29 C
Phnom Penh

អង្គការHuman Right Watch ជំរុញ​ឱ្យ​រដ្ឋាភិបាល​លោក​ហ៊ុន សែន បញ្ឈប់​ការ​ធ្វើទុក្ខ​បុកម្នេញ​លើ​ក្រុម​គណបក្ស​ប្រឆាំង​

ដោយ ឌឹ ខេមបូឌា ដេលី

បទវិភាគ

​អង្គការ​ឃ្លាំមើល​សិទ្ធិមនុស្ស​អន្តរជាតិ Human Right Watch បាន​ទាមទារ​ឱ្យ​រដ្ឋាភិបាល​លោក​ហ៊ុន សែន បញ្ឈប់​ការ​បង្ក្រាប​លើ​ក្រុម​អ្នកប្រឆាំង ដែល​រដ្ឋាភិបាល​កម្ពុជា បាន​អនុវត្ត​ជាថ្មី ចាប់តាំងពី​ការ​ផ្ទុះឡើង​នូវ​ជំងឺ​កូ​វីដ​-១៩មក។

ក្នុង​សេចក្តី​ថ្លែងការណ៍​របស់​ខ្លួន​កាលពី​ថ្ងៃម្សិលមិញ Human Right Watch បាន​លើកឡើង​ថា ក្នុង​ស្ថានភាព​វិបត្តិ​កូ​វីដ១៩ រដ្ឋាភិបាល​គប្បី​បញ្ចប់​ការ​បង្ក្រាប​លើ​ក្រុមប្រឆាំង និង​ត្រូវ​ដោះលែង​ពួក​គេ​ឱ្យ​មាន​សេរីភាព​ផង​ដែរ។Human Right Watch បានឱ្យ​ដឹង​ថា ចាប់ពី​ខែមករា​ដល់​ខែមិថុនា​ឆ្នាំ ២០២០ អាជ្ញាធរ​កម្ពុជា​បាន​ឃុំខ្លួន​មនុស្ស​ចំនួន១៥ នាក់​ដោយ​ចោទប្រកាន់​បែប​ប្រឌិត​ពាក់ព័ន្ធ​រឿង​នយោបាយ។ប្រភព​ដដែល​ឱ្យ​ដឹង​ថា​មនុស្ស ៨០នាក់​ផ្សេងទៀត​ត្រូវ​បាន​ដោះលែង​នៅ​ក្រៅ​ឃុំ​ប៉ុន្តែ​ពួក​គេ ប្រឈមមុខនឹង​ការ​ចាប់ខ្លួន​ម្តង​ទៀត​នៅពេល​ណាមួយ។

បន្ថែម​ពីនេះ​រដ្ឋាភិបាល​គួរតែ​ដោះលែង​អ្នកជាប់ឃុំ ៣២ នាក់​និង​អ្នកជាប់ឃុំ​ជា​បណ្តោះអាសន្ន​ដែល​ជាប់ចោទ​ពាក់ព័ន្ធ​បញ្ហា​នយោបាយ ដោយ​ក្នុង​នោះ​មាន​សមាជិក​គណបក្ស​សង្គ្រោះ​ជាតិ​ចំនួន២៣ នាក់​ដែល​ជា​មនុស្ស​ជាប់​បម្រាម​មិន​ឱ្យធ្វើ​នយោបាយ​រយៈពេល៥ឆ្នាំ ក្រោយពេល​គណបក្ស​ប្រឆាំង​មួយ​នេះ​ត្រូវ​បាន​តុលាការ​លោក​ហ៊ុន សែន រំលាយ​កាលពី​ចុងឆ្នាំ២០១៧។

Human Right Watch លើកឡើង​ទៀត​ថា ម្ចាស់​ជំនួយ​និង​សហគមន៍​អន្តរជាតិ​គួរតែ​អំពាវនាវ​ជា​សាធារណៈ​ឱ្យ​លោកនាយក​រដ្ឋមន្រ្តី​ហ៊ុន សែន ដោះលែង​អ្នកទោស​នយោបាយ​និង​អ្នកជាប់ឃុំ​ទាំងអស់។នាយករង​អង្គការ Human Right Watch ប្រចាំ​តំបន់​អាស៊ី លោក Phil Robertson មានប្រសាសន៍​ថា​“ រដ្ឋាភិបាល​កម្ពុជា​គួរតែ​បញ្ឈប់​ការប្រើ​ប្រាស់​វិបត្តិ​កូ​វីដ១៩ ដើម្បី​ជា​ឱកាស បង្ក្រាប​លើ​ក្រុមប្រឆាំង​បន្ត​ទៀត ។

បន្ថែម​ពីនេះ រដ្ឋាភិបាល​លោក​ហ៊ុន សែន មិន​គួរ​ប្រើការ​ព្រួយបារម្ភ​ពី​ជំងឺ​នេះ ដើម្បី​រំលោភសិទ្ធិ​មនុស្ស​នោះ​ឡើយ​” ។ យ៉ាងនេះ​ក្តី កាលពី​ថ្ងៃទី១ ខែមិថុនា​លោក ហ៊ុន សែន បាន​ព្រមាន​ទៅ​ក្រុមប្រឆាំង​ទាំង​នៅ​ក្រៅប្រទេស​និង​ក្នុង​ប្រទេស ដោយ​ថា​លោក​នឹង​កម្ទេច​អ្នក​នៅក្នុង​ប្រទេស​បន្ថែម​ទៀត តាមរយៈ​ការប្រើ​យុទ្ធសាស្ត្រ​កាត់​ក្បាល បំបែក​ដងខ្លួន​ក្រុម​នេះ​ឱ្យ​អស់ ប្រសិនបើ​ពួក​គេ​ហ៊ាន​យក​ស្ថានភាព​ជំងឺ​កូ​វីដ១៩ ដើម្បី​ផ្តួល​រំលំ​រដ្ឋាភិបាល​របស់​លោក។

ដំណាលគ្នា​នឹង​សារ​ព្រមាន​នេះ សមត្ថកិច្ច​របស់​លោក​បាន​ចាប់ខ្លួន​អតីត​សមាជិក​ក្រុមប្រឹក្សា​រាជធានី​ខេត្ត​គណបក្ស​សង្រ្គោះ​ជាតិ៤នាក់ បន្ថែម​ទៀត រួមមាន​អតី​សមាជិក​ក្រុមប្រឹក្សា​រាជធានី​ភ្នំពេញ មក​ពី​គណបក្ស​សង្គ្រោះ​ជាតិ លោក កាក់ កុម្ភា​រៈ ។

អតីត​សមាជិក​ក្រុមប្រឹក្សា​ខេត្តសៀមរាប លោក ពៀប ម៉ា​ប់ អតីត​សមាជិក​ក្រុមប្រឹក្សា​ខេត្តកំពង់ធំ លោក ស៊ុន ធន់ និង អតីតប្រធាន​ប្រតិបត្តិ​គណបក្ស​សង្គ្រោះ​ជាតិ​ខណ្ឌ​ពោធិ៍សែនជ័យ លោក ហេង ចន្ទ​សុធី។​ពួក​គេ​ត្រូវ​បាន​សមត្ថកិច្ច​ចាប់ខ្លួន ហើយ​តុលាការ​សម្រេច​ឃុំខ្លួន​ជាបន្តបន្ទាប់ ក្រោម​បទ​ចោទ​ប្រហាក់​ប្រហែលគ្នា ដូចជា​រួមគំនិតក្បត់ និង​បទ​ញុះញង់​ឱ្យ​ប្រព្រឹត្ត​បទឧក្រិដ្ឋ​ជាអាទិ៍ និង​ញុះញង់​មិន​ឱ្យ​កងទ័ព​ស្តាប់​បញ្ជា ដែល​ជា​បទល្មើស​ចាស់​កើតឡើង​តាំងពី​ឆ្នាំ២០១៨ និង២០១៩។

លោក Phil Robertson ជំរុញ​ឱ្យ​សហ​គម​ន៍​អ៊ឺ​រ៉ុ​បនិ​ងរ​ដ្ឋ​ជាស​មា​ជិ​ករបស់​ខ្លួន គួរតែ​មាន​វិធានការ​ជាក់លាក់​ណាមួយ​បន្ថែម​ទៀត ចំពោះ​រដ្ឋាភិបាល​កម្ពុជា ដែល​បាន​បន្ត​បង្ក្រាប​លើ​សំឡេង​ប្រឆាំង​ឥតស្រាក​ស្រាន្ត​ជាថ្មី​ទៀត​នេះ​៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស