ប្រមុខរដ្ឋាភិបាល និងជាប្រធានគណបក្សប្រជាជនកម្ពុជាលោក ហ៊ុន សែន អះអាងជាថ្មីទៀតថា ថវិការកសាងស្នាក់ការគណបក្សប្រជាជនកម្ពុជាជាង៣០លាន ដុល្លារ សហរដ្ឋអាមេរិក គឺជាថវិការរបស់សមាជិកបក្សរបស់ខ្លួនប៉ុណ្ណោះ។
ការអះអាងរបស់លោក ហ៊ុន សែន ធ្វើឡើងនៅក្នុងពិធីពិនិត្យការដ្ឋានសាងសង់ព្រលានយន្តហោះអន្តរជាតិភ្នំពេញថ្មីនៅខេត្តកណ្តាលនៅព្រឹកថ្ងៃច័ន្ទនេះ។លោក ហ៊ុន សែន បញ្ជាក់ថា វាគ្មានរឿងអ្វីពិបាករកលុយត្រឹមជាង ៣០លានដុល្លារ ដើម្បីយកមកកសាងស្នាក់គណបក្សនោះឡើយ ព្រោះសមាជិកបក្សរបស់ខ្លួនមានរាប់លាននាក់ តាំងពីកូនកសិករ រហូតដល់អ្នកសេដ្ឋី និងកូនសេដ្ឋីថែមទៀតផង។
ប្រធានបក្សប្រជាជនកម្ពុជារូបនេះ លើកឡើងថាលោកមិនខ្វល់នឹងការរិះគន់នោះឡើយ ដោយថានៅថ្ងៃទី២៨ ខែមិថុនាខាងមុខនេះ គណបក្សនឹងសូត្រមន្តឡើងអគារថ្មីនៃស្នាក់ការកណ្តាលបក្សកាន់អំណាច និងចំថ្ងៃកំណើតបក្សនេះផងដែរ។អគារស្នាក់ការកណ្តាលរបស់គណបក្សកាន់អំណាច ដែលមានទីតាំងនៅក្បែរក្រសួងមហាផ្ទៃ និងក្បែរអគារព្រឹទ្ធសភានេះ បានសាងសង់ឡើងនៅលើផ្ទៃដី នៃទីតាំងអគារចាស់មានទំហំប្រមាណជាង១ហិកតា និងមានកម្ពស់ចំនួន ៥ជាន់ ពណ៌ស រចនាប័ទខ្មែរ ដោយចាប់ដំណើរការសាងសង់ឡើងវិញ តាំងពីខែខែវិច្ឆិកា ឆ្នាំ២០១៨ មកម្លេះ។លោកហ៊ុន សែន ធ្លាប់អះអាងថា ការកសាងអគារស្នាក់ការកណ្តាលរបស់បក្សកាន់អំណាចយ៉ាងស្កឹមស្កៃ និងប្រណិតនេះដើម្បីពង្រឹងអំណាចបក្សរបស់ខ្លួនឲ្យយូរអង្វែងបន្ថែមទៀតដោយក្បាលម៉ាស៊ីននិងរចនាសម្ព័ន្ធបក្សនឹងត្រៀមដឹកនាំរយៈពេលពី៥០ ទៅ១០០ឆ្នាំខាងមុខទៀត។
ក្រុមអ្នកវិភាគធ្លាប់លើកឡើងថា អំណាចបក្សប្រជាជនកម្ពុជា អាចរឹងមាំទៅបានដោយសារការអនុវត្តវប្បធម៌អញជួយឯង ឯងជួយអញ្ញ ការសហការគ្នាជាប្រព័ន្ធនឹងការក្តោបក្តាប់ក្រុមអ្នកមានប្រាក់ ដោយការបើកដៃឱ្យមានការប្រព្រឹត្តអំពើពុករលួយ និងបំផ្លិចបំផ្លាញធនធានធម្មជាតិជាដើម។ ប៉ុន្តែបញ្ហានិរន្តន៍ភាពអំណាចបក្សនេះទៅថ្ងៃខាងមុខអាចនឹងប្រឈមបញ្ហាវិបត្តិផ្ទៃក្នុង ការលែងជួយជ្រោមជ្រែងពីបរទេស និងការអស់ជំនឿពីពលរដ្ឋតែម្តង៕