សមាគមសម្ព័ន្ធសហគមន៍កសិករកម្ពុជា បានហៅចំណាត់ការក្រសួងមហាផ្ទៃដើម្បីអន្តរាគមន៍ទប់ស្កាត់ការនាំចូលបន្លែ-ផ្លែឈើមានសារធាតុគីមីពុលពីបរទេសចូលមកប្រទេសកម្ពុជា គឺជាការផ្តល់ប្រយោជន៍ដល់ពលរដ្ឋ ពិសេសកសិករតូចតាចដែលប្រកបរបរដាំបន្លែ ផ្លែឈើ និងចិញ្ចឹមសត្វជាដើម។
ការលើកឡើងនេះ ក្រោយពេលមានការផ្សព្វផ្សាយលិខិតរបស់ក្រសួងមហាផ្ទៃ ជុំវិញសំណើរទៅអភិបាលខេត្តជាប់ព្រំដែនទាំងអស់ត្រូវពង្រឹងការអនុវត្តច្បាប់និងចាត់វិធានការទប់ស្កាត់រាល់ការនាំចេញចូលបន្លែ ផ្លែឈើដែលមានផ្ទុកសារធាតុគីមីពីបរទេស ពិសេសប្រទេសជិតខាង ដើម្បីធានាដល់អាជីវិតពលរដ្ឋ។លិខិតរបស់ក្រសួងមហាផ្ទៃ ដែលទើបនឹងចែកចាយកាលពីថ្ងៃម្សិល មិញនេះ ធ្វើឡើងបន្ទាប់ពីមានសំណើរពីក្រសួងកសិកម្ម កាលពីខែកុម្ភៈ ដោយស្មើឱ្យមានវិធានការនេះ។
ក្នុងសេចក្តីថ្លែងការណ៍រួមរបស់ខ្លួននៅថ្ងៃនេះ សមាគមសម្ព័ន្ធសហគមន៍កសិករកម្ពុជា បានលើកឡើងថាកិច្ចអន្តរាគមន៍របស់ក្រសួងមហាផ្ទៃដោយបញ្ជាទៅអាជ្ញាធរខេត្តជាប់ព្រំដែនប្រទេសកម្ពុជា ដើម្បីជួយ ទប់ស្កាត់ការនាំចូលបន្លែ-ផ្លែឈើមានសារធាតុគីមីពុលពីបរទេសចូលមកប្រទេសកម្ពុជា គឺជាវិធានការមួយដែលមានសារៈប្រយោជន៍សម្រាប់ពលរដ្ឋកម្ពុជា ពិសេសកសិករខ្នាតតូចនៅតំបន់ជនបទដែលកំពុងប្រកបមុខរបរដាំដុះបន្លែ-ផ្លែឈើ និងការចិញ្ចឹមសត្វសម្រាប់ចិញ្ចឹមជីវិតជាលក្ខណៈគ្រួសារព្រមទាំងការផ្គត់ផ្គងទៅកាន់ទីផ្សារផងដែរ។
សមាគមដដែលសង្ឃឹមថាអជ្ញាធរគ្រប់ច្រកព្រំដែន មានវិធានការយ៉ាងតឹងរឹង និងសហការជាមួយប្រជាពលរដ្ឋមូលដ្ឋានធានាផលប្រយោជន៍ ពលរដ្ឋ ដោយអាចកាត់បន្ថយសាធាតុគីមី និងសារធាតុជាតិពុលទៅលើប្រជាពលរដ្ឋដែលតែងតែទទួលទានអាហារទាំងនោះ ធ្វើឲ្យប៉ះពាល់ដល់សុខភាពរបស់ពួកគាត់។
លើសពីនេះ កាត់បន្ថយការចំណាយថវិការបស់ប្រជាពលរដ្ឋក្នុងការព្យាបាលជំងឺ ដែលបបណ្ដាលមកពីការបរិភោគបន្លែ-ផ្លែឈើរដែលមានផ្ទុកសាធារតុគីមីពុលទាំងនោះជាដើម។សមាគមដដែលបានផ្តល់ជាអនុសាសន៍ថាដើម្បីឱ្យការងារនេះមានប្រសិទ្ធភាពក្រសួងមហាផ្ទៃ និងរដ្ឋាភិបាលត្រូវបង្កើតឲ្យមានប្រព័ន្ធរាយការណ៍បន្ទាន់តាមទូរស័ព្ទ (Hot line) ចំពោះមន្រ្តី ឬអាជ្ញាធរណាដែលបានឃុបឃិតប្រព្រឹត្តអំពើពុករលួយបើកដៃឲ្យមានការនាំចូលបន្លែ ផ្លែឈើដែលមានផ្ទុកសារធាតុគីមីពុលពីប្រទេសជិតខាង។
បន្ថែមពីនេះ រដ្ឋាភិបាលត្រូវរៀបចំប្រព័ន្ធធារាសាស្ត្រ និងប្រព័ន្ធស្រោចស្រពកសិកម្មឲ្យបានគ្រប់គ្រាន់សម្រាប់កសិករជាអ្នកចិញ្ចឹមសត្វ ដាំដុះ បន្លែ ផ្លែឈើ ដើម្បីកាត់បន្ថយការប្រើប្រាស់ផលិតផលកសិកម្មមានជាតិគីមីពីបរទេស។
ជាងនេះទៅទៀត រដ្ឋាភិបាលត្រូវតែមានវិធានការក្នុងការឧបត្ថម្ភទុន និងកម្ចីសម្រាប់កសិករខ្នាតតូច និងមធ្យមដើម្បីប្រកបមុខរបរ ហើយគាំទ្របច្ចេកទេសក្នុងការបណ្ដុះបណ្ដាលកសាងសមត្ថភាព ការដាំដុះ ចិញ្ចឹម ការវេចខ្ចប់ និងប្រព័ន្ធត្រួតពិនិត្យគុណភាព ការស្វែងរកពូជដែលធនអាកាសធាតុ និងបានផលខ្ពស់ ព្រមទាំងគិតគូរទីផ្សារក្នុងស្រុកនិងក្រៅស្រុកឱ្យបានទូលំទូលាយផងដែរ៕