សមាគមរោងចក្រកាត់ដេរនៅកម្ពុជា ហៅកាត់ថាGMAC បានស្នើរដ្ឋាភិបាលពន្យារពេលក្នុងការជជែកគ្នាអំពីបញ្ហាប្រាក់ឈ្នួលអប្បរមា សម្រាប់ឆ្នាំ២០២១ ដោយអនុវត្តប្រាក់ឈ្នួលឆ្នាំចាស់ឆ្នាំ២០២០នេះ រហូតដល់ស្ថានភាពវិស័យនេះវិលត្រឡប់ទៅរកភាពប្រសើរ។
ក្នុងសេចក្តីថ្លែងការណ៍របស់ខ្លួនកាលពីថ្ងៃម្សិលមិញ GMAC លើកឡើងថាការចរចាប្រាក់ប្រាក់ឈ្នួលសម្រាប់ឆ្នាំ២០២១ គួរត្រូវបានពន្យាពេល រហូតដល់វិស័យមួយនេះ អាចត្រឡប់ទៅសភាពដើមវិញ។GMAC បានលើកឡើងទៀតថា ស្ថិតនៅក្នុងស្ថានភាពបច្ចុប្បន្នវិស័យវាយនភណ្ឌកាត់ដេរ និងផលិតស្បែកជើងកំពុងមានភាពផុយស្រួយ និងមានភាពមិនច្បាស់លាស់ក្នុងការវិលត្រឡប់ទៅរកសភាពដើមវិញ ឬក៏អាចនិយាយបានថាការធ្វើឱ្យប្រសើរឡើងវិញនូវវិស័យនេះ ត្រូវចំណាយពេលយូរ។
លើសពីនេះទៀត មានរោងចក្រ សហគ្រាសជាច្រើនក្នុងវិស័យនេះ បានសម្រេចចិត្តព្យួរការងារនិងមានរោងចក្រជាច្រើនកំពុងបិទទ្វារ។ បញ្ហានេះ GMAC ថាយន្តការគាំទ្រនានាដល់វិស័យនេះ ឬការផ្អាកជាបណ្តោះអាសន្នក្នុងការចរចារប្រាក់ឈ្នួលឆ្នាំ២០២១គឺជាវិធានការចាំបាច់ក្នុងការរក្សាលំនឹងដល់វិស័យនេះមិនឱ្យដួលរលំ ហើយមានជីវិតបន្តទៀត ព្រមទាំងជួយរក្សាការងារជូនបងប្អូននយោជិតផងដែរ។
បច្ចុប្បន្នប្រាក់ឈ្នួលអប្បរមារបស់កម្មករនិយោជិតក្នុងវិស័យវាយនភណ្ឌកាត់ដេរ និងផលិតស្បែកជើង មានចំនួន១៩០ដុល្លារក្នុងមួយខែ។ទោះបីជាយ៉ាងនេះក្តី ប្រធានសហជីពចលនាកម្មករកម្ពុជា លោក ប៉ាវ ស៊ីណា លើកឡើងថា ផលប៉ះពាល់ដោយសារកូវីដ មានដូចគ្នារវាង និយោជក និងកម្មករនិយោជិត តែកម្មករហាក់រងផលប៉ះពាល់ធ្ងន់ជាងនិយោជក ព្រោះផលប្រយោជន៍មួយចំនួនដែលកម្មករធ្លាប់ទទួលបានពីមុនមក ត្រូវបានឈប់ផ្តល់អោយ។បន្ថែមពីនេះ ប្រាក់រំលឹកអតីតភាពការងារមុនឆ្នាំ២០១៩ និងប្រាក់បំណាច់ការងារឆ្នាំ២០២០ ដែលនឹងត្រូវបើកនៅក្នុងខែមិថុនានេះ ក៏ត្រូវបានពន្យាពេលទៅឆ្នាំ២០២១ វិញ។
ដោយឡែកលោកថា ខាងសមាគមរោងចក្រកាត់ដេរនៅកម្ពុជា ចង់អោយពន្យាពេលចរចាប្រាក់ឈ្នួល សម្រាប់ឆ្នាំ២០២១ ថែមទៀត។លោកបន្តថា ស្ថិតក្នុងស្ថានភាពដ៏លំបាកបែបនេះ បើមិនមានលទ្ធភាពក្នុងការលើកទឹកចិត្តបន្ថែមដល់កម្មករទេ ក៏មិនគួរកាត់បន្ថយឬពន្យាពេលផ្តល់នូវផលប្រយោជន៍ដែលកម្មករធ្លាប់ទទួលបាននោះឡើយ ៕