33 C
Phnom Penh

ឧបទ្វីប​កូរ៉េ​ធ្លាក់​ក្នុង​ស្ថានភាព​តានតឹង​ជាថ្មី​ម្ដងទៀត​ខណៈ​គី​មជុង​អ៊ុន បន្ដ​បាត់ខ្លួន ប្អូនស្រី​ក្ដាប់​សិទ្ធិ​យោធា

ដោយ ឌឹ ខេមបូឌា ដេលី

បទវិភាគ

​រយៈពេល​មួយ​សប្ដាហ៍​ចុងក្រោយ​សកម្មភាព​រំកិល​ទ័ព និង​សព្វាវុធ​ទៅកាន់​ព្រំដែន​រួម​នៃ​ប្រទេស​កូរ៉េខាងជើង និង​កូរ៉េ​ខាងត្បូង បាន​ក្លាយទៅជា​រឿងក្ដី​ព្រួយបារម្ភ​ពី​ការ​ផ្ទុះ​សង្គ្រាម​ដែល​ងាយ​នឹង​កើតមាន។ដោយសារ​សង្គ្រាមស៊ីវិល​រយៈពេល​បួន​ឆ្នាំ​ដែល​ទីបំផុត​បាន​ហែក​ប្រទេស​ជា​ពីរ​គឺ​ខាងត្បូង និង​ខាងជើង​មកទល់​សព្វថ្ងៃ​នេះ។

ខាងត្បូង​ប្រកាន់យក​ការដឹកនាំ​នៃ របប ប្រជាធិបតេយ្យ​សេរីនិយម។ រី​ឯខាង​ជើង​ប្រកាន់យក​ការដឹកនាំ រប​បកុម្មុយ​នី​ស្ដ​និយម។ស្ថានភាព​តានតឹង​ដែល​បង្ក​ឱ្យ​ឡើង ដំបូង​ត្រូវ​បាន​គេ​មើលឃើញ​ថា​ដោយសារតែ​ពលរដ្ឋ​កូរ៉េខាងជើង​ដែល​រត់​ទៅ​ជ្រកកោន នឹង​កូរ៉េ​ខាងត្បូង​បាន​បង្ហោះ​សារ​ឃោសនា វាយប្រហារ​មេដឹកនាំ​កូរ៉េខាងជើង។ដោយ​ព្រមាន​មិន​ស្ដាប់​ពីសំណាក់​ប្អូនស្រី​របស់​លោ​កគី​មជុង​អ៊ុន គឺ​អ្នកស្រី គីម យូ​ចុង ក៏បាន​បញ្ជា​ឱ្យ​បិទ​ការិយាល័យ​ទំនាក់ទំនង​រួម​នៅ​តាម​ព្រំដែន​រួម​នៃ​ប្រទេស​ទាំងពីរ​នៃ​តំបន់​យុទ្ធ​សន្ដិ​ភាព។

មិនបាន​ប៉ុន្មាន​ថ្ងៃ​ផង កូរ៉េខាងជើង​បាន​គម្រាម​កាន់តែ​ខ្លាំង​ឡើង​ៗហើយ​ស្រាប់ តែ​បង្ក​ឱ្យ​មាន​ភាព​តានតឹង​មួយរំពេច។ទីភ្នាក់ងារ​សារព័ត៌​មា​នយ៉ុង​ហាប់​របស់​កូរ៉េ​ខាងត្បូង​បាន​ចុះផ្សាយ​ថា​កាលពី​ថ្ងៃទី១៥ ខែមិថុនា​ថា រដ្ឋាភិបាល​ក្រុង​សេអ៊ូល​បាន​ដាក់​ពង្រាយ​យន្ដ​ហោះ​ចម្បាំង F-35​-A នៅ​តាម​ព្រំដែន ហើយ​មួយថ្ងៃ​ក្រោយមក​រដ្ឋាភិបាល​ក្រុង​ព្យុងយ៉ាង​បាន​បំផ្ទុះ​គ្រាប់បែក​បំផ្លាញ​ការិយាល័យ​ទំនាក់ទំនង​រវាង​ប្រទេស​ទាំងពីរ​ដែល​ស្ថាបនា​ឡើង​នៅ​ទីប្រជុំជន Kaesong គឺ​នៅ​រសៀល​ថ្ងៃអង្គារ​ទី១៦មិថុនា​នេះ​ដែល​ជា​សញ្ញា​នៃ​ការ​កាត់ផ្ដាច់​ទំនាក់ទំនង​ទាំងស្រុង​ជាមួយនឹង​កូរ៉េ​ខាងត្បូង។

