សមាគមរោងចក្រកាត់ដេរនៅកម្ពុជាហៅកាត់ថាGMAC និងសមាគមស្បែកជើងនៅកម្ពុជាហៅកាត់ថា CFA បានស្នើទៅសហភាពអឺរ៉ុបជាថ្មីទៀត ដោយសុំពន្យារពេលក្នុងការអនុវត្តន៍នីតិវិធីព្យួរប្រព័ន្ធអនុគ្រោះពន្ធ EBA ២០% ពីកម្ពុជា។
សេចក្ដីថ្លែងការណ៍របស់ GMAC និងCFA ដែលស្នើអឺរ៉ុបបន្ថែមទៀតនេះ គឺសុំឲ្យរង់ចាំ១២ខែទៀត ចាំយកពន្ធ២០% ដែលគណៈកម្មការអឺរ៉ុបបានសម្រេចកាលពីខែកុម្ភៈ ហើយនីតិវិធីនេះនឹងចាប់ផ្តើមអនុវត្តពីខែសីហាទៅ។
ការសម្រេចព្យួរប្រព័ន្ធអនុគ្រោះពន្ធ EBA ២០ភាគរយនេះ គឺ កំណត់ទៅលើមុខទំនិញប្រមាណ៤០ប្រភេទ ក្នុងទំហំទឹកប្រាក់ប្រមាណ ១ពាន់លានដុល្លារសហរដ្ឋអាមេរិក ដែលកម្ពុជាត្រូវបង់ពន្ធលើទំនិញទាំងនោះប្រមាណ១រយ លានដុល្លារក្នុងមួយឆ្នាំ។
ការសម្រេចព្យួរប្រព័ន្ធអនុគ្រោះពន្ធEBA ២០ភាគរយនេះ ជាការព្រមានរបស់សហភាពអឺរ៉ុបមកលើរដ្ឋាភិបាលលោកហ៊ុន សែន ក្រោយពេលពួកគេរកឃើញថារដ្ឋាភិបាលនេះមិនបានធ្វើឱ្យប្រសើរឡើយ នូវលំហសិទ្ធិ សេរីភាពពពលរដ្ឋ ការស្តារលទ្ធិប្រជាធិបតេយ្យ ការគោរពសិទ្ធិមនុស្ស សិទ្ធិការងារជាដើម។សមាគមទាំងពីរនេះ ព្រួយបារម្ភថា វិស័យកាត់ដេរនៅកម្ពុជា នឹងកាន់តែដុនដាប ហើយអាចនឹងដួលរលំ ក្រោយបាត់ផ្នែកណាមួយនៃប្រព័ន្ធអនុគ្រោះពន្ធ EBA ។
ក្រុមអ្នកតំណាងនយោជក មើលឃើញថា អ្នកបញ្ជាទិញនឹងងាកការបញ្ជាទិញទៅកាន់ប្រទេសដែលមានប្រព័ន្ធអនុគ្រោះពន្ធ EBA ពេញលេញ ដែលនឹងធ្វើឱ្យវិស័យឧស្សាហ៍កម្មកាត់ដេរ អាចប្រឈមហា និភ័យខ្ពស់សម្រាប់សង្គមជាតិទាំងមូល ខណៈដែលវិស័យនេះជាឆ្អឹងខ្នងសេដ្ឋកិច្ចជាតិមួយផ្នែក ដោយជួយផ្តល់ការងារដល់ពលរដ្ឋជិត១លានកន្លែង ហើយបើវិស័យនេះដួលរលំពលរដ្ឋកម្ពុជារាប់លាននឹងរងផលបះពាល់។
ទោះបីជាយ៉ាងនេះក្តីមកទល់ពេលបច្ចុប្បន្នរដ្ឋាភិបាល នៅមិនទាន់បង្ហាញជំហរបន្ទន់ឥរិយាបថណាមួយ ដើម្បីការពារប្រព័ន្ធអនុគ្រោះពន្ធនេះមិនឱ្យបាត់បង់ឡើយ។ ផ្ទុយទៅវិញរដ្ឋាភិបាលលោក ហ៊ុន សែន មានតែផ្កើនសហភាពអឺរ៉ុប និងសហគមន៍អន្តរជាតិផ្សេងទៀត តាមរយៈតាមកម្ទេចមតិរិះគន់ ពិសេសក្រុមបក្សប្រឆាំងឥតឈប់ឈរ។
កាលពីថ្ងៃទី១ ខែមិថុនា លោកហ៊ុន សែន បានបន្តព្រមានកម្ទេចក្រុមបក្សប្រឆាំងឱ្យវិនាសសាបសូន្យ តាមរយៈការប្រើយុទ្ធសាស្ត្រកាត់ក្បាល បំបែកដងខ្លួនពួកបក្សសង្រ្គោះជាតិឱ្យអស់ ប្រសិនបើពួកគេហ៊ានយកបញ្ហានៃវិបត្តិជំងឺកូវីដ១៩ ដើម្បីផ្តួលរំលំរដ្ឋាភិបាលរបស់ លោក។
ក្រុមអ្នកតាមដានសង្គមនៅតែផ្តល់អនុសាសន៍ឱ្យអ្នកនយោបាយខ្មែរ ពិសេសប្រមុខដឹកនាំ វិលទៅការចរចាររវាងខ្មែរនិងខ្មែរ ដើម្បីបញ្ចៀសគ្រោះអាសន្នសេដ្ឋកិច្ច ដែលនឹងឈានទៅរកវិបត្តិសង្គមកាន់តែធ្ងន់ធ្ងរ។ជាមួយគ្នានេះ យុទ្ធសាស្ត្រតាមកម្ទេចក្រុមបក្សប្រឆាំងនោះ នឹងមិនបានប្រយោជន៍អ្វីសម្រាប់ជាតិឡើយ មានតែបង្ហាញឱ្យឃើញកាន់តែច្បាស់ពីភាពបែកបាក់ជាតិកាន់តែខ្លាំង៕