ជនផ្ដាច់ការម៉ាឌូរ៉ូដាក់ឱសានវាទឱ្យប្រេសិតសហភាពអឺរ៉ុបចេញពីវេណេហ្សូអេឡា ក្នុងរយៈពេល៧២ម៉ោង

ភាពតានតឹង រវាងរបបនៅប្រទេសវេណេហ្សូអេឡា មិនមែនមានតែជាមួយ​សហរដ្ឋអាមេរិក​នោះទេ  គឺមានទាំងសហភាពអឺរ៉ុបផងដែរ។ សហភាពគឺជាសហគមន៍ធំមួយមានសមាជិក ២៧ប្រទេស។

សហភាពអឺរ៉ុបមាន ស្ថានបេសកកម្ម របស់ខ្លួន នៅគ្រប់បណ្ដាប្រទេស ដែលមាន​ទំនាក់ទំនង​ការ​ទូត និងកិច្ចសហប្រតិបត្តិការទ្វេភាគី។ សហភាពអែរ៉ុប ជាសហគមន៍មួយដ៏មានឥទ្ធិពលមួយ​នៅក្នុងក្រសែភ្នែករបស់អន្តរជាតិ ជាពិសេស នៅក្រោមឆ័ត្ររបស់ អង្គការសហប្រជាជាតិ។ តែយ៉ាងណាក៏ដោយ សហភាពអឺរ៉ុបកំពុងបាក់មុខនៅលើឆាកអន្តរជាតិ ព្រោះតែរបបផ្ដាច់ការ​មួយនៅឧបទ្វីបអាមេរិកខាងត្បូង ដែលបានដាក់ឱសានវាទ បណ្ដេញឯកអគ្គរដ្ឋទូត របស់សហគមន៍មួយនេះ ចេញអោយផុតពីវេណេហ្សូអេឡាក្នុងរយៈពេល ៧២ម៉ោងប៉ុណ្ណោះ។ 

នេះគឺជាវិធានការសង​សឹកដែលសហភាពអឺរ៉ុបដាក់ទណ្ឌកម្មលើមន្រ្ដីវេណេហ្សូអេឡា ក្រោមរបបលោកនីកូឡាស់ម៉ាឌូរ៉ូដែលសហរដ្ឋអាមេរិក និងក្រុមសិទ្ធិមនុស្ស ចាត់ទុកថា មេដឹកនាំផ្ដាច់ការ។

របបលោកលោកម៉ាឌូរ៉ូបានប្រកាស ទុកពេលឱ្យប្រេសិតសហភាពអឺរ៉ុបមួយរូបគឺអ្នកស្រី Isabel Brilhante Pedrosato រៀបបង្វិចចាកចេញពីប្រទេសរបស់​លោកក្នុងពេលតែ៧២ម៉ោង​ប៉ុណ្ណោះ គឺចាប់ពីថ្ងៃទី២៩ ខែមិថុនានេះតទៅ។

លោកម៉ាឌូរ៉ូបានថ្លែងក្នុងទូរទស្សន៍មួយដោយន័យដើមដូចថា៖ ខ្ញុំ សម្រេចទុកពេលឱ្យ​ឯកអគ្គរដ្ឋទូតអឺរ៉ុបរូបក្នុងរយៈពេល៧២ម៉ោងគឺត្រូវចាកចេញពីប្រទេសមួយនេះ។

លោកបានបញ្ជាក់ថា អ្នកស្រី Pedrosato អាចប្រើប្រាស់យន្ដហោះណាក៏បាន​ដែរ គឺត្រូវតែចាកចេញពីប្រទេសវេណេហ្សូអេឡ។

លោកម៉ាឌូរ៉ូក៏បានប្រកាសដែរថា អាណានិគមអឺរ៉ុបនៅលើទឹកដីរបស់​វេណេហ្សូអេឡា គឺឆ្អែតឆ្អន់​ណាស់ទៅហើយ។ នេះបើតាមការចុះផ្សាយរបស់ ទីភ្នាក់ងារសារព័ត៌មាន អង់គ្លេស Reuters បានរាយការណ៍នៅថ្ងៃទី៣០ មិថុនានេះ។

បញ្ជារបស់ម៉ាឌូរ៉ូធ្វើឡើងបន្ទាប់ពីប៉ុន្មានម៉ោងប៉ុណ្ណោះដែលក្រុមប្រឹក្សាសហភាពអឺរ៉ុបកាលពីថ្ងៃចន្ទទី២៩ ខែមិថុនានោះ បានដាក់ទណ្ឌកម្មលើមន្រ្ដីវេណេហ្សូអេឡាដល់ទៅ១១នាក់ ដែល​រួមមាន​សមាជិកសភា និងមេទាហានជាន់ខ្ពស់មួយចំនួន។

ការដាក់ទណ្ឌកម្មថ្មីទៀត លើមន្រ្ដីវេណេហ្សូអេឡានោះដោយសារតែមន្ត្រីទាំងនោះ គឺជាអ្នក​ទទួលខុសត្រូវពិសេសចំពោះការធ្វើ សកម្មភាពប្រឆាំងនឹងប្រជាធិបតេយ្យ និងសេរីភាពក្នុងរដ្ឋសភា ព្រោះតែសភានេះបានដក អភ័យឯកសិទ្ធិរបស់សមាជិកសភាមកពីបក្សប្រឆាំង៣ រូប។