ទីភ្នាក់ងារ​សារព័ត៌មាន​កូរ៉េខាងជើងKCNAបាន​ចុះផ្សាយ​នៅ​ថ្ងៃទី1៦មិថុនា​ថា​ការិយាល័យ​ទំនាក់ទំនង​យុទ្ធ​សន្ដិ​ភាព​នេះ​ត្រូវ​បាន​កម្ទេច​ទាំងស្រុង​អស់ហើយ ដោយមាន​ផែនការ​សង់​បន្ទាយ​កងទ័ព​កូរ៉េខាងជើង​ឡើងវិញ។ ការិយាល័យ​នេះ​ស្ថិត​ក្នុង​តំបន់​គ្មាន​កងទ័ព​ដែលគេ​ហៅថា DMZត្រូវ​បាន​បង្កើត​ឡើង​ដើម្បី​ធ្វើ​ទំនាក់ទំនង​បង្រួបបង្រួម​ជាតិ។ស្រប​ពេលនេះ​សេចក្ដីរាយការណ៍​ពី​កូរ៉េ​ខាងត្បូង​បានឱ្យ​ដឹង​ថា​ក្រុម​ប្រឹ​ក្សា​សន្ដិ​សុខ​ជាតិ​របស់​ប្រទេស​នេះ​បាន​កោះ​ប្រជុំ​សមាជិក​របស់​ខ្លួន​ជាបន្ទាន់​ដើម្បី​ពិនិត្យមើល​ស្ថានការណ៍​ចុងក្រោយ​ដែល​កូរ៉េខាងជើង​ឈាន​ដល់​ការបំផ្លាញ​និមិត្ត​រូប​សន្ដិ​ភាព​រវាង​ប្រទេស​ទាំងពីរ។

អ្នកនាំពាក្យ​សម្រាប់​ការិយាល័យ​ប្រធានាធិបតី​បាន​ប្រាប់​បណ្ដាញ​ផ្សាយ​ព័ត៌មាន NBC News ថា ក្រសួងការពារជាតិ​កូរ៉េ​ខាងត្បូង​បាន​កំពុង​ពិនិត្យមើល និង​តាមដាន​យ៉ាង​ប្រុងប្រយ័ត្ន​ចំពោះ​ចលនា​កងទ័ព​របស់​កូរ៉េខាងជើង​ដែល​កំពុង​ចល័ត​មកកាន់​ព្រំដែន។ប៉ុន្ដែ​អ្នកនាំពាក្យ​នេះ​បាន​បញ្ជាក់​ថា​សម្រាប់​កូរ៉េ​ខាងត្បូង​នៅតែ​ព្យាយាម​គ្រប់គ្រង​ស្ថានការណ៍​ដោយ​ស្ថិត​ក្នុង​ស្ថានភាព​មិន​បង្កជម្លោះ​អ្វី​ឡើយ​លើកឡើង​តែ​កូរ៉េខាងជើង​ប៉ុណ្ណោះ​ហើយ​ព្រមាន​ថា​កងទ័ព​កូរ៉េ​ខាងត្បូង​អាច​នឹង​ឆ្លើយ​តប​ភ្លាម​ៗដោយ​ខ្លាំងក្លា​ប្រសិនបើ​ការ​បង្ក សង្គ្រាម​ណាមួយ​កើត​ចេញពី​កូរ៉េខាងជើង។

ប៉ុន្ដែ​មុន​ពេល​ដែល​កូរ៉េខាងជើង​បំផ្ទុះ​កម្ទេច​ចោល​ការិយាល័យ​ទំនាក់ទំនង​នៅ​តាម​ព្រំដែន​នៃ​ប្រទេស​ទាំងពីរ គឺ​មាន​សេចក្ដីរាយការណ៍​មក​ថា កងទ័ព​កូរ៉េខាងជើង​បាន​រំកិល​ចូល​ទៅ​តំបន់​គ្មាន​យោធា​ដែល​នាំ​ឱ្យ​កូរ៉េ​ខាងត្បូង​បង្កើន​ចលនា​កង​ទ័ព​ភ្លាម​ៗតាម​ព្រំដែន។

