អាជ្ញាធរ​រាជធានី​ភ្នំពេញ ចុះ​ហាមឃាត់​សកម្មភាព​ក្រុម​យុវជន ដែល​រៀបចំ​តាំង​ពិព៍​រណ៌​រូបភាព​សម្រស់​កោះកុង​ក្រៅ

អាជ្ញាធរ​រាជធានី​ភ្នំពេញ បាន​ចុះ​ហាមឃាត់​សកម្មភាព​ក្រុម​យុវជន​ស្រលាញ់​បរិស្ថាន ដែល​គ្រោង​នឹង​រៀបចំ​តាំង​ពិព៍​រណ៌​រូបភាព​សម្រស់​កោះកុង​ក្រៅ ដើម្បី​បង្ហាញ​ឱ្យ​សាធារណៈ​ជន​មានការ​ចាប់អារម្មណ៍ និង​ចូលរួម​តំបន់​កោះ​មួយ​នេះ។

សកម្មភាព​រារាំង​នេះ កើតឡើង​នៅ​រសៀល​ថ្ងៃច័ន្ទ​នេះ នៅ​សួន​ច្បារ​វត្ដ​បទុម​វត្ថី ដោយ​អាជ្ញាធរ​ខណ្ឌដូនពេញ​អះអាង​ថាស​កម្ម​ភាព​ដែល​ក្រុម​យុវជន​ធ្វើជា​រឿង​ខុសច្បាប់ ព្រោះ​មិនបាន​សុំច្បាប់​អនុញ្ញាត​ពី​អាជ្ញាធរ​ជាមុន។យ៉ាងនេះ​ក្តី តាមរយៈ​វីដេអូ​ដែល​បង្ហោះ​នៅ​លើ​គណនី​ហ្វេសប៊ុក របស់​ស្ថាបនិក​អង្គការ​ចលនា​មាតា​ធម្មជាតិ លោក​អា​ឡិច ហ្គន់​សា​ឡេស ដេ​វិ​តសុន នៅ​រសៀល​នេះ​ក្រុម​យុវជន​បង្ហាញ​ការ​ខកចិត្ត និង​មិន​ពេញចិត្ត​ឡើយ​ចំពោះ​សកម្មភាព​របស់​អាជ្ញាធរ​រាជធានី​ភ្នំពេញ ដោយ​អះអាង​ថាស​កម្ម​ភាព​របស់​ពួក​គាត់​មិនបាន​ខុសច្បាប់​ទេ និង​មិន​មាន​អ្វី​ប៉ះពាល់​ដល់​សណ្តាប់​ធ្នាប់​សង្គម​នោះ​ដែរ។​ពួក​គេ​បាន​ហៅ​សកម្មភាព​នេះ ថា​ជា​ការ​គំរាមកំហែង​ដល់​ពួក​គាត់ និង​ជា​ការ​បំបាក់ស្មារតី នៃ​ការចូលរួម​ការពារ​បរិស្ថាន​កម្ពុជា​ថែមទៀត​ផង។

កាលពី​ថ្ងៃទី ៣ មិថុនា​ក្រុម​យុវជន​ដែល​មាន​គ្នា​ប្រមាណ២០នាក់ បាន​នាំគ្នា​ធ្វើ​យុទ្ធនាការ​ជិះកង់ ពី​ខេត្តកោះកុង​ឆ្ពោះ​មក​ភ្នំពេញ ក្នុង​គោល​បំណង​យក​ញ្ញ​ត្តិ​មក​ដាក់​ជូន​លោកនាយ​រដ្ឋមន្ត្រី ហ៊ុន សែន ស្នើសុំ​ឱ្យ​ដាក់​តំបន់​កោះកុង​ក្រៅ ជា​តំបន់​អភិរក្ស​ធម្មជាតិ ឬ តំបន់​ឧទ្យានជាតិ​សមុទ្រ​ជា​ផ្លូវការ។ ប៉ុន្តែ​សកម្មភាព​របស់​ពួក​គាត់​ត្រូវ​បាន​អាជ្ញាធរ​ខេត្តកោះកុង​ឃាត់ និង​ចាប់​យក​កង់​របស់​ពួក​គេ​ប្រមាណ១០គ្រឿង​រក្សាទុក និង​គំរាម​មិន​ឱ្យ​ក្រុម​យុវ​ជនយ​កញ្ញ​ត្តិ​មក​ដាក់​នៅ​ខុទ្ទកាល័យ​លោក​ហ៊ុន សែន​ឡើយ។ ប៉ុន្មាន​ថ្ងៃក្រោយ​មក​ទើប​អាជ្ញាធរ​ខេត្ត​នេះ ព្រម​ប្រគល់​កង់​ទាំងនោះ​ឱ្យ​ក្រុម​យុវជន​វិញ។

កាលពី​ថ្ងៃទី៣ ខែមិថុនា នោះ​ដែរ ក្រសួងបរិស្ថាន​សេចក្តី​ប្រកាស​ព័ត៌មាន​ដោយ​សម្តែង​ការ​សោក​ស្តាយ​ចំពោះ​ក្រុម​ជន​មួយចំនួន​តូច​ដែល​សម្តែង ធ្វើជា​អ្នកការពារ​បរិស្ថាន ដោយ​បាន​ធ្វើសកម្មភាព​ទាមទារ​ឱ្យ​មានការ​សង្គ្រោះ​តំបន់​កោះកុង​ក្រៅ នៃ​ខេត្តកោះកុង ឱ្យ​ដាក់ជា​តំបន់​ការពារ។ក្រសួងបរិស្ថាន​បាន​ចាត់ទុក​សកម្មភាព​នោះ​គ្រាន់តែ​ជា​លេស ដើម្បី​បិទបាំង​នូវ​ឧបាយកល​នយោបាយ​ទុច្ចរិត​ដែល​ស្ថិត​ក្រោម​ការរៀបចំ​មួយ​ដ៏​ច្បាស់លាស់​ប៉ុណ្ណោះ។

ក្រសួងបរិស្ថាន បញ្ជាក់​ថា ទោះបីជា​គ្មាន​យុទ្ធនាការ ឬការ​ទាមទារ​ណាមួយ​ក៏ដោយ ក៏​រាជរដ្ឋាភិបាល​កម្ពុជា តាមរយៈ​ក្រសួងបរិស្ថាន​បាន​យកចិត្ត​ទុកដាក់​ខ្ពស់​លើ​ការងារ​ការពារ​និង​អភិរក្ស​តំបន់​កោះកុង​ក្រៅ​នេះ ដោយ​បាន​បញ្ជូន​ក្រុម​មន្ត្រី​ជំនាញ បាន​ធ្វើការ​សិក្សា​ស្រាវជ្រាវ រៀបចំ​ឯកសារ និង​ទិន្ន​ន័យ​ផ្សេង​ៗទាក់ទង​នឹង​តំបន់​កោះកុង​ក្រៅ​នេះ តាំងពី​ឆ្នាំ ២០១៦ មក​ម្ល៉េះ ដើម្បី​ដាក់​តំបន់​នេះ ជា​«ឧទ្យានជាតិ​សមុទ្រ»ព្រោះ​តំបន់​នេះ​សម្បូ​ណ៍​ដោយសក្តានុពល​ផ្នែក​ធនធាន​ធម្មជាតិ និង​ជីវៈ​ចម្រុះ និង​មាន​ឆ្នេរខ្សាច់​ល្អ​ស្រស់​ស្អាត ដែល​ត្រូវការ​ពារ​និង​អភិរក្ស។ក្រសួង រំពឹង​ថា​នឹងអាច​ប្រកាស​តំបន់​កោះកុង​ក្រៅ​នេះ​ជា​«ឧទ្យានជាតិ​សមុទ្រ»អំឡុង​ឆ្នាំ ២០២១ ខាងមុខនេះ ក្រោយ​ការ​បញ្ចប់​ការសិក្សា​រួចរាល់។

នៅ​ថ្ងៃទី ៤ ខែមិថុនា អង្គការ​ការពារ​សិទ្ធិមនុស្ស​លី​កាដ​ូ បាន​ហៅថា ការរារាំង និង​សាកសួរ​ក្រុម​យុវជន​បរិស្ថាន​អស់​ជាច្រើន​ម៉ោង ព្រមទាំង​ចាប់​យក​កង់​របស់​ពួក​គេ និង​ឃាត់​មិន​ឱ្យ​ក្រុម​យុវជន​ដើរ​ដោយ​ថ្មើ​ជើង​មក​ភ្នំពេញ ពីសំណាក់​អាជ្ញាធរ​ខេត្តកោះកុង គឺជា​ការ​បំភិតបំភ័យ​មួយ​ដល់​យុវជន ដែល​ស្រលាញ់ និង​ចង់​ការពារ​ធនធាន​ធម្មជាតិ ។

ក្រោយ​មាន​ភាព​ចម្រូងចម្រាស​ប៉ុន្មាន​ថ្ងៃនេះ ក៏បាន​លេចចេញ​នូវ​គម្រោង​ផ្តល់​ការ​វិនិយោគ​កោះកុង​ក្រៅ ទៅជា​តំបន់​អភិវឌ្ឍ​ទៅ​ឱ្យ​ក្រុមហ៊ុន​ឯកជន មួយ ដែលគេ​ស្គាល់​ថា​ជា​ក្រុមហ៊ុន​របស់​ឧកញ៉ា លី យ៉ុង​ផាត់ មនុស្ស​ស្និត​និង​លោក​ហ៊ុន សែន។កោះកុង​ក្រៅ​ដែល​ជា​កោះធំ​បំផុត​របស់​កម្ពុជា​ស្ថិតនៅ​ក្នុង​ខេត្តកោះកុង មាន​ទំហំ ១០៣ គីឡូម៉ែត្រ​ក្រឡា និង​ជា​កោះ​ដែល​មាន​សម្រស់​ស្អាត មាន​ឆ្នេរ​សក្បោះ មាន​សម្រស់​ធម្មជាតិ​ស្រស់​ស្អាត​ជាងគេ​នៅ​កម្ពុជា។

សកម្មជន​បរិស្ថាន បាន​លើកឡើង​ពី​គុណវិបត្តិ ប្រសិនបើ​រាជរដ្ឋាភិបាល​មិន​អាច​ការពារ​តំបន់​នេះ​បាន ដោយ​អាច​នឹង​មានការ​អន្តរាយ​ផ្នែក​បរិស្ថាន ប្រសិនបើ​ធនធាន​ធម្មជាតិ​ក្នុង​តំបន់​នេះ ត្រូវ​បាន​លក់​ទៅ​ឱ្យ​ក្រុមហ៊ុន​ឯកជន ៕

© 2020, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.