាកាសចរណ៍​ឬ Airlines អាច​ហោះ​បាន​នៅ​ថ្ងៃទី១៦ សប្តាហ៏​ក្រោយ។ក្រៅពី​ពលរដ្ឋ​ដែល​ខកខាន​កាលពីដើម​ខែមេសា ប្រមាណ១៥០នាក់​នេះ ក៏​នៅ​មាន​ពលរដ្ឋខ្មែរ​នៅ​ប្រទេស​ម៉ាឡេស៊ី​ដែល​ជា​ពលករ​ចុះទូក​នេសាទ និង​ពលរដ្ឋ​ដែល​អាជ្ញាធរ​ម៉ាឡេស៊ី​ទើបនឹង​ដោះលែង​ពី​ពន្ធនាការ​ជាង២រយ​នាក់​ទៀត ក៏​កំពុង​រង់ចាំ​ការ​ជួយ​ពី​រដ្ឋាភិបាល​ដើម្បី​បាន​វិលត្រឡប់​មកកាន់​កម្ពុជា​វិញ​ផង​ដែរ​៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស