អ្នកជំនាញសេដ្ឋកិច្ចកម្ពុជា បានអះអាងថា មានវិស័យសំខាន់ៗចំនួន៣ ដែលអាចធ្វើឱ្យសេដ្ឋកិច្ចកម្ពុជាវិលទៅរកភាពប្រសើរឡើយក្រោយបញ្ចប់វិបត្តិជំងឺកូវីដ១៩ គឺវិស័យទេសចរណ៍ក្នុងស្រុក វិស័យកសិកម្ម និងវិស័យសហគ្រាសធុនតូច និងធម្យម ឬហៅថាSME ។
ថ្លែងក្នុងវេទិកាតុមូលអំពី ការរៀបចំខ្លួនរបស់កម្ពុជា ដើម្បីស្តារសេដ្ឋកិច្ចឡើងវិញ ក្រោយវិបត្តិជំងឺកូវីដ-១៩ ដែលរៀបចំឡើងនៅរាជបណ្ឌិត្យសភាកម្ពុជា នៅព្រឹកថ្ងៃទី១៩ ខែមិថុនា នេះ អ្នកជំនាញសេដ្ឋកិច្ចលោកបណ្ឌិត គី សេរីវឌ្ឍន៍ មានប្រសាសន៍ថា វិស័យ សំខាន់ៗចំនួន៣រួមមាន វិស័យទេសចរណ៍ក្នុងស្រុក វិស័យកសិកម្ម និងវិស័យសហគ្រាសធុនតូច និងធម្យម គឺជាវិស័យដែលកម្ពុជាគួរតែរៀបចំឱ្យបានល្អប្រសើរឡើងវិញ ដើម្បីស្តារនូវសេដ្ឋកិច្ចរបស់កម្ពុជាដែលរងផលប៉ះពាល់ ដោយសារវិបត្តិជំងឺកូវីដ-១៩។
លោកបន្តថា កម្ពុជាត្រូវស្តារទេសចរណ៍ក្នុងស្រុក និងត្រូវកែច្នៃកសិកម្មរបស់កម្ពុជាឱ្យទៅជាកសិកម្មដែលអាចគាំទ្រដល់វិស័យទេសចរណ៍ និងផលិតផលបែបសិរីរាង្គផងដែរ។បន្ថែមពីនេះ កម្ពុជាគួរកាត់បន្ថយថ្លៃដើមលើការដឹកជញ្ជូន និងយកចិត្តទុកដាក់ ទៅលើឧស្សាហកម្មខ្នាតតូចនិងមធ្សម ដែលជាឧស្សាហកម្មដ៏សំខាន់ ហើយធ្វើយ៉ាងណាឱ្យអាចមានឱកាសរួមគ្នានាំចេញទៅក្រៅប្រទេសបាន។ថ្លែងនៅក្នុងឱកាសនោះដែរ ប្រធានរាជបណ្ឌិត្យសភាកម្ពុជា បណ្ឌិត សុខ ទូច បានជំរុញឱ្យកម្ពុជាខិតខំប្រឹងប្រែងដើម្បីប្រែក្លាយខ្លួនពីប្រទេសអ្នកហូប មកជាប្រទេសអ្នកផលិតវិញ ដោយទាមទារឱ្យមានការខិតខំកែច្នៃផលិតផលរបស់ខ្លួនឱ្យកាន់តែប្រសើរជាងពេលបច្ចុប្បន្ននេះ។
លោកបន្ថែមថា ប្រទេសកម្ពុជាមានសក្តានុពលក្នុងវិស័យកសិកម្ម ជាពិសេសដំណាំស្រូវ ប៉ុន្តែកម្ពុជាមិនទាន់បានកែច្នៃស្រូវឱ្យទៅជាផលិតផលផ្សេងៗ ដើម្បីបំពេញតម្រូវការទីផ្សារនៅលើពិភពលោកនោះទេ។ប្រធានរាជបណ្ឌិតសភាកម្ពុជារូបនេះ យល់ឃើញថាបើកម្ពុជាអាចកែច្នៃស្រូវឱ្យទៅជាអាហារ ឬផលិតផលផ្សេងៗបាន កម្ពុជានឹងមានទីផ្សារច្រើន ហើយក៏អាចបង្កើតការងារនៅក្នុងស្រុកកាន់តែច្រើនទៀត ផង។
លោកផ្តល់អនុសាសន៍ថា ដើម្បីឱ្យកម្ពុជាខ្លាំង និងក្លាយទៅជាប្រទេសអ្នកផលិត កម្ពុជាត្រូវធ្វើកំណែទម្រង់ធនធានមនុស្ស ក៏ដូចជាសង្គមទាំងមូល។កាលពីចុងខែឧសភា ធនាគារពិភពលោកបានចេញរបាយការណ៍មួយដោយមើលឃើញថា វិស័យសំខាន់ៗដែលគាំទ្រកំណើនសេដ្ឋកិច្ច កម្ពុជា កំពុងតែរងផលប៉ះពាល់កើតចេញពីវិបត្តិកូវីដ១៩ និងធ្វើឱ្យប៉ះពាល់ដល់វិស័យការងាររាប់លានកន្លែង។ធនាគារពិភពលោកមួយនេះ លើកឡើងថាជំងឺរាតត្បាតកូវីដ១៩ កំពុងវាយប្រហារលើវិស័យទេសចរណ៍ ការនាំចេញឧស្សាហកម្ម និងវិស័យសំណង់ ដែលវិស័យទាំងបីនេះ រួមចំណែកជាង ៧០ភាគរយនៃកំណើនសេដ្ឋកិច្ចជាតិ។
ប្រភពដដែល ព្យាករណ៍ថា កំណើនសេដ្ឋកិច្ចកម្ពុជានៅឆ្នាំ២០២០នឹងមានភាពយឺតយ៉ាវបំផុតមិនធ្លាប់មានចាប់តាំងពីឆ្នាំ១៩៩៤មក ពោលគឺកំណើនសេដ្ឋកិច្ចកម្ពុជា នឹងស្ថិតនៅចន្លោះដក ១ភាគរយ ទៅជិតដក៣ភាគរយ៕