ទេទោះបីជាការដាក់ទណ្ឌកម្មលើរបបប្រធានាធិបតីវេណេហ្សូអេឡានិកូឡាស់ម៉ាឌូរ៉ូកំពុងធ្វើអោយរបបនេះរងការឈឺចាប់ក៏ដោយ តែលោកប្រធានាធិបតីអាមេរិក ដូណាល់ត្រាំ បានងាកចិត្តបន្តិច នៅពេលនេះ ដោយចង់ជួបលោកម៉ាឌូរ៉ូដោយផ្ទាល់។ទីភ្នាក់ងារសារព័ត៌មាន AFP លោកដូណាល់ត្រាំ បាននិយាយថា លោកពិចារណាថានឹងអនុញ្ញាតអោយលោកម៉ាឌូរ៉ូ មកជួបលោកគឺក្នុងស្ថានភាពដែលអាចធ្វើបាន។
ការប្រែប្រួលចិត្តបន្តិច របស់ លោកត្រាំ គឺបន្ទាប់ពី អតីតទីប្រឹក្សារបស់លោក គឺលោកចន បូលតុន បានបញ្ចេញសារក្នុងសៀវភៅកំណត់ហេតុរបស់លោកថា លោកត្រាំមានផែនការផ្តួលរំលំរបបរបស់លោកម៉ាឌូរ៉ូយ៉ាងពិតប្រាកដ ទោះក្នុងស្ថានភាពណាក៏ដោយហើយក៏មានផែនការចាប់យកវេណេហ្សូអេឡា ជាផ្នែកមួយនៃសហរដ្ឋអាមេរិកថែមទៀត។ដោយការគាំទ្រ លោកវ័ន្តកៃដូមេបក្សប្រឆាំង ក្នុងឋានៈជាប្រមុខរដ្ឋស្ដីទី លោកត្រាំ និងលោកកៃដូបានជួបគ្នាម្ដងនៅសេតវិមាន នៅចុងឆ្នាំ២០១៩ បន្ទាប់ពីកៃដូ បញ្ចប់ការធ្វើទស្សនកិច្ចនៅអឺរ៉ុប។
ក្នុងជំនួបនោះ លោកត្រាំមានភាពស្និទ្ធស្នាលជាខ្លាំងនឹងមេបក្សប្រឆាំងវេណេហ្សូអេឡារូបនេះ។ ក្នុងជំនួបនោះហើយដែលលោកកៃដូ ទទួលបានការលើកទឹកចិត្តជាខ្លាំងក្នុងការតស៊ូដើម្បីធ្វើអោយមានការផ្លាស់ប្ដូរនៅ ក្នុងប្រទេសវេណេហ្សូអេឡា។បច្ចុប្បន្ន លោកកៃដូ ទទួលបានការគាំទ្រ ពីមេដឹកនាំប្រទេស ប្រជាធិបតេយ្យជឿនលឿន ជិត៦០ប្រទេស។ ដោយឡែក លោកម៉ាឌូរ៉ូ ទទួលបានការគាំទ្រដោយប្រទេសរុស្ស៊ី ចិន អ៊ីរ៉ង់ តួកគី និងគុយបា។ ប្រទេសរុស្ស៊ី និងចិនដែលជាម្ចាស់បំណុលពាន់លាន ដុល្លារ តែងរុញអោយ លោកម៉ាឌូរ៉ូ និង កៃដូជួបគ្នា ដើម្បី រកដំណោះស្រាយ សម្រាប់ប្រជាជនវេណេហ្សូអេឡា។លោកត្រាំបាននិយាយថា ទោះជាស្ថានភាពនៃការដាក់ទណ្ឌកម្មលើរបបលោកម៉ាឌូរ៉ូខ្លាំងលោកក្ដី គឺលោកបើកចំហរក្នុងការជួបនេះ។ លោកបានបញ្ជាក់ដូចនេះថា «ខ្ញុំគិតថា អាចនឹងជួបលោកម៉ាឌូរ៉ូ បាននៅពេលណាមួយ ព្រោះលោកម៉ាឌូរ៉ូក៏ចង់ជួបខ្ញុំដែរ។ កន្លងមកខ្ញុំមិនដែល ជំទាស់មិនជួបលោកម៉ាឌូរ៉ូនោះទេ។ អ្នកដឹងហើយថា ខ្ញុំកម្រនឹងបដិសេធណាស់ ប៉ុន្តែពេលនេះ គួរគិតឡើងវិញ។ សម្រាប់ខ្ញុំនឹងមិនទម្លាក់ចោលការសុំជួបទាំងលោកម៉ាឌូរ៉ូនិងកៃដូនោះទេ។ »រដ្ឋាភិបាល លោកម៉ាឌូរ៉ូបានហៅសហរដ្ឋអាមេរិក និងរដ្ឋការរបស់លោកត្រាំ ថាជាមេរដ្ឋប្រហារទំលាក់លោកពីអំណាច គឺប៉ងធ្វើរដ្ឋប្រហារច្រើនដងមកហើយ ប៉ុន្តែមិនបានសម្រេច។
មកដល់ពេលនេះ ពលរដ្ឋអាមេរិក ៥២នាក់ត្រូវអាជ្ញាធរលោកម៉ាឌូរ៉ូចាប់ខ្លួន ក្រោមបទចោទប៉ុនប៉ងធ្វើរដ្ឋប្រហារដោយសហការជាមួយក្រុមប្រឆាំង។ តែសម្រាប់លោកត្រាំតែងតែបដិសេធ ថាក្រុមនេះ មិនមានជាប់ពាក់ព័ន្ធនឹងរដ្ឋការរបស់លោកនោះទេ។ នៅពេល អ្នកសារព័ត៌មាន Axios បានចោទសូរ ថាលោកចង់ងាកចេញពីលោក កៃដូហើយឬ លោកត្រាំបាននិយាយថា សម្រាប់លោកនៅតែប្រឆាំងដាច់ខាតនូវអ្វីដែលកើតមាននៅក្នុងប្រទេសវេណេហ្សូអេឡា។ លោកបញ្ជាក់ថា លោកនៅតែគាំទ្រ លោកកៃដូ តែលោកមិនបានចាត់ទុកជាដៃគូពិសេស ពេកនោះទេ។នៅឯមហាសន្និបាតអង្គការសហប្រជាតិកាលពីឆ្នាំ ២០១៨ លោកម៉ាឌូរ៉ូបានស្នើជួបលោកត្រាំដោយ ផ្ទាល់នៅក្រៅកិច្ចប្រជុំដែលធ្វើឡើងនៅក្រុងញូវយ៉ក។ តែលោកត្រាំពេលនោះ មិនបានបដិសេធទេ តែលោកក៏មិនបានឆ្លើយថាលោកយល់ព្រមអ្វីនោះដែរ។
ប៉ុន្តែលោកត្រាំបានវាយប្រហារធ្ងន់ធ្ងរ ទៅលើលោកម៉ាឌូរ៉ូ ដោយចោទថាជាមេដឹកនាំផ្ដាច់ការរំលោភសិទ្ធិមនុស្សធ្ងន់ធ្ងរ ហើយលោកម៉ាឌូរ៉ូក៏បានឡើងថ្លែងវាយប្រហារលោកត្រាំ និងសហរដ្ឋអាមេរិកដោយចាត់ទុកថា អាមេរិកជាមេចក្រព័ត្រជំនាន់ថ្មី។ពុំទាន់មានប្រភពណាមួយអះអាងថា លោកត្រាំនឹងអញ្ជើញលោកម៉ាឌូរ៉ូមកជួប នៅពេលណា ហើយ នៅទីណានោះទេ។ ប៉ុន្តែមានការចោទសួរថាតើ លោកម៉ាឌូរ៉ូហ៊ានមកជួបលោកត្រាំនៅ ក្នុងទឹកដីអាមេរិក ដែរឬទេ ព្រោះក្រសួងយុត្តិធម៌សហរដ្ឋអាមេរិកបានចេញដីការចាប់ខ្លួន និងចោទប្រកាន់លោកម៉ាឌូរ៉ូ ថាជាមេឧក្រិដ្ឋកម្មគ្រឿងញៀនទៅហើយនោះដោយប្រកាសអោយតម្លៃខ្លួនលោកម៉ាឌូរ៉ូ ១៥លាន ដុល្លារអោយតែជនណា ឬក្រុមណា ចាប់ខ្លួនលោកម៉ាឌូរ៉ូបាននោះ។
បែបនេះក្ដី លោកម៉ាឌូរ៉ូ ក៏មានឈ្មោះ នៅក្នុងសំណុំរឿងរំលោភសិទ្ធិមនុស្សធ្ងន់ធ្ងរ នៅ តុលាការឧក្រិដ្ឋកម្មអន្តរជាតិ ICC និងក្នុងក្រុមប្រឹក្សាសិទិ្ធមនុស្ស របស់អង្គការសហប្រជាជាតិផងដែរ៕