មន្ត្រីអយ្យការអមសាលាដំបូងខេត្តព្រះសីហនុ បានឲ្យដឹងថា អាជ្ញាធរជំនាញ ត្រៀមធ្វើពិធីដុតបំផ្លាញចោលគ្រឿងញៀន ដែលសមត្ថកិច្ច ចាប់បានជាវត្ថុតាងកន្លងមកជាសាធារណៈ នៅថ្ងៃទី២២ ខែកក្កដា ឆ្នាំ២០២០ខាងមុខនេះ ក្រោយវត្ថុតាងទាំងនោះ បានបញ្ចប់រឿងក្តីរួចរាល់អស់ហើយៗ ជនប្រព្រឹត្តបទល្មើស ក៏ត្រូវបានតុលាការសម្រេចផ្តន្ទាទោស ដាក់ពន្ធនាគារតាមទំហំទោសរួចហើយដែរ។
មន្ត្រីសាលាដំបូងខេត្តព្រះសីហនុ បានប្រាប់បណ្តាញផ្សព្វផ្សាយក្នុងស្រុកថា សកម្មភាព នៃការដុតបំផ្លាញគ្រឿងញៀននេះ នឹងត្រូវធ្វើរួមគ្នាចំនួនបួនខេត្តរួមមាន៖ ខេត្តព្រះសីហនុ, ខេត្តកោះកុង, ខេត្តកំពត និងខេត្តកែប។
ហើយថា ទីតាំងសម្រាប់ធ្វើពិធីដុតបំផ្លាញគ្រឿងញៀនខាងលើនេះ ជាផ្លូវការ នឹងត្រូវរៀបចំនៅមូលដ្ឋានខេត្តព្រះសីហនុ ដោយក្រសួងយុត្តិធម៌ សហការជាមួយអាជ្ញាធរពាក់ព័ន្ធ នៃរដ្ឋបាលខេត្តជាប់ឆ្នេរសមុទ្រទាំងបួន៕