លោក​ហ៊ុន សែន ថា​បច្ចុប្បន្ន​គ្មាន​អ្នក​មក​ជំនួស​តំណែង​លលោ​កបាន​ឡើយ​

​លោកនាយក​រដ្ឋមន្រ្តី​ហ៊ុន សែន បាន​ប្រតិកម្ម​ចំពោះ​ការ​លើកឡើង​ថា​លោក​ខកចិត្ត ព្រោះ​មិនបាន​សម្រេច​ផែនការ​ផ្ទេរអំណាច​ទៅ​កូនប្រុស​ច្បង​របស់​ខ្លួន គឺ​លោក ហ៊ុន ម៉ា​ណែ​ត ក្នុង​តំណែង​របស់​លោក​បច្ចុប្បន្ន។

ថ្លែង​នៅក្នុង​ពិធី ចុះទៅ​ត្រួតពិនិត្យ​ការដ្ឋាន​សាង​សង់​ព្រលា​នយន្តហោះ​អន្តរជាតិ​ភ្នំពេញថ្មី នៅ​ព្រឹក​នេះ លោក ហ៊ុន សែន អះអាង​ថា បច្ចុប្បន្ន​គ្មាន​នណា​មាន​សមត្ថភាព​មក​ជំនួស​តំណែង​របស់​លោក​បាន​ឡើយ សូម្បី​ក្នុង​ជួរ​គណបក្សប្រជាជន​កម្ពុជា​ក៏​គ្មាន​អ្នក​ចង់​មក​ជំនួស​តំណែង​របស់​លោក​នោះ​ដែរ។ បើ​មាន​មែន​លោក​ប្រាប់​ឱ្យ​អ្នក​ទាំងនោះ​ចេញមុខ ដើម្បី​បង្ហាញ​ដល់​លោក​ឱ្យ​បានដឹង​ទៀតផង។លោក​ថា​អ្នក​ស្រ​ម៉ៃ​កាន់​តំណែង​របស់​លោក​បច្ចុប្បន្ន គឺ​មានតែ​ក្រុមប្រឆាំង​ប៉ុណ្ណោះ ប៉ុន្តែ​លោក​ប្រាប់​ថា​ពួក​គេ​អាច​មាន​សមត្ថភាព​កាន់​តំណែង​របស់​លោក​បាន គឺ​មានតែ​ត្រូវ​រង់ចាំ​ជាតិក្រោយ​ប៉ុណ្ណោះ។ លោក​ហ៊ុន សែន បញ្ជាក់​ថា គ្មាន​ហេតុផល​ណា​កូនប្រុស​របស់​លោក​ចង់បាន​តំណែង​របស់​លោក​ក្នុង​ពេល​លោក​កំពុង​ដឹកនាំ​ប្រទេស​នោះ​ឡើយ ដោយ​លោក​ថា​នឹង​ដឹកនាំ​ប្រទេស​រយៈពេល១០ឆ្នាំទៅ​មុខ​ទៀត។

បុរស​ខ្លាំង​នៅ​កម្ពុជា​រូប​នេះ និយាយ​ថា បេក្ខជន​ជានា​យក​រដ្ឋមន្ត្រី គឺ មិនមែន​មានតែ​កូនប្រុស​ច្បង​របស់​លោក នោះ​ទេ ព្រោះ​បេក្ខភាព​នាយក​រដ្ឋមន្ត្រី​នៅក្នុង​ជួរបក្ស​ប្រជាជន​កម្ពុជា​មាន​ច្រើនណាស់ ប៉ុន្តែ​លោក​គាំទ្រ​បេក្ខភាព​កូនប្រុស​របស់​លោក និង​តែង​អប់រំ​ប្រៀនប្រដៅ​កូន​របស់​លោក​ឱ្យ​ក្លាយជា​មនុស្ស​មាន​សមត្ថភាព​ខ្ពស់ ទោះបី​មិនបាន​ស្មើ​លោក ប៉ុន្តែ​ក៏បាន​ប្រហាក់​ប្រហែល​លោក​ដែរ។

យ៉ាងនេះ​លោក​ថា ត្បិត​តែ​លោក​ហ៊ុន ម៉ា​ណែ​ត មានការ​គាំទ្រ​ពី​លោក​ក្តី ប៉ុន្តែ​ការ​ជំនួស​តំណែង​លោក​បាន គឺ​ត្រូវ​មានការ​គាំទ្រ​ពី​ផ្ទៃ​បក្ស និង​មានការ​សម្រេច​ពី​ពលរដ្ឋ តាមរយៈ​ការបោះឆ្នោត​ផង​ដែរ។ទោះបីជា​យ៉ាងនេះ​ក្តី លោក​ហ៊ុន សែន​ថា មានតែ​ពេលវេលា​ប៉ុណ្ណោះ​ដែល​អាច​បង្ហាញ​ការពិត​អំពី​បេក្ខជន​ដែល​អាច​ជំនួស​តំណែង​លោក​បាន។កូនប្រុស​ច្បង​លោកនាយក​រដ្ឋមន្ត្រី​ហ៊ុន សែន គឺ លោក ហ៊ុន ម៉ា​ណែ​ត ត្រូវ​បាន​ប្រធាន​គណបក្សប្រជាជន​កម្ពុជា ដែល​ជា​ឪពុកបង្កើត​របស់​លោក​ដំឡើង​តំណែង​នៅក្នុង​ជួរ​គណបក្ស​កាលពី​ពេល​ថ្មី​ៗនេះ ពី​តំណែង​អនុប្រធាន ទៅជា​ប្រធាន​យុវជន​គណបក្ស​កាន់អំណាច ថ្នាក់​កណ្តាល។លោក ហ៊ុន ម៉ា​ណែ​ត បច្ចុប្បន្ន មាន​តំណែង​កំពូល​ក្នុង​បក្ស​មួយទៀត​គឺជា​សមាជិក​គណៈកម្មាធិការ​អចិន្ត្រៃយ៍​បក្ស។

ចំណែក​តួនាទី​នៅក្នុង​ជួរ​កងទ័ព​វិញ លោក​ហ៊ុន ម៉ា​ណែ​ត មាន​តួនាទី​សំ​ខាន់​ៗ ដូចជា អគ្គ​មេបញ្ជាការ​រង​នៃ​កងយោធពល​ខេមរភូមិន្ទ និង​មេបញ្ជាការ​កងទ័ពជើងគោក តំណែង​ជា​ប្រធាន​ចារកម្ម ព្រមទាំង​តំណែង​មួយចំនួន​ផ្សេងទៀត។

យ៉ាងនេះ​ក្តី អ្នកវិភាគ​នយោបាយ​នៅ​ក្រៅប្រទេស​លោក គឹម សុខ បាន​លើកឡើង​នៅ​ថ្ងៃនេះ​ដែរ​ថា វិបត្តិ​សម្លាប់​កម្ពុជា គឺ​រឿង​អំណាច ហ៊ុន ម៉ា​ណែ​ត សុទ្ធសាធ។ លោក​ថា វិបត្តិ​កម្ពុជា​គ្មាន​ច្រកចេញ​រហូតដល់​បច្ចុប្បន្ន និង​គាំង​យូរ​ទៅទៀត គឺ​ផែនការ​មហិច្ឆតា​អំណាច​សម្រាប់ ហ៊ុន ម៉ា​ណែ​ត។ រី​ឯអំណាច​លោក ហ៊ុន សែន ខណៈនេះ គ្រាន់តែ​ជា​គ្រឿង​ទ្រនាប់​សម្រួល​ផ្លូវ​ប៉ុណ្ណោះ។លោក​បន្ត​ទៀត​ថា បើ​ត្រឹមតែ​រក្សា​អំណាច​ផ្ទាល់ខ្លួន​ដល់​ជីវិត​ចុងក្រោយ​មែន លោក ហ៊ុន សែន មិន​ចាំបាច់​ធ្វើមុខ​ក្រាស់​ដល់កម្រិត​ប្រើ​កណ្ដាប់ដៃ​ដែក​ធ្ងន់​ហួសប្រមាណ​ដូចសព្វថ្ងៃ​ឡើយ។លោក​មើលឃើញ​ថា សករាជ​លោក ហ៊ុន សែន ជា​ឪពុក ធ្វើឲ្យ​ប្រទេស​កម្ពុជា​លួស​ព្រលឹង​ផ្ទៃក្នុង បាត់បង់​ដី​តាម​ព្រំដែន របូត​កោះ​និង​ផ្ទៃ​ទឹកសមុទ្រ​ខ្មែរ​យ៉ាង​ធំធេង ទៅ​ក្រោម​ការគ្រប់គ្រង​របស់​យួន​និង​សៀម។ ប៉ុន្តែ​បើ​ពល​សង្គម​ខ្មែរ​គ្រប់រូប បណ្ដោយឲ្យ​លោក ហ៊ុន ម៉ា​ណែ​ត ជា​កូន​ឡើង​តោង​អំណាច​បាន​ដោយ​គ្មាន​ឧបសគ្គ​វិញ នោះ​ជាតិ​កម្ពុជា​អាច​នឹង​ត្រូវ​បាត់ព្រលឹង​ទាំងស្រុង ឬក្ស័យ​ប្រទេស​ត្រឹម​សម័យ​លោក ហ៊ុន ម៉ា​ណែ​តនេះ​ទៀតផង​៕

© 2020, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.