ភរិយា​លោក​គង់ រ៉ៃ​យ៉ា សោក​ស្តាយ​ដែល​តុលាការ​មិន​ហ៊ាន​បង្ហាញ​ភាព​ស្អាតស្អំ ដល់​ស្វាមី​ខ្លួន​

ភរិយា​របស់​លោក គង់ រ៉ៃ​យ៉ា សម្តែង​ការ​សោកស្ដាយ​ជា​ខ្លាំង ដែល​តុលាការក្រុង​ភ្នំពេញ​នៅតែ​មិន​ហ៊ាន​បង្ហាញ​ភាព​ស្អាតស្អំ​ជូន​ស្វាមី​ខ្លួន។អ្នកស្រី សុខ ស្រី​និច្ច ភរិយា​របស់​យុវជន​កែម ឡី និយម គឺ​លោក គង់ រ៉ៃ​យ៉ា បាន​សរសេរ​នៅ​លើ​គណនី​ហ្វេសប៊ុក​របស់​អ្នកស្រី​នៅ​ថ្ងៃនេះ ដោយ​សម្តែង​ការ​សោក​ស្តាយ​ដែល​តុលាការ​មិនបាន​ផ្តល់​ភាព​ស្អាតស្អំ​ដល់​ស្វាមី​របស់​គាត់។

អ្ន​កស្រី​ងថែមទាំង​ហៅ​ការសម្រេច​ប្រកាស​សាលក្រម​កាត់ទោស​ប្តី​របស់​អ្នកស្រី​ឱ្យ​ជាប់ពន្ធ​នា​គារ២ឆ្នាំ ដោយ អនុវត្តន៍​ទោស​រយៈពេល ៤ខែ១៨ថ្ងៃនេះ ជា​រឿង​អយុត្តិធម៌​បំផុត។អ្នកស្រី​បន្ត​ថា​បី្ត​របស់​អ្នកស្រី​គ្រាន់តែ​ពាក់ព័ន្ធ​រឿង​លក់​អាវយឺត​មាន​រូប​និង​ទស្សនៈ​របស់​លោក​បណ្ឌិត កែម ឡី ប៉ុណ្ណោះ ប៉ុន្តែ​ត្រូវ​បាន​តុលាការ​សម្រេច​ឱ្យ​មានទោស​ទៅវិញ។

អ្នកស្រី ហៅ​ក្រុម​ដែល​ធ្វើបាប​ប្តី​របស់​អ្នកស្រី​ថា ជា​ពួក​ខ្លាច​ស្រមោល។ សាលាដំបូង​រាជធានី​ភ្នំពេញ​នៅ​រសៀល​ថ្ងៃសុក្រ បានសម្រេច​ផ្ដន្ទាទោស​លោក គង់ រ៉ៃ​យ៉ា​ឱ្យ​ជាប់ពន្ធ​នា​គារ​ចំនួន ២ឆ្នាំ ដោយ​ចោទប្រកាន់​ពី​បទ​«ញុះញង់​ឱ្យ​ប្រព្រឹត្ត​បទល្មើស​ជាអាទិ៍» និង បទ​មិន​រាងចាល​ក្នុង​បទមជ្ឈិម​បន្ទាប់ពី​ការ​ផ្តន្ទា​ទោស​បទមជ្ឈិម​កាលពី​ពេល កន្លងមក។

ចៅក្រម​ដដែល​បន្ត​ថា ទោស​ចំនួន ២ ឆ្នាំនេះ លោក គង់ រ៉ៃ​យ៉ា បាន​អនុវត្ត​នៅក្នុង​ពន្ធនាគារ​បាន ៤ ខែ១៨ ហើយ​ទោស​ដែល​នៅ​សេស​សល់​ត្រូវ​ព្យូ​រទាំង​អស់។យ៉ាងនេះ​ក្តី មេធាវី​ការពារ​ក្ដី​ឱ្យ​លោក គង់ រ៉ៃ​យ៉ា គឺ​លោក សំ សុ​គង់ ប្រាប់​អ្នកសារព័ត៌មាន ដោយ​ចាត់ទុក​កា​រស​ម្រ​ចរ​បស់​តុលាការ​ពេលនេះ​ថា មិនទាន់​បាន​ផ្ដល់​យុត្តិធម៌​ឱ្យ​កូនក្ដី​របស់​លោក​នៅឡើយ​ទេ ដោយសារ​ពេល​សវនាការ​ហ្នឹង លោក​បាន​ស្នើសុំ​ឱ្យ​ទម្លាក់​បទចោទប្រកាន់ និង​ប្រគល់​វត្ថុ​ដែល​ចាប់​យក​ឱ្យ​កូនក្ដី​របស់​លោក​វិញ។

លោក​បន្ត​ថា​កូន​ក្តី​របស់​លោក​មិនបាន​ប្រព្រឹត្ត​បទល្មើស​ដូច​ការចោទប្រកាន់​នោះ​ឡើយ។ លោក គង់ រ៉ៃ​យ៉ា ធ្លាប់​ត្រូវ​បាន​តុលាការក្រុង​ភ្នំពេញ​កាត់ទោស​ឲ្យ​ជាប់ពន្ធ​នា​គារ​ចំនួន១៨ខែ កាលពី​ឆ្នាំ២០១៦ ក្រោម​ការចោទប្រកាន់​ពី​បទ​«ញុះញង់​ឲ្យ​ប្រព្រឹត្ត​បទឧក្រិដ្ឋ​ជាអាទិ៍» ក្រោយពេល​លោក​បាន​ប្រកាស​ឲ្យ​មហាជន​ចូលរួម​ធ្វើបដិវត្តន៍​ពណ៌​ប្រឆាំង​នឹង​រដ្ឋាភិបាល​បច្ចុប្បន្ន។លោក គង់ រ៉ៃ​យ៉ា ត្រូវ​បាន​អាជ្ញាធរ​កម្ពុជា​ចាប់ខ្លួន​ជា​លើក​ទីពីរ បន្ទាប់ពី​លោក​ប្រកាស​លក់​អាវយឺត​មាន​ភ្ជាប់​រូបថត​អ្នកស្រាវជ្រាវ​ការអភិវឌ្ឍន៍​សង្គម លោក​បណ្ឌិត កែម ឡី តាម​បណ្តាញ​សង្គម​ហ្វេសប៊ុក​កាលពី​ថ្ងៃទី៩ ខែកក្កដា ឆ្នាំ២០១៩។

ការ​ចាប់ខ្លួន​យុវជន​កែម ឡី និយម​រូប​នេះ ធ្វើ​ឡើយ​មុន​មួយថ្ងៃ​នៃ​ការ​រំឮក​ខួប​បី​ឆ្នាំ​សម្រាប់​ឃាតកម្ម​លើ​លោក កែម ឡី ដែល​ត្រូវ​បាន​ឃាតករ​បាញ់សម្លាប់ ទាំង​កណ្តាល​ថ្ងៃ​ក្នុង ស្តារ​ម៉ាត់ នៃ​ស្ថានីយ៍​ប្រេងឥន្ធនៈ ជាប់​ស្តុ​បបូ​កគោ ក្រុងភ្នំពេញ​កាលពី​ថ្ងៃទី១០ ខែកក្កដា​ឆ្នាំ២០១៦។

ការ​បាញ់សម្លាប់​លោក​កែម ឡី ធ្វើឡើង២ថ្ងៃក្រោយ​ពេល​លោក​បាន​បកស្រាយ​នូវ​របាយការណ៍​របស់​អង្គការ​អន្តរជាតិGlobal Witness ដែល​បាន​បង្ហាញ​ពី​អាណាចក្រ​អាជីវកម្ម​ត្រកូល​ហ៊ុន ដែល​បាន​ក្តោប​ក្តាប់​ជំនួញ​ក្នុង​ស្រុកខ្មែរ​ស្ទើរតែ​អស់ ក្នុង​តម្លៃ​ទឹកប្រាក់​រាប់​រយ​លាន​ដុល្លារ​សហរដ្ឋអាមេរិក​៕

© 2020, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.