អតីតមេបក្សសង្រ្គោះជាតិដែលកំពុងរស់នៅនិរទេសខ្លួននៅក្រៅប្រទេស លោក សម រង្ស៊ី បានលើកឡើងថា លោកនាយករដ្ឋមន្ត្រីហ៊ុន សែន បានធ្លាក់ចូលក្នុងអន្ទាក់ខ្លួន។ការលើកឡើងនេះ ក្រោយពេលចៅក្រមស៊ើបសួរប្រទេសបារាំង សម្រេចចោទប្រកាន់ លោក សម រង្ស៊ី ពីបទបរិហាកេរ្តិ៍ កាលពីថ្ងៃទី៨ ខែមិថុនា តាមបណ្តឹងរបស់កូនប្រសាររបស់លោក ហ៊ុន សែន គឺ លោកឌី វិជ្ជា។
លើកឡើងនៅលើទំព័រហ្វេសប៊ុករបស់ខ្លួនកាលពីថ្ងៃម្សិលមិញលោក សម រង្ស៊ី បានអះអាងថា លោកហ៊ុន សែន បានប្តឹងលោកពីបទបរិហាកេរ្តិ៍ នៅចំពោះមុខតុលាការ ប្រទេសបារាំង។អតីតមេបក្សប្រឆាំងដដែលអះអាងថានេះជាការផ្តល់ឱកាសមាស ដ៏កម្រសម្រាប់លោក ដើម្បីលាតត្រដាងអំពើឧក្រិដ្ឋរបស់លោកហ៊ុន សែន និងក្រុមគ្រួសាររបស់គាត់ នៅចំពោះមុខតុលាការឯករាជ្យ មួយ។ លោកបន្តថាអំពោះអំពើឧក្រិដ្ឋទាំងនោះ ដូចជាករណី អំពើភេរវកម្មគប់គ្រាប់បែកដៃ នៅទីក្រុងភ្នំពេញ កាលពីថ្ងៃ ៣០ ខែមីនា ១៩៩៧។
ការសម្លាប់សិល្បការិនីដ៏ល្បីល្បាញគឺអ្នកស្រី ពិសិដ្ឋ ពីលិកា ដែលជាស្រីកំណាន់របស់លោកហ៊ុន សែន ពីសំណាក់ភរិយាលោក គឺអ្នកស្រី ប៊ុន រ៉ានី ហ៊ុន សែន ដោយមានការយល់ព្រមពីលោកនាយករដ្ឋមន្ត្រី កាលពីឆ្នាំ១៩៩៩។ ការធ្វើឃាតទៅលើអតីតប្រធានសហជីពសេរី កម្មករនៃព្រះរាជាណាចក្រកម្ពុជា លោក ជា វិជ្ជា ក្នុងឆ្នាំ ២០០៤។
ការធ្វើឃាត មកលើអតីតប្រធានអង្គការការពារធនធានធម្មជាតិលោក ឈុត វុទ្ធី ក្នុងឆ្នាំ ២០១២ និងការធ្វើឃាតមកលើអ្នកស្រាវជ្រាវការអភិវឌ្ឍន៍សង្គម លោកបណ្ឌិត កែម ឡី កាលពីឆ្នាំ ២០១៦ ជាដើម។លោក សម រង្ស៊ី បានហៅការប្តឹងរូបលោកទៅតុលាការបារាំង ពីសំណាក់លោក ហ៊ុន សែន ជាការនាំមកនូវក្តីសង្ឃឹមឲ្យកម្ពុជាទៅវិញទេ ក្នុងការតស៊ូដើម្បីបញ្ចប់និទណ្ឌភាពនៅកម្ពុជា។
ការលើកឡើងរបស់មេដឹកនាំគណបក្សប្រឆាំងនេះ បានកើតមានឡើងក្រោយពីចៅក្រមស៊ើបសួរនៃតុលាការប្រទេសបារាំងបានសម្រេចចោទប្រកាន់ប្រធានស្ដីទីនៃគណបក្សប្រឆាំងលោក សម រង្ស៊ី ពីបទ «បរិហារកេរ្តិ៍ ជាសាធារណៈលើបុគ្គល» តាមបណ្ដឹងរបស់អគ្គស្នងការ រងនគរបាលជាតិលោក ឌី វិជ្ជា កាលពីថ្ងៃទី២០ ខែសីហា ឆ្នាំ២០១៩។ លោក ឌី វិជ្ជា គឺ ជាកូនប្រុសបង្កើតរបស់អតីតអគ្គស្នងការនគរបាលជាតិលោក ហុក ឡងឌី ដែលបានស្លាប់កាលពីឆ្នាំ២០០៨។
មូលហេតុដែលលោក ឌី វិជ្ជា សម្រេចប្តឹងលោក សម រង្ស៊ីនេះ ក្រោយពេលអតីតមេបក្សប្រឆាំងរូបនេះ បានអះអាងថា លោក ហ៊ុន សែន ជាអ្នកបញ្ជាឲ្យសម្លាប់លោក ហុក ឡងឌី តាមរយៈការធ្វើឲ្យផ្ទុះឧទ្ធម្ភាគចក្រដែលលោកហុក ឡងឌី បានធ្វើដំណើរពីទីក្រុងភ្នំពេញ ទៅខេត្តស្វាយរៀងកាលពីថ្ងៃទី៩ ខែវិច្ឆិកា ឆ្នាំ២០០៨។ ជាងនេះទៀតលោកចោទថា លោក ឌី វិជ្ជា កំពុងរៀបចំផែនការសងសឹកទៅក្រុមលោកហ៊ុន សែន ដែលជាឪពុកក្មេករបស់លោកវិញ ដោយសហការជាសម្ងាត់ជាមួយឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក ស ខេង។
ប៉ុន្តែការលើកឡើងនេះ ត្រូវបានរដ្ឋមន្ត្រីក្រសួងមហាផ្ទៃ លោក ស ខេង បដិសេធ ហើយថែមទាំងប្តឹងលោក សម រង្ស៊ី ទៅតុលាការក្រុងភ្នំពេញពីបទបរិហារកេរ្តិ៍ និងញុះញង់។ លោក ស ខេង ពេលនោះបញ្ជាក់ថា ការប្តឹងលោក សម រង្ស៊ីនេះ គឺជាការប្តឹងលើកទី១ក្នុងជីវិតរបស់លោក ដើម្បីឱ្យអ្នកនយោបាយរក្សាឱ្យបាននូវសេចក្តីថ្លៃថ្នូរ ក្រមសីលធម៌ ជៀសវាងការលាបពណ៌ដែលធ្វើឱ្យជាតិបែកបាក់ព្រោះតែមហិច្ឆតាអំណាចរបស់ខ្លួន៕