មន្ត្រីជាន់ខ្ពស់ក្រសួងការបរទេស អះអាងថាកម្ពុជានៅតែប្រកាន់ជំហរទាមទារឱ្យភាគីវៀតណាមដកតង់ដែលបោះដោយឯកតោភាគីនៅតំបន់មិនទាន់ឯកភាពគ្នាចេញឱ្យអស់ និងត្រូវធ្វើឡើងឱ្យបានឆាប់រហ័ស។
ថ្លែងប្រាប់អ្នកសារព័ត៌មាននៅព្រឹកថ្ងៃទី២៣មិថុនា អ្នកនាំពាក្យក្រសួងការបរទេសកម្ពុជា លោក កុយ គួង មានប្រសាសន៍ថា កម្ពុជានៅតែទាមទារឱ្យភាគីវៀតណាមរុះរើតង់ដែលបោះនៅតំបន់មិនទាន់ឯកភាពគ្នាឱ្យអស់ និងឱ្យបានឆាប់ ត្បិតកន្លងមកកម្ពុជាធ្លាប់បានផ្ញើកំណត់ទូតទៅភាគីវៀតណាមម្តងករណីបោះតង់៣១ទីតាំងនៅភូមិសាស្ត្រខេត្តកណ្តាលក្នុងតំបន់មិនទាន់ឯកភាពគ្នា និងឯកតោភាគី។លោកបន្ថែមថា ការបោះតង់ជាបណ្តោះអាសន្នក្រោមហេតុផលដើម្បីការពារជំងឺកូវីដ១៩ ពីសំណាក់ភាគីវៀតណាមអាចធ្វើទៅបាន គឺបោះក្នុងទឹកដីរបស់ខ្លួននៅតំបន់ដែលឯកភាពគ្នារួចប៉ុណ្ណោះ ដោយមិនអាចបោះតង់នៅតំបន់មិនទាន់ឯកភាពគ្នានោះឡើយ។
កាលពីថ្ងៃទី១០មិថុនា ប្រធាននាយកដ្ឋានកណ្តាលនគរបាលព្រំដែនកម្ពុជា លោក ហ៊ូ សាគុណ បានអះអាងក្នុងពិធីមួយថា យោធាវៀតណាម ចូលមកបោះតង់ នៅតាមបណ្តោយព្រំដែនកម្ពុជា ដោយឯកតោភាគីចំនួន ២៥៦ កន្លែង នៅក្នុងតំបន់មិនទាន់ឯកភាពគ្នា ចាប់តាំងពីជំងឺកូវីដ១៩បានផ្ទុះឡើង។យ៉ាងនេះក្តី កាលពីថ្ងៃទី២២ ខែឧសភា ឆ្នាំ២០២០ ស្ថានទូតវៀតណាមប្រចាំកម្ពុជា បានលើកឡើងនៅលើទំព័រហ្វេសប៊ុកផ្លូវការរបស់ខ្លួនថា ករណីវៀតណាមបោះតង់ ៣១ទីតាំងជាប់ព្រំដែនកម្ពុជា-វៀតណាម ក្នុងខេត្តកណ្តាលកាលពីខែមីនានោះ គឺភាគីវៀតណាមបានរុះរើតង់ទាំងនោះចេញតាំងពីមុនថ្ងៃទី១៣ ខែឧសភា ហើយការបោះតង់ផ្សេងទៀតធ្វើឡើងក្នុងទឹកដីក្រោមការគ្រប់គ្រងរបស់វៀតណាមប៉ុណ្ណោះ។
ទោះបីជាយ៉ាងណាក៏ដោយ អភិបាលខេត្តកណ្តាលលោក គង់ សោភ័ណ្ឌ ថ្លែងប្រាប់សារព័ត៌មានសំឡេងប្រជាធិបតេយ្យVOD នៅថ្ងៃអង្គារ៍នេះ ថាមកទល់ពេលបច្ចុប្បន្ន ភាគីវៀតណាមបានរុះរើតង់ចំនួន៧ប៉ុណ្ណោះ ដោយឡែកតង់ចំនួន២៤ទីតាំងទៀតនៅមិនទាន់រុះរើចេញពីតំបន់មិនទាន់ឯកភាពគ្នានោះឡើយ។ ប្រភពដដែលបន្តថា ខាងអាជ្ញាធរខេត្ត និងកងកម្លាំងព្រំដែនកម្ពុជានៅតែជំរុញឱ្យភាគីវៀតណាមរុះរើតង់ចេញពីតំបន់មិនទាន់ឯកភាពគ្នាឱ្យអស់ ហើយការងារនេះធ្វើឡើងដោយយកចិត្តទុកដាក់បំផុត និងត្រួតពិនិត្យជាប្រចាំ ដោយលោកសង្ឃឹមថាភាគីវៀតណាមនឹងព្រមរុះរើតង់ទាំងនោះក្នុងពេលឆាប់ៗខាងមុខនេះផងដែរ។
កាលពីថ្ងៃទី ១២ខែមិថុនា ចលនានិស្សិតដើម្បីលទ្ធិប្រជាធិតេយ្យហៅកាត់ជាភាសាអង់គ្លេសថាSMD បានចេញសេចក្តីថ្លែងការណ៍របស់ខ្លួនមួយ ដោយជំរុញទៅដ្ឋាភិបាលលោកហ៊ុន សែន ត្រូវលើកយកបញ្ហាជម្លោះព្រំដែនជាមួយវៀតណាមពេលនេះ ដាក់ទៅកាន់សហប្រធានកិច្ចព្រមព្រៀងទីក្រុងប៉ារីស ឆ្នាំ១៩៩១។ លើសពីនេះ ក៏ត្រូវលើកយកករណីមួយចំនួនទៀត ដូចជាចង្កោមកោះត្រល់ជាដើម ដាក់ប្តឹងទៅកាន់តុលាការយុត្តិធម៌អន្តរជាតិតែម្តង។ដោយឡែក ករណីបោះតង់របស់យោធាវៀតណាម កើនឡើងចំនួន ២៥៦ នៅតាមព្រំកម្ពុជា ចលនានិស្សិតដើម្បីលទ្ធិប្រជាធិតេយ្យយល់ឃើញថា គឺជាការរំលោភឈ្លានពានលើអធិបតេយ្យ និងបូរណភាពទឹកដីខ្មែរ ព្រមទាំងធ្វើឲ្យប៉ះពាល់ធ្ងន់ធ្ងរដល់ស្ថេរភាព និងសន្តិភាពក្នុងតំបន់អាស៊ានទៀតផង។ក្រៅពីទាមទារឱ្យអាជ្ញាធរខ្មែរបន្តធ្វើយ៉ាងណាជំរុញឱ្យ ទាហានវៀតណាម ត្រូវរុះរើជំរុំ និងតង់ទាំងអស់ចេញពីព្រំដែនកម្ពុជា SMD ក៏ទាមទារដ្ឋាភិបាលលោកហ៊ុន សែន ត្រូវពិចារណាឡើងវិញ ជំរុញការដាក់«មោក្ខភាព» នូវកិច្ចព្រមព្រៀង និងសន្ធិសញ្ញាមិនស្មើភាពគ្នា រវាងកម្ពុជា-វៀតណាមកាលពីពេលកន្លងមកទាំងអស់ផងដែរ៕