ក្រុមប្រឹក្សារបស់សហភាពអឺរ៉ុបបញ្ជាក់ថា ថាបុគ្គលអស់ទាំងនោះជាឧបសគ្គនៃ ដំណោះស្រាយ​នយោបាយ និងប្រជាធិបតេយ្យដែលនាំអោយ​កើតមានវិបត្តិធ្ងន់ធ្ងរចំពោះប្រជាជន និងប្រទេស វេណេហ្សូអេឡា។ ទណ្ឌកម្មដែលសហភាពអឺរ៉ុបបានដាក់លើមន្ត្រី​នៃរបបលោកម៉ាឌូរ៉ូគឺការ​បង្កក​ទ្រព្យសម្បត្តិ និងការហាមមិនឱ្យធ្វើដំណើរ ទៅចូលទឹកដីអឺរ៉ុប។ យ៉ាងណាក៏ដោយ មានមន្រ្ដី​វេណហ្សូអេឡា៣៦នាក់ហើយដែលសហភាពអឺរ៉ុបបានដាក់ទណ្ឌកម្ម ក្នុងនោះមានទាំង​លោកម៉ាឌូរ៉ូផងដែរ។

វិធានការរបស់សហភាពអឺរ៉ុបនេះធ្វើឡើង បន្ទាប់ពី សហរដ្ឋអាមេរិកបានដាក់ទណ្ឌកម្មលើ​មន្ត្រីនៃរបបលោកម៉ាឌូរ៉ូដល់ជាង៦០នាក់ដោយបានរឹបអូសទ្រព្យសម្បត្តិរបស់មន្ត្រីទាំងនោះទៀតផង។

ប្រទេសជិត៦០ បានគាំទ្រ លោកវ័នហ្គៃដូជាមេដឹកនាំបក្សប្រឆាំងក្នុងឋានៈ ជាប្រធានាធិបតី​ស្ដីទីនៃប្រទេសមួយនោះព្រោះលោកកៃដូ គឺជាប្រធានរដ្ឋសភា ។

ប្រទេសទាំងនោះមួយចំនួនត្រូវបាន លោកបានម៉ាឌូរ៉ូ ចោទថាបានរួមគំនិតជាមួយ លោកហ្គៃដូប៉ុនប៉ង ទាញទំលាក់លោកពីអំណាច។

សហរដ្ឋអាមេរិកបានដាក់ទណ្ឌកម្មលើក្រុមហ៊ុនប្រេងរដ្ឋវេណេហ្សូអេឡា PDVSA។ កាលពីថ្ងៃ​ពុធ​សប្ដាហ៍មុន ក្រុងវ៉ាស៊ីនតុនក៏បានដាក់ទណ្ឌកម្ម​លើនាវាដឹកប្រេងរបស់អ៊ីរ៉ង់ចំនួន​ប្រាំទៀត​ដែលធ្វើ​ទំនាក់ទំនងនាំប្រេងចូលប្រទេសវេណេហ្សូអេឡាដែរ។

នាវាដឹកប្រេងទាំងប្រាំនោះគឺដឹកក្នុងទំហំប្រមាណ ១លាន ៥សែនបារ៉ែលដែលរដ្ឋមន្ត្រី​ការបរទេសអាមេរិក Mike Pompeo  ថាយកមកទ្រទ្រង់របបខុសច្បាប់ម៉ាឌូរ៉ូ។

សម្រាប់លោក ម៉ាឌូរ៉ូវិញ ចាត់ទុក អាមេរិកដែលកំពុងប្រើប្រាស់ទណ្ឌកម្មនេះថា ជាប្រទេស​ចក្រព័ត្របែបថ្មី មានផែនការសម្លាប់រដ្ឋាភិបាលរបស់លោកហើយលេប​យកធនធានធម្មជាតិ​ប្រេង​កាតរបស់ប្រទេសលោក។ លោកម៉ាឌូរ៉ូស្រែកជំទាស់ដូចនេះថា យើងមិនអនុញ្ញត​ឱ្យវេណហ្សូអេឡាក្លាយជាវៀតណាមនៅតំបន់អាមេរិកឡាទីននោះទេ។ ប៉ុន្តែម៉ាឌូរ៉ូខ្លួនឯងនេះ បានក្លាយជាមុខសញ្ញានៃការតាមចាប់ខ្លួនក្នុងតម្លៃខ្លួន១៥លានដុល្លារក្រោមដីការបស់ក្រសួងយុត្តិធម៌ អាមេរិក ព្រោះតែអាមេរិកចោទបុរសខ្លាំងម្នាក់នេះគឺ ជាឧក្រិដ្ឋជនជួញដូរគ្រឿនញៀន។

លោកម៉ាឌូរ៉ូ ក៏បានក្លាយជា ជនត្រូវតាមដានដោយតុលាការឧក្រិដ្ឋកម្មអន្តរជាតិ ICC ករណី ឧក្រិដ្ឋកម្មប្រឆាំងមនុស្សជាតិ ដោយការសម្លាប់ក្រុមប្រឆាំង និង ចាប់ខ្លួន ដាក់គុករាប់រយនាក់។ ខ្នងបង្អែកដ៏ខ្លាំងរបស់ លោកម៉ាឌូរ៉ូគឺមានចិន រុស្ស៊ី គុយបា តួកគី កូរ៉េខាងជើងនិងអ៊ីរ៉ង់៕

© 2020, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.