40.2 C
Phnom Penh

ប្រធាន​ស្តីទី​មន្ទីរ​បរិស្ថាន​ខេត្តព្រះវិហារ​ត្រូវ​បាន​អង្គភាព​ប្រឆាំង​អំពើពុករលួយ កោះហៅ​ពាក់ព័ន្ធ​អំពើពុករលួយ

ដោយ ឌឹ ខេមបូឌា ដេលី

បទវិភាគ

ប្រធាន​ស្តីទី​មន្ទីរ​បរិស្ថាន​ខេត្តព្រះវិហារ លោក សុខ ច័ន្ទ​សុ​ជាតិ ត្រូវ​បាន​អង្គភាព​ប្រឆាំង​អំពើពុករលួយ ឬហៅ​ថា ACU កោះហៅ​ឱ្យ​ចូលខ្លួន​បំភ្លឺ​ករណី​អំពើពុករលួយ​ជា​ប្រព័ន្ធ​ជុំវិញ​បទល្មើស​ព្រៃឈើ​ក្នុង​ខេត្ត​នេះ។

ក្នុង​លិខិត​មួយ​ចុះ​ថ្ងៃទី៨ ខែមិថុនា ឆ្នាំ២០២០ ដែលThe Cambodia Daily ទើប​ទទួល​បាន​នៅ​ថ្ងៃនេះ​បានឱ្យ​ដឹង​ថា ប្រធាន​ស្តីទី​មន្ទីរ បរិស្ថាន​ខេត្តព្រះវិហារ​លោក សុខ ច័ន្ទ​សុ​ជាតិ ត្រូវ​បាន​រក​ឃើញថា​ពាក់ព័ន្ធ​អំពើពុករលួយ​ជា​ប្រព័ន្ធ​ក្នុង​វិស័យ​បទល្មើស​ព្រៃឈើ រវាង​មន្ត្រី​ក្រោមបង្គាប់​របស់​លោក​ផង និង​បើកដៃ​ឱ្យ​ឈ្មួញ​កាប់​បំផ្លាញ​ព្រៃឈើ​នៅក្នុង​តំបន់​ព្រៃ​ឡង់​ផង​ដែរ។កាលពី​ថ្ងៃទី២៨ ខែមេសា ACU ទទួល​បា​នប​ណ្តឹង​មួយ ដោយ​ចោទប្រកាន់​ថា មន្ត្រី​មន្ទីរ​បរិស្ថាន​ខេត្តព្រះវិហារ លោក សោម រដ្ឋា និង​សហគមន៍​ព្រៃឈើ បាន​ឃុបឃិត​គ្នា​ជា​ប្រព័ន្ធ​ជាមួយ​ឈ្មួញ​ឈើ​ខុសច្បាប់ និង​អ្នក​ឈូស​ឆាយដី​ព្រៃ​ខុសច្បាប់​ទៀតផង។

ប្រភព​ដដែល បញ្ជាក់​ថា មន្ត្រី​បរិស្ថាន​ខេត្តព្រះវិហារ​លោក សោម រដ្ឋា និង​សហគមន៍​ព្រៃឈើ​បាន​ឃុបឃិត​គ្នា​ជា​ប្រព័ន្ធ ទារប្រាក់​ពី​ឈ្មួញ​ដឹកឈើ​ចេញពី​ព្រៃ​ឡង់ ដោយ​ក្នុង​មួយ​គោយន្ត​ត្រូវ​បង់ថ្លៃ​ឱ្យ​ពួក​គេ​ពី ៨ម៉ឺន​រៀល ដល់ ១០ម៉ឺន​រៀល។លើស​ពីនេះ ពួក​គេ​បាន​សហការ​គ្នា​យ៉ាង​ល្អជា​មួយ​ឈ្មួញ​ឈើ​ធំ​ម្នាក់​ឈ្មោះ ឡេង ដែល​រស់នៅ​ភូមិ​ពើក ឃុំ​ពុទ្រា ស្រុក​ជ័យសែន ដើម្បី​នាំ​ឈើ​ទៅ​លក់​ឱ្យ​ឈ្មួញ​រូប​នេះ។លិខិត​របស់ ACU បន្ថែម​ថា ប្រសិបើ​គោយន្ត​ណា​មិនមែន​ជា​អ្នក​ដឹកឈើ​លក់​ឱ្យ​ឈ្មួញ​ឈើ​ឈ្មោះ ឡេង នោះ​ទេ គឺ​មន្ត្រី​បរិស្ថាន​ចាប់​យក​ឬមិន​ឱ្យ​ដឹក​ចេញពី​ភូមិ​ឡើយ ដោយ​ទារ​ឱ្យ​បង់​ផាកពិន័យ១លាន​រៀល ទោះបីជា​គោយន្ត​ដឹកឈើ​នោះ បាន​បង់ប្រាក់​ជូន​មន្ត្រី​ពេល​ចេញពី​ព្រៃ​រួចហើយ​ក៏ដោយ។

ជាង​នេះ​ទៀត មាន​បុគ្គល​ឈ្មោះ ឡេង និង​ឈ្មោះ ឌី កំពុង​ត្រូវរ៉ូវ​គ្នា ដោយ​បើកដៃ​ឱ្យ​ក្រុម​គោយន្ត​ចូល​ទន្ទ្រាន​បំផ្លិច​បំផ្លាញ​ព្រៃ​ឡង់​ដោយសេរី ហើយ​គោយន្ត​ទាំងនោះ បាន​ចូល​ទៅ​អារឈើ​ក្នុង​មួយថ្ងៃ​ពី ៣ ទៅ ៤ជើង ហើយ​ឈើ​ដែល​កាប់​ចេញពី​ព្រៃ​ឡង់ គឺ​មាន​ក្លោង​ឈ្មោះ ឌី ឈ្មោះ រឿន ឈ្មោះ ម៉េ​ត និង​ឈ្មោះ យាយ លែន ជា​អ្នកដើរ​ប្រមូល​ទិញ​ឈើ​ពី​អ្នកស្រុក​ដែល​ចុះទៅ​អារឈើ​ក្នុង​ព្រៃ​ជុំវិញ​ភូមិ​ទ្រា និង​ភូមិ​ពើក ដោយ​ពួក​គេ​បាន​សហការ​ជាមួយ​មន្ត្រី​បរិស្ថាន សហគមន៍​ព្រៃឈើ និង​មន្ត្រី​ប៉ុសិ៍្តនគរបាល​នៅ​ឃុំ​ទ្រា​ទៀតផង។

ACU លើកឡើង​ទៀត​ថា ពាក់ព័ន្ធ​បទល្មើស​ព្រៃឈើ​នេះ ក៏​មាន​បុគ្គល​ឈ្មោះ ឆាយ គឹ​មហូវ ដែល​មាន​ប្តី​ជាម​ន្ត្រី​ផ្នែក​រដ្ឋបាល​ព្រៃឈើ មាន​ឡាន​សាំ​យ៉ុង​ចំនួន ២គ្រឿង និង​ឡាន​ធំ​ប្រភេទ​កង់១០ ចំនួន ២គ្រឿង​ទៀត កំពុង​ប្រតិបត្តិ​ការ​ជួញដូរ​ឈើ​ខុសច្បាប់​នៅក្នុង​តំបន់​ព្រៃ​ឡង់​ផង​ដែរ។នេះ​មិនមែន​ជា​រឿង​ថ្មី​ទេ សម្រាប់​បញ្ហា​បទល្មើស​ព្រៃឈើ​នៅ​តំបន់​ព្រៃ​ឡង់ និង​នៅ​តំបន់​ព្រៃ​សហគមន៍​ផ្សេងទៀត ត្រូវ​បាន​សកម្មជន​ព្រៃឈើ​ធ្លាប់​រាយការណ៍​ថា​បាន​កើតឡើង​ជា​ប្រព័ន្ធ ពោល​គឺ​មានការ​ឃុបឃិត​គ្នា​តាំងពី​ថ្នាក់​ជាតិ​រហូតដល់​ថ្នាក់​មូលដ្ឋាន កងកម្លាំង​ប្រដាប់​អាវុធ មន្ត្រី​ជំនាញ និង​អាជ្ញាធរ​ជាដើម។

បញ្ហា​អំពើពុករលួយ​ជា​ប្រព័ន្ធ​នេះ ក្រុម​អ្នក​ស្រលាញ់​បរិស្ថាន​យល់ឃើញ​ថា​ជា​មូលហេតុ​ចម្បង​ដែល​ធ្វើ​ព្រៃឈើ​នៅ​តំបន់​ព្រៃ​ឡង់ និង​តំបន់​ផ្សេងទៀត​ឈាន​ទៅ​រក​ក្តី​វិនាស។ព្រៃ​ឡង់​មានផ្ទៃ​ដី​ជាង៤៣ម៉ឺន​ហិ​កតា គ្រប​ដណ្តប់​ទៅលើ​ខេត្ត​ចំនួន៤រួមមាន​ខេត្តព្រះវិហារ ខេត្តកំពង់ធំ ខេត្តក្រចេះ និង​ខេត្ត​ស្ទឹងត្រែង។

កាលពី​ខែឧសភា ឆ្នាំ២០១៦ រាជរដ្ឋាភិបាល​សម្រេច​ជា​ផ្លូវការ​ដាក់​តំបន់​នេះ​ជា​តំបន់​អភិរក្ស​សត្វព្រៃ «ព្រៃ​ឡង់» ហើយ​ប្រគល់​ភារកិច្ច​នេះ​ទៅ​ក្រសួងបរិស្ថាន ជា​អ្នកគ្រប់គ្រង ដោយ​សហការ​ជាមួយ​អាជ្ញាធរ​ពាក់ព័ន្ធ​ផ្សេងទៀត។រយៈពេល​ប្រមាណ៤ឆ្នាំក្រោយ​ការ​ដាក់​តំបន់​នេះ​ចូល​ជា​តំបន់​អភិរក្ស​បទល្មើស​ព្រៃឈើ សត្វព្រៃ ការ​រាន​ដី​ធ្វើចម្ការ​នៅតែ​បន្ត​កើតមាន​ឥតស្រាក​ស្រាន្ត​ដែល​ធ្វើ​ឱ្យ​ព្រៃឈើ​តំបន់​ជម្រក​សត្វព្រៃ​នេះ​កាន់តែ​វិនាស ខណៈ​វិធានការ​របស់​មន្ត្រី​រដ្ឋាភិបាល​ចំពោះ​សកម្មភាព​ចូលរួម​ការពារ​ព្រៃឈើ​តំបន់​ព្រៃ​ឡង់​ទៅលើ​ក្រុម​សហគមន៍ និង​អង្គការ​សង្គម​ស៊ីវិល​កាន់តែ​រិត​ត្បិត​ខ្លាំង។

យោង​តាម​អង្គការ​ឃ្លាំមើល​ព្រៃឈើ​ពិភពលោក និង​ទិន្នន័យ​ពីសា​កល​វិទ្យាល័យ​ម៉ារី​លែន កាលពី​ពេល​ថ្មី​ៗនេះ បាន​បង្ហាញ​រូបភាព​ផ្កាយរណប​ថ្មី​ស្តី​ពី​វិនាសកម្ម​ព្រៃឈើ​នៅ​តំបន់​ព្រៃ​ឡង់​ក្នុង​ប្រទេស​កម្ពុជា ដោយ​គម្រប់​ព្រៃឈើ​តំបន់​ព្រៃ​ឡង់​ជាង ២៤៤ ហិ​កតា​ត្រូវ​បាន​គេ​កាប់​បំផ្លាញ​នៅ​តំបន់​ព្រៃ​ឡង់​ក្នុង​កំឡុង ខែមករា​ឆ្នាំ២០២០។ប្រភព​ដដែល ឱ្យ​ដឹង​ថា​រូបភាព​ពី​ផ្កាយរណប​នោះ​បង្ហាញ​ពី​តំបន់​ដែល​ទំនងជា​ធ្លាប់​មានការ​បាត់បង់​គម្រប់​ព្រៃឈើ​តំបន់​ព្រៃ​ឡង់​នា​ពេល​ថ្មី​ៗនេះ ប្រហែលជា ៣ពាន់ ២៦១ កន្លែង ដែល​បាន​កើតឡើង​ក្នុងរយៈពេល ៤ សប្តាហ៍​ដំបូង​តែ​ប៉ុ​ណ្ណះ​នៅ​ឆ្នាំ ២០២០​៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស