នៅក្នុងសមាគមអាស៊ាន មាន១០ប្រទេស ។ សមាគមនេះ មានប្រទេសចំនួន ២នៅតែអនុវត្តរបបនយោបាយបែបសង្គមនិយម គឺប្រទេសវៀតណាម និងឡាវ។ ដោយឡែកប្រទេស ព្រុយណេ ជារបបរាជានិយម។
ប្រទេសថៃ ម៉ាឡេស៊ី និងកម្ពុជា ជាប្រទេសរាជានិយមដូចគ្នា តែអនុវត្តរបបប្រជាធិបតេយ្យពហុបក្ស ដែលព្រះមហាក្សត្រ គឺជាប្រមុខរដ្ឋ ជានិម្មិតរូបនៃ ការផ្សះផ្សាជាតិ និងតំណាងអធិបតេយ្យជាតិ។សម្រាប់ ប្រទេសសិង្ហ បុរី គឺខុសពីប្រទេស ឥណ្ឌូណេស៊ី ហ្វីលីពីន និងភូមា ដែល ប្រមុខរដ្ឋគឺជាអ្នកគ្រប់គ្រង នីតិប្រតិបត្តិគឺ មានន័យថា អំណាច ប្រធានាធិបតី និងសភា មានតុល្យភាពនឹងគ្នាខ្លាំងណាស់។
សិងបុរី ទោះជាប្រធានាធិបតី ជាប្រមុខរដ្ឋក៏ដោយ តែអំណាចនីតិប្រតិបត្តិ ទៅលើនាយករដ្ឋមន្ត្រី គឺដូចប្រទេស រាជាណាច ថៃ ម៉ាឡេស៊ី និងកម្ពជាផងដែរ។ ប្រទេសតូចមួយនេះ ដែលមានប្រជាជន ជាង៥លាន ៦សែននាក់ បានកំពុងធ្វើដំណើរទៅរកការបោះឆ្នោតសភាឡើងវិញ។
នាយករដ្ឋមន្ត្រីសិង្ហបុរីលោក លី សៀនឡុង កាលពីថ្ងៃអង្គារទី២៣ ខែមិថុនា បាននិយាយថា លោកបានផ្ដល់យោបល់ឱ្យលោកស្រីប្រធានាធិបតី ហាលីម៉ាហ៍ យ៉ាខូប (Halimah Yacob) រំលាយសភាចោល និងចេញបញ្ជារៀបចំការបោះឆ្នោតសភាមុនអាណត្តិ។
តាមមបណ្ដាញផ្សាយព័ត៌មាន Channel News Asia លោក លី សៀនឡុង បានប្រកាស បែបនេះនៅក្នុងសុន្ទរកថា តាមកញ្ចក់ទូរទស្សន៍ ទៅកាន់ប្រជាជាតិសិង្ហបុរី។ លោក លី បានថ្លែងថា ការបោះឆ្នោតនៅពេលនេះ នឹងលុបចោលបញ្ហាដែលនៅសេសសល់ ហើយវានឹងផ្ដល់អាណត្តិប្រាំឆ្នាំ ដល់រដ្ឋាភិបាលថ្មី ដើម្បីផ្ដោតសំខាន់លើកិច្ចការជាតិ និងការសម្រេចចិត្តដ៏លំបាកនានាដែលត្រូវធ្វើ។តែការពិតអាណត្តិនៃរដ្ឋាភិបាលបច្ចុប្បន្ន ដែលលោកលី ជានាយករដ្ឋមន្ត្រី នឹងត្រូវផុតនៅខែមេសា ឆ្នាំ២០២១។
ការបោះឆ្នោតសភានឹងកំណត់ធ្វើនៅថ្ងៃទី១០កក្ដដា ឆ្នាំ២០២០នេះ។ បើតាមច្បាប់បោះឆ្នោតរបស់ប្រទេស នេះ បើសភាផុតអាណត្តិតាមនីតិកាលរបស់ខ្លួន គឺការរៀបចំការបោះឆ្នោត រយៈពេល៣ខែទៅមុខទៀតនៅពេលសមាជិកសភាអង្គុយក្នុងអាសនៈរបស់ខ្លួន។ អាសនៈសភានៃប្រទេសសិង្ហបុរីមាន១០៥ អាសន។
នៅមុនធ្វើសេចក្ដី សម្រេចចិត្តនេះ នាយករដ្ឋមន្ត្រីលី បានអះអាងថា លោកត្រូវតែធានារឿង ២ ឱ្យបាននោះគឺអ្នកបោះឆ្នោតអាចទៅបោះឆ្នោតដោយសុវត្ថិភាពទោះបីប្រទេសនេះ ធ្លាក់ក្នុងស្ថានភាពនៃជំងឺកូវិដក៏ដោយ ហើយរឿងមួយទៀតគឺគណបក្សនយោបាយអាចធ្វើយុទ្ធនាការឃោសនា ដោយមិនមានការព្រួយបារម្ភអ្វីឡើយទាំងសិទ្ធិសេរីភាពនៃការឆន្ទៈនយោបាយ។
បន្ទាប់ពីលោក លីប្រកាសដូចនេះ គឺខុទ្ទកាល័យនាយករដ្ឋមន្ត្រី ក៏បានប្រកាសថា លោកស្រី Halimah Yacob ប្រធានាធិបតីបានសម្រេចរំលាយសភាហើយនៅពេលនេះ ដោយកំណត់អោយជ្រើសរើសបេក្ខជនឈរឈ្មោះសមាជិកភា នឹងត្រូវបានធ្វើឡើងថ្ងៃទី៣០ ខែមិថុនា ឆ្នាំ២០២០។ចំណែកកាលបរិច្ឆេទនៃការបោះឆ្នោត ត្រូវបានគណៈកម្មាការរៀបចំការបោះឆ្នោត ប្រទេសនេះសម្រេចយកថ្ងៃទី១០ ខែកក្កដា ឆ្នាំ២០២០ ។
ជាការកត់សំគាល់ គឺស្របពេល ដែលមានការវិវត្តន៍នយោបាយដូចនេះ បែរជាភាពលិចធ្លោមួយកើតឡើងគឺលោក លី សៀនយ៉ាង( Lee Hsien Yang )ដែលជាប្អូនប្រុសបង្កើតរបស់នាយករដ្ឋមន្ត្រី លោក លី សៀនឡុង សម្រេចចិត្តចូលរួមជាមួយគណបក្សសិង្ហបុរីរីកចម្រើនទៅមុខ (Progress Singapore Party) ដែលជាបក្សប្រឆាំងដ៏ធំមួយ ។លោក Tan Cheng Bock ប្រធានបក្សនេះ បាន ប្រកាសព័ត៌មានអោយមហាជនដឹង នៅព្រឹកថ្ងៃពុធនេះគឺ ថា លី សៀនយ៉ាង បានសម្រេចចូលបក្សសិង្ហបុរីរីកចម្រើនទៅមុខហើយនៅពេលនេះ គឺលោកក្លាយជាសមាជិកផ្លូវការរបស់បក្សចាប់ពីពេលនេះតទៅ។
លោក លី សៀន យ៉ាង សម្រេចចិត្តចូលរួមជាមួយគណបក្សប្រឆាំង គឺជាសាច់ឈាមនឹងលោកនាយករដ្ឋលី ដែលធ្លាប់បង្ហោះសារមួយនៅលើ Facebook កាលពីដើមឆ្នាំ២០២០ ថា លោក Tan គឺពិតជាសក្តិសមធ្វើជាមេដឹកនាំសិង្ហបុរីសម្រាប់ជំនាន់ក្រោយ។ ទាំងលោក លី សៀន យ៉ាង និងប្អូនស្រី គឺអ្នកស្រី លី វៃលីង (Lee Wei Ling) តែងតែរិះគន់ការដឹកនាំរបស់លោក លី សៀនឡុង។ប៉ុន្តែការវាយប្រហារបងប្រុសខ្លួនឯងដូចនេះ គឺបន្ទាប់ពី គ្រួសារត្រកូលលីទាំងបីរូបនេះមានជម្លោះក្នុងគ្រួសារ ពាក់ព័ន្ធនឹងអតីតផ្ទះរបស់ឪពុកគឺលោក លី ក្វាន់ យូដែលជានាយករដ្ឋមន្ត្រីដំបូងគេនៃសាធារណៈរដ្ឋសិង្ហបុរី។ តែ គ្មានអ្វីព្រួយបារម្ភទេ សម្រាប់ ប្រទេសសេដ្ឋកិច្ចជឿនលឿនមួយនេះ។
ការដែលនាយករដ្ឋមន្ត្រីសុំគោលការណ៍ពីប្រធានាធិបតី រំលាយសភា ហើយបោះឆ្នោតមុនអាណត្តិគឺជាការ បង្ហាញនូវភាពក្លាហានមួយរួចទៅហើយ ដោយមិនទុកអោយវិបត្តិនយោបាយអូសបន្លាយយូរ ដូចប្រទេសមួយចំនួនក្នុងសមាគម អាស៊ាននោះទេ។ នេះជាការកត់សំគាល់របស់ អ្នកសង្កេតការណ៍ ។ប្រទេសមួយចំនួនក្នុងតំបន់ បើទោះជាពលរដ្ឋ ចង់អោយមានការបោះឆ្នោតមុនអាណត្តិសភា ដើម្បីឆាប់បញ្ចប់វិបត្តិនយោបាយនិងមានការផ្សះផ្សានឹងបក្សមានជំលោះនឹងគ្នាក្ដី គឺមិនបានគិតដូចនេះទេ។
គេថាការរត់តាមអាណត្តិរបស់សភា ជាជាងចាញ់នៅក្នុងបោះឆ្នោត។តែប្រទេសខ្លះមិនត្រូវតាំងចិត្តដូចសិង្ហបុរី ដែលមាននាយករដ្ឋមន្ត្រី លោក លី សៀនឡុង ជាអ្នកនយោបាយ ក្លាហាននោះទេ បែរជាបណ្ដោយអោយមានរដ្ឋប្រហារទៀតផង ហើយទីបំផុតអំណាចនីតិប្រតិបត្តិធ្លាក់ទៅលើពួកយោធា។យ៉ាងណា រាជាណាចក្រម៉ាឡេស៊ី ដែលកំពុងធ្លាក់ក្នុងវិបត្តិនៃនីតិបញ្ញត្តិ គឺនាយករដ្ឋមន្ត្រីថ្មី របស់ប្រទេសនេះ លោក ម៉ូហ៊ីឌីន យ៉ាស៊ីន ក៏នឹង ត្រៀម ប្រកាស រំលាយសភា ហើយបោះឆ្នោតសភាឡើងវិញ នៅចុងឆ្នាំ២០២០ ឬក៏ដើមឆ្នាំ២០២១៕