រដ្ឋាភិបាលសាធារណរដ្ឋ ប្រជាមានិតចិន បានសម្រេចផ្តល់មូលនិធិពិសេសសំរាប់កិច្ចសហប្រតិបត្តិការមេគង្គ-ឡានឆាងឆ្នាំ២០២០ ជាង៧លានដុល្លារ ដល់កម្ពុជា សម្រាប់គម្រោងថ្មីចំនួន២០បន្ថែមទៀត។
ការសម្រេចនេះធ្វើឡើង ក្នុងពិធីចុះហត្ថលេខាលើកិច្ចព្រមព្រៀងស្តីពីគម្រោងកិច្ចសហប្រតិបត្តិការសម្រាប់មូលនិធិពិសេស លើកិច្ចសប្រតិបត្តិការមេគង្គ-ឡានឆាង ២០២០ ដែលចុះហត្ថលេខាដោយ រដ្ឋមន្រ្តីការបរទេសកម្ពុជា លោកប្រាក់ សុខុន ជាមួយឯកអគ្គរដ្ឋទូតចិនប្រចាំកម្ពុជាលោក វ៉ាង វិនធាន នៅទីស្តីការក្រសួងនាព្រឹកថ្ងៃទី ២៣ ខែមិថុនា។
ថ្លែងក្នុងពិធីនោះ លោកប្រាក់ សុខុន មានប្រសាសន៍ថា ថវិកាបានពីគម្រោងទាំងនេះ នឹងបន្តរួមចំណែកដល់កិច្ចសហប្រតិបត្តិការក្នុងវិស័យអភិវឌ្ឍន៍ជនបទ ធនធានទឹក កសិកម្ម ការតភ្ជាប់ផ្លូវអាកាស ការអប់រំ បេតិកភណ្ឌវប្បធម៌ ជាដើម។ លោកបង្ហាញនូវសេចក្តីរីករាយដោយថា បើទោះបីជាមានផលប៉ះពាល់យ៉ាងធ្ងន់ធ្ងរពីវិបត្ដិកូវីដ-១៩ ក៏ដោយ ក៏កិច្ចសហប្រតិបត្តិការកម្ពុជា-ចិន ទាំងកម្រិតទ្វេភាគី និងពហុភាគី គឺនៅតែរក្សាបាននូវភាពសំខាន់។លោកបន្តថា ប្រទេសចិន បានចាត់ទុកប្រទេសកម្ពុជា ជាអាទិភាពចម្បងក្នុងការចូលរួមចំណែកគ្រប់គ្រងការរីករាលដាលនៃជំងឺដ៏កាចសាហាវនេះ និងកាត់បន្ថយផលប៉ះពាល់សេដ្ឋកិច្ច-សង្គម។លោកប្រាក់ សុខុន លើកឡើងថា នៅក្នុងពេលវេលាដ៏លំបាកនៃការរាតត្បាតជំងឺជាសកលនេះ ពិធីចុះផ្តល់មូលនិធិពិសេសនេះ គឺទាន់ពេលវេលា និងមានសារៈសំខាន់បំផុត ដើម្បីបង្ហាញពីភាពរឹងមាំរបស់កម្ពុជា-ចិន ព្រមទាំងអះអាងជាថ្មីនូវមូលដ្ឋានដ៏រឹងមាំនៃកិច្ចសហប្រតិបត្តិការមេគង្គ ឡានឆាង។
យ៉ាងនេះក្តី កិច្ចសហប្រតិបត្តិការមេគង-ឡានឆាង ត្រូវបានក្រុមអ្នកឃ្លាំមើលសង្គមយល់ឃើញថា គម្រោងនេះនៅតែមានបញ្ហាចោទឡើង ត្បិតប្រទេសចិននៅតែក្តោបក្តាប់ទន្លេមេគង្គផ្នែកខាងលើ នឹងបានធ្វើទំនប់វារីអគ្គិសនីជាច្រើន ដែលធ្វើឱ្យប៉ះពាល់ដល់ផ្ទៃទឹកផ្នែកខាងក្រោម ពិសេសប៉ះពាល់ប្រទេសចំនួន៥នៅជាប់ទន្លេមេគង្គផ្នែកខាងក្រោម រួមមានប្រទេសមីយ៉ាម៉ា ថៃ ឡាវ កម្ពុជា និងវៀតណាម។
បញ្ហាប្រឈមដែលកើតឡើងពីការរាំងខ្ទប់ផ្ទៃទឹកផ្នែកខាងលើ បានធ្វើឱ្យប៉ះពាល់ ដល់បណ្តាប្រទេសនៅផ្នែកខាងក្រោម ដូចជាភាពរាំងស្ងួត គ្រោះទឹកជំនន់ ប៉ះពាល់ដល់បរិស្ថាន ជីវចម្រុះ ពិសេសធ្វើឱ្យទិន្នផលត្រីថយចុះ ជាដើម៕