ពលរដ្ឋខេត្តព្រះសីហនុនាំគ្នារអ៊ូរទាំ ចំពោះនីតិវិធី នៃការបំពេញបែបបទផ្ទេរកម្មសិទ្ធិ ឬកាត់ឈ្មោះរថយន្ត ពីម្ចាស់ដើម ទៅម្ចាស់កម្មសិទ្ធិបន្ត របស់មន្ត្រីមន្ទីរសាធារណការ និងដឹកជញ្ជូនខេត្តព្រះសីហនុ ថាមានភាពយឺតយ៉ាវ ឬអូសបន្លាយពេលយូរថ្ងៃពេក។
ពួកគេស្នើដល់ លោក បូរី វង្សសានិត្យ ប្រធានមន្ទីរសាធារណការ និងដឹកជញ្ចូនខេត្តព្រះសីហនុ ឲ្យជួយពិនិត្យដំណើរការ នៃកសរអនុវត្តនីតិវិធី របស់មន្ត្រីកហរោមឱវាទ ដើម្បីឈានទៅពន្លឿនការផ្ទេរកម្មសិទ្ធិ រថយន្ត ជូនពួកគាត់ឲ្យបានឆាប់។
ក្រុមប្រជាពលរដ្ឋ និយាយចំៗថា ការកកស្ទះ និងភាពយឺតយ៉ាវ ទៅលើសំណុំឯកសសរស្នើផ្ទេរកម្មសិទ្ធិ ឬកាត់ឈ្មោះរថយន្តនៅមន្ទីរសាធារណការខេត្តព្រះសីហនុ នេះ គឺបានកកស្ទះនៅកន្លែងត្រួតពិនិត្យបច្ចេកទេសទិន្នន័យរថយន្តតែម្តង។ម្ចាស់រថយន្តដែលបានដាក់សំណើរសុំផ្ទេរកម្មសិទ្ធិរថយន្តមួយចំនួន បានអះអាងថា ឯកសារទាំងអស់ ដែលពួកគាត់បានបំពេញរួច រួមមាន ការបង់ពន្ធប្រថាប់ត្រានៅសាខាពន្ធដារខេត្ត និងការបង់ប្រាក់សេវាផ្ទេរកម្មសិទ្ធិនៅមន្ទីរសាធារណការខេត្តព្រះសីហនុ ប៉ុន្តែបែរជា ឯកសារមួយចំនួន បានជាប់គាំងយូរថ្ងៃនៅកន្លែងត្រួតពិនិត្យបច្ចេកទេស រថយន្តទៅវិញ។
ចំពោះករណីជាប់គាំងនេះ ប្រជាពលរដ្ឋ បានទទូចដល់លោក បូរី វង្សសានិត្យ ប្រធានមន្ទីរសាធារណការ និងដឹកជញ្ចូនខេត្តព្រះសីហនុ ឲ្យជួយពិនិត្យពន្លឿន និងជួយណែនាំដល់ប្រជាពលរដ្ឋ ដែលបានដាក់សំណើរកាត់ឈ្មោះ ឬផ្ទេរកម្មសិទ្ធិទាំងនោះវិញ។ ជាងនេះទៀត ប្រសិនបើក្នុងករណី មានឯកសារណាមួយមិនគ្រប់គ្រាន់ ឬខ្វះចន្លោះ ក្នុងការបំពេញបែបបទសុំផ្ទេរកម្មសិទ្ធិ ឬកាត់ឈ្មោះរថយន្តនេះ សូមជួយប្រាប់ ឬណែនាំពួកគាត់បំពេញបន្ថែម ដោយមិនត្រូវបង្កក ឬផ្អឹបឯកសារចោលនោះទេ។
ពាក់ព័ន្ធនឹងការកាត់ ឬផ្ទេរឈ្មោះកម្មសិទ្ធិរថយន្តនេះ ក្រោយការជូនដំណឹង របស់ក្រសួងសាធារណការ និងដឹកជញ្ជូនអំពីការផ្ទេរកម្មសិទ្ធិរថយន្តពីម្ចាស់ដើមនេះ គេសង្កេតឃើញថា មានប្រជាពលរដ្ឋខេត្តព្រះសីហនុជាច្រើន នាំគ្នាចូលទៅបំពេញនីតិវិធីតាមការជូនដំណឹងនោះ មួយថ្ងៃៗមានចំនួនរាប់រយគ្រឿង។
យ៉ាងនេះក្តី ប្រជាពលរដ្ឋរស់នៅខេត្តព្រះសីហនុ អះអាងថា ឯកសារ របស់ពួកគាត់ ដែលយឺតយ៉ាវនេះ គឺនៅកន្លែងមន្ត្រីជំនាញពិនិត្យបច្ចេកទេសរថយន្ត មុនពេលបញ្ជូនបន្តទៅថ្នាក់ដឹកនាំមន្ទីរសាធារណការ និងដឹកជញ្ជូនខេត្តព្រះសីហនុដើម្បីពិនិត្យសម្រេចចុងក្រោយ។ពួកគេនិយាយថា ចំពោះលិខិតបទដ្ឋានផ្សេងៗ ដែលបានដាក់សំណើរផ្ទេរកម្មសិទ្ធិ ឬកាត់ឈ្មោះរថយន្តនេះ គឺពួកគាត់ បានអនុវត្តស្របតាមនីតិវិធី ដោយមានចុះថ្ងៃខែឆ្នាំត្រឹមត្រូវ ប៉ុន្តែប្រសិនបើពិតជាត្រូវអូសបន្លាយពេលយូរថ្ងៃ ឬមានបញ្ហាបច្ចេកទេសអ្វីមួយ គឺ ថ្នាក់ដឹកនាំ នៃមន្ទីរសាធារណការ និងដឹកជញ្ជូនខេត្តព្រះសីហនុ អាចជូនដំណឹង ដល់ពលរដ្ឋឲ្យពួកគាត់បានដឹងអំពីពេលវេលាពិតប្រាកដ នៃចំនួនថ្ងៃក្នុងការផ្ទេរកម្មសិទ្ធិ ឬការកាត់ឈ្មោះម្ចាស់កម្មសិទ្ធិរថយន្តពីម្ចាស់ដើម ទៅម្ចាស់គ្រប់គ្រងបន្ត ដើម្បីបង្ការកុំឲ្យប៉ះពាល់ដល់គោលនយោបាយរបស់រាជរដ្ឋាភិបាល និងគោលការណ៍របស់ក្រសួងសាធារណការ និងដឹកជញ្ជូនផងដែរ។
គេហទំព័រ “កម្ពុជាថ្ងៃនេះ” www.camday.news បានដកស្រង់សម្តី របស់មន្ត្រីទទួលខុសត្រូវផ្នែកត្រួតពិនិត្យទិន្នន័យ នៃមន្ទីរសាធារណការ និងដឹកជញ្ជូនខេត្តព្រះសីហនុ មកចុះផ្សាយបានឲ្យដឹងថា ការយឺតយូរខ្លះៗ ក្នុងការផ្ទេរកម្មសិទ្ធិរថយន្តនេះ គឺដោយសារការផ្ទៀងផ្ទាត់ឯកសារតាមនីតិវិធី ត្រូវធ្វើយ៉ាងលំអិត ឬភាពយឺតយ៉ាវខ្លះបណ្តាលមកពីម្ចាស់រថយន្តមួយចំនួន នៅខ្វះឯកសារ សម្រាប់ផ្ទេរកម្មសិទ្ធិ ឬកាត់ឈ្មោះរថយន្តទាំងនោះ។
យ៉ាងនេះក្តី មន្ត្រីបច្ចេកទេសមន្ទីរសាធារណការខេត្តព្រះសីហនុ បានបញ្ជាក់ថា នឹងខិតខំធ្វើការដោះស្រាយពន្លឿន លើការងារផ្ទេរកម្មសិទ្ធិ ឬកាត់ឈ្មោះរថយន្ត ជូនប្រជាពលរដ្ឋ ឲ្យបានឆាប់តាមដែលអាចអនុវត្តទៅបាន។កន្លងមកនេះ ក្រសួងសាធារណការ និងដឹកជញ្ជូនខេត្តព្រះសីហនុ បានប្រកាសណែនាំថា ចំពោះការផ្ទេរកម្មសិទ្ធិយានយន្ត ដែលរកម្ចាស់ដើមមិនឃើញ នឹងត្រូវបញ្ចប់ត្រឹមថ្ងៃទី៣០ ខែមិថុនា ឆ្នាំ២០២០។
ផ្តើមពីបញ្ហានេះ ក្រសួងសាធារណការ និងដឹកជញ្ជូន ក៏បានផ្ញើសារកើនរំឮកជាថ្មីម្តងទៀត បន្ថែមពីលើសេចក្តីណែនាំ ” ការផ្ទេរកម្មសិទ្ធិយានយន្ត ដែលរកម្ចាស់ដើមមិនឃើញ ” ដល់ពលរដ្ឋ ដែលកំពុងកាន់កាប់យានយន្ត ទិញលក់តៗគ្នារកម្ចាស់ដើមមិនឃើញ ត្រូវដាក់ពាក្យស្នើសុំផ្ទេរកម្មសិទ្ធិយានយន្ត ឲ្យបានមុនថ្ងៃទី៣០ ខែមិថុនា ឆ្នាំ២០២០ខាងមុខនេះ។ ជាងនេះទៅទៀតក្រសួងបានស្នើដល់ម្ចាស់កម្មសិទ្ធិយានយន្តទាំងអស់ ត្រូវរួសរាន់ដាក់ពាក្យស្នើសុំ ឲ្យបានទាន់ពេលវេលាកំណត់៕