ជា​ការ​កត់សម្គាល់​មុននឹង​ស្ថានភាព​ធ្លាក់​ដល់កម្រិត​នេះ​គឺ​អ្នកស្រី គីម យូ​ចុង ដែល​តំណាង​ឱ្យ​លោ​កគី​មជុង​អ៊ុន​បាន​បើក​កិច្ចប្រជុំ​ជាមួយ​កម្មាភិបាល​បក្ស​ពលករ ហើយ​ភ្លាម​នោះ​អ្នកស្រី បាន​ធ្វើ​សេចក្ដីសម្រេច​ដោយ​ព្រមាន​ធ្ងន់​ៗទៅលើ​កូរ៉េ​ខាងត្បូង​ក្រោម​ពាក្យ​ថា​កូរ៉េ​ខាងត្បូង​ពេលនេះ​បាន​ក្លាយជា​សត្រូវ នឹង​កូរ៉េខាងជើង​ហើយ។

ប៉ុន្ដែ​អ្វី​ដែល​នាំ​ឱ្យ​អ្នកសង្កេតការណ៍​ងឿងឆ្ងល់​គឺ​បុរស​ខ្លាំង​គី​មជុង​អ៊ុន​បែរជា​មិន​ចេញមុខ​ដោយ​ទុក​ឱ្យ​ប្អូនស្រី​ក្ដោបក្ដាប់​កងទ័ព​ជំនួស​វិញ។មានការ​ព្រមាន​ថា​ប្រទេស​កូរ៉េខាងជើង​ដែល​មាន​អាវុធ​នុយក្លេអ៊ែរ​ជាង៣០គ្រាប់​អាច​នឹង​ធ្វើ​ឱ្យ​ឧបទ្វីប​កូរ៉េ​រលាយ​ប្រសិនបើ​អាវុធ​ប្រល័យលោក​នេះ​ត្រូវ​បាន​ទាញ​ទម្លាក់​ក្នុង​សង្គ្រាម​ឧបទ្វីប​ជាថ្មី​ម្ដងទៀត។

តែ​នៅជា​មួយ​គ្នា​នេះ​ទាំង​រដ្ឋាភិបាល​ទីក្រុង​ប៉េកាំង និង​ក្រុង​ម៉ូស្គូ​ដែល​ជាម​ហា​មិត្ត​របស់​ក្រុង​ព្យុងយ៉ាង​បាន​ចេញ​សេចក្ដីថ្លែង​ការណ៍​ដោយ​អំពាវនាវ​ឱ្យ​កូរ៉េ​ទាំងពីរ​ព្យាយាម​ឈរ​លើ​គោលការណ៍​អត់ធ្មត់​បំផុត ។ចំណែក​ប្រទេស​ជប៉ុន ដែល​កូរ៉េខាងជើង​តែងតែ​គម្រាម​កំហែង គឺ​ប្រទេស​នេះ​កំ​ពូ​ងស្ថិត​ក្នុង​សភាព​ស្ងប់ស្ងាត់ ។

យ៉ាងណា​កងទ័ព​សហរដ្ឋអាមេរិក​នៅ​លើទឹក​ដី​កូរ៉េ​ខាងត្បូង​មាន ជាង៣ម៉ឺន​នាក់ ក៏​នឹងអាច​ក្លាយជា​កម្លាំងប្រដាប់អាវុធ​មួយ​នៅ​ពីក្រោយ​កងទ័ព​កូរ៉េ​ខាងត្បូង ហើយ​នៅ​លើទឹក​ដី​ប្រទេស​ជប៉ុន​ជាង​បួន​ម៉ឺន​នាក់​ក៏​ត្រូវ​បាន​រាយការណ៍​មក​ថា​ក៏បាន​ត្រៀម​ដើម្បី​ជួយ​កងទ័ព​កូរ៉េ​ខាងត្បូង​ប្រសិនបើ​សង្គ្រាម​ឧបទ្វីប​កូរ៉េ​ផ្ទុះឡើង​នោះ​៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស