31 C
Phnom Penh

ពលរដ្ឋ​រិះគន់ លោក សេង សុខ​ណា​ក់ អនុប្រធាន​មន្ទីរ​សុរិយោដី​ខេត្ត​ព្រះសីហនុ​ថា​អសកម្ម​ក្នុង​ការងារ ដោយ​ផ្អឹប​ទុក​ឯកសារ​កាត់ឈ្មោះ ឬផ្ទេរ​កម្មសិទ្ធិ​ដីធ្លី​បន្លាយពេល​រាប់​ខែ​ឆ្នាំ

ដោយ ឌឹ ខេមបូឌា ដេលី

បទវិភាគ

ពលរដ្ឋ និង​ក្រុមហ៊ុន​អចលនទ្រព្យ​ភាគច្រើន នៅ​ខេត្ត​ព្រះសីហនុ បាន​រអ៊ូរទាំ និង​រិះគន់​ចំពោះ​សកម្មភាព​អនុវត្ត​ការងារ របស់​មន្ត្រី​ជំនាញ​មួយចំនួន​ដែល​កំពុង​បំរើ​ការងារ​នៅក្នុង​មន្ទីរ​រៀបចំ​ដែនដី នគរ​រូប​នី​យក​ម្ម សំណង់ និង​សុរិយោដី​ខេត្ត​ព្រះសីហនុ ថា​មានការ​យឺតយ៉ាវ ឬបង្កក​ផ្អឹប​ទុក​ឯកសារ​កាត់ឈ្មោះ ឬផ្ទេរ​កម្មសិទ្ធិ​ដីធ្លី មាន​រយៈពេល​យូរ​ខែ​ឆ្នាំ។​

ពួក​គេ​អះអាង​ថា ឯកសារ​កាត់ឈ្មោះ ឬផ្ទេរ​កម្មសិទ្ធិ​ដីធ្លី របស់​ពួក​គាត់ បាន​ដាក់​ជូន​ទៅ​មន្ទីរ​សុរិយោដី​ខេត្ត​ព្រះសីហនុ មាន​រយៈពេល​យូរ​ខែ រហូត​ទៅ​ហើយ ប៉ុន្តែ​មិនទាន់​ត្រូវ​បាន​មន្ត្រី​ជំនាញ​ទទួលបន្ទុក​តាម​ជំនាញ​នី​មួយ​ៗនោះ ផ្អឹប​ទុក​ឯកសារ របស់​ពួក​គាត់ អូស​បន្លាយ​រយៈពេល​ជាច្រើន​ខែ។ភាពយឺត​យ៉ាវ​នេះ​ពលរដ្ឋ​ភាគច្រើន បាន​ដាក់បន្ទុក​ទៅលើ​មន្ត្រី​ទទួលបន្ទុក​ពិនិត្យ​ឯកសារ​ម្នាក់ មាន​តួនាទី​ជា អនុប្រធាន​មន្ទីរ​សុរិយោដី​ខេត្ត​ព្រះសីហនុ ឈ្មោះ សេង សុខ​ណា​ក់ ដែល​មិនព្រម​ស៊ី​ញ៉េ​លើ​ឯកសារ​កាត់ឈ្មោះ ឬក៏​ផ្ទេរ​កម្មសិទ្ធិ​ដីធ្លី​ជូន​ពួក​គាត់​ឲ្យបាន​ឆាប់​ទេ និង​បាន​បង្ក​ផល​ផលវិបាក ព្រមទាំង​ប៉ះពាល់​ដល់​ការ​ប្រកបមុខរបរ​ចិញ្ចឹមជីវិត​ជូន របស់​ពួក​គាត់។

​ពួក​គេ​ចោទ​លោក សេង សុខ​ណា​ក់ ថា​ជា​អ្នក​ផ្អឹប​ទុក​សំណុំ​ឯកសារ​កាត់ឈ្មោះ ឬផ្ទេរ​កម្មសិទ្ធិ​ដីធ្លី របស់​ពួក​គាត់ ដែល​ជាហេតុ​នាំឲ្យ​ឯកសារ​ដីធ្លី របស់​ពួក​គាត់ មិន​អាច​បញ្ចូន​បន្ត​ទៅដល់​ដៃ លោក ចេង ស្រុង ប្រធានមន្ទីរ​សុរិយោដី​ខេត្ត​ព្រះសីហនុ ពិនិត្យ​សំរេច​ចុងក្រោយ។ផ្តើម​ពី​បញ្ហា​នេះ ប្រជាពលរដ្ឋ​ភាគច្រើន រស់នៅ​ខេត្ត​ព្រះសីហនុ​បាន​សំណូមពរ​ដល់ លោក ចេង ស្រុង ប្រធានមន្ទីរ​រៀបចំ​ដែនដី​នគរូបនីយកម្ម សំណង់ និង​សុរិយោដី​ខេត្ត​ព្រះសីហនុ ឲ្យ​ជួយ​ពិនិត្យ​ទៅលើ​សកម្មភាព​ការងារ របស់​មន្ត្រី​ក្រោម​ឱវាទ ជាពិសេស​ពិនិត្យ​សកម្មភាព​ការងារ របស់​លោក សេង សុខ​ណា​ក់ អនុប្រធាន​មន្ទីរ​សុរិយោដី​ខេត្ត​ព្រះសីហនុ ដែល​បាន​ផ្អឹប​ទុក​ឯកសារ​កាត់ឈ្មោះ ឬផ្ទេរ​កម្មសិទ្ធិ​ដីធ្លី​ពួក​គាត់ អូស​បន្លាយពេល​រាប់​ខែ​មក​ហើយ​នេះ។

បន្ថែម​លើ​នេះ ក្រុម​ប្រជាពលរដ្ឋ ក៏ដូចជា​តំណាង​ក្រុមហ៊ុន​អចលនទ្រព្យ​ទិញ​លក់​ដី​មួយចំនួន ក្នុង​ភូមិសាស្ត្រ​ខេត្ត​ព្រះសីហនុ ដែល​មិន​ពេញចិត្ត ចំពោះ​សកម្មភាព​ការងារ របស់​លោក សេង សុខ​ណា​ក់ ក៏បាន​ស្នើ​ដល់ លោក​ឧបនាយក​រដ្ឋមន្ត្រី ជា សុ​ផា​រ៉ា រដ្ឋមន្ត្រី​ក្រសួង​រៀបចំ​ដែនដី​នគរូបនីយកម្ម និង​សំណង់ ឲ្យ​ជួយ​មាន​វិធានការ​បន្ថែម ឬចុះ​អង្កេត​ទៅលើ​ការអនុវត្ត​ការងារ របស់ លោក សេង សុខ​ណា​ក់ ដើម្បី​ជួយ​ពន្លឿន​ដោះស្រាយ​ឯកសារ​ទិញ​-លក់ ផ្ទេរ​កម្មសិទ្ធិ និង​កាត់ឈ្មោះ​ម្ចាស់​កម្មសិទ្ធិ​ដីធ្លី ឲ្យបាន​ឆាប់​ផង។

សា​ព័ត៌មាន The Cambodia Daily នៅ​មិនទាន់​អាច​ទាក់ទង លោក សេង សុខ​ណា​ក់ អនុប្រធាន​មន្ទីរ​សុរិយោដី​ខេត្ត​ព្រះសីហនុ ដើម្បី​បំភ្លឺ​ជុំវិញ​ការចោទប្រកាន់​របស់​ប្រជាពលរដ្ឋ​នៅឡើយ​ទេ ។ចំណែក លោក ចេង ស្រុង ប្រធានមន្ទីរ​រៀបចំ​ដែនដី នគរូបនីយកម្ម​សំណង់ និង​សុរិយោដី​ខេត្ត​ព្រះសីហនុ បាន​ឲ្យដឹង​តាម​ប្រព័ន្ធ Telagram ដោយ​ស្នើ​ឲ្យ​ប្រជាពលរដ្ឋ ក៏ដូចជា​ក្រុមហ៊ុន​ប្រាប់​ឈ្មោះ ដើម្បី​អាច​ឲ្យ​រូប​គាត់​ជួយ​ស្រាវជ្រាវ​ជូន។ លោក ចេង ស្រុង បាន​ផ្ញើ​សារ​ដូច្នេះ៖” តើ​ប្រជាពលរដ្ឋ​ឈ្លោះ​អ្វី​? ខាង​ក្រុមហ៊ុន​អចលនទ្រព្យ​ក្រុមហ៊ុន​ឈ្មោះ​អ្វី​? ខ្ញុំ​និង​ស្រាវជ្រាវ​ជូន​? កុំ​ស្មាន ខ្ញុំ​មិនដឹង និង​អរគុណ ដែល​បាន​ចូលក្នុង​ការស្ថាបនា​”។

ទាក់ទិន​បញ្ហា​នេះ មន្ត្រី​សង្គម​ស៊ីវិល​ឃ្លាំមើល​ការ​អភិវឌ្ឍ​សង្គម​ប្រចាំ​ខេត្ត​ព្រះសីហនុ ក៏បាន​អះអាង​ដែរ​ថា ពិតជា​មាន​ប្រជាពលរដ្ឋ និង​ក្រុមហ៊ុន​អចលនទ្រព្យ​មួយចំនួន បាន​រអ៊ូរទាំ​ពី​ភាពយឺត​យ៉ាវ​ក្នុង​ការ​ចេញ​ប្លង់​កម្មសិទ្ធិ ការ​កាត់ឈ្មោះ ការ​ផ្ទេ​កម្មសិទ្ធិ​ដីធ្លី នៅ​មន្ទីរ​សុរិយោដី​ខេត្ត​ព្រះសីហនុ អូស​បន្លាយពេល​យូរ ឬច្រើន​ខែ​ពិតមែន។

ព្រម​ជាមួយគ្នា​នេះ មន្ត្រី​សង្គម​ស៊ីវិល​ទាំងនោះ ក៏បាន​ស្នើ​ដល់​ថ្នាក់ដឹកនាំ​មន្ទីរ​រៀបចំ​ដែនដី នគរ​រូប​នី​យក​ម្ម សំណង់ និង​សុរិយោដី​ខេត្ត​ព្រះសីហនុ ឲ្យ​ជួយ​ពន្លឿន​ការ​ចេញ​ប្លង់​កម្មសិទ្ធិ​ដីធ្លី ការ​កា​ត់​ឈ្មោ​ញ និង​ការផ្ទេរ​កម្មសិទ្ធិ​ដីធ្លី​ជាដើម ជួន​ប្រជាពលរដ្ឋ ឲ្យបាន​ឆាប់ ព្រោះ​ឯកសារ​ខាងលើ​នេះ​វា​មាន​សារៈសំខាន់​ចាំបាច់ ដើម្បី​ឈាន​ទៅ​ពង្រីក​មុខរបរ របស់​ពួក​គាត់ ជាពិសេស​កាត់បន្ថយ​វិវាទ​ដីធ្លី​នៅ​ខេត្ត​ព្រះសីហនុ។

ជាង​នេះ​ទៀត មន្ត្រី​សង្គម​ស៊ីវិល​ទាំងនោះ ក៏បាន​ស្នើ​ដល់ លោក ចេង ស្រុង ប្រធានមន្ទីរ​សុរិយោដី​ខេត្ត​ព្រះសីហនុ ឲ្យ​ជួយ​ពិនិត្យ​តាមដាន​ឯកសារ​ផ្ទេរ​កម្មសិទ្ធិ​ដីធ្លី ឬកាត់ឈ្មោះ​កម្មសិទ្ធិ​ដីធ្លី ឲ្យ​ស្របតាម​កង្វល់ និង​សំណូមពរ របស់​ប្រជាពលរដ្ឋ លើកឡើង​មកនេះ ឲ្យបាន​ឆាប់​ផង​ដែរ​៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស