ម្ចាស់​អចលនទ្រព្យ​ខ្លះ​នា​ខេត្ត​ព្រះសីហនុ ចាប់ផ្តើម​ដូរ​ចរិត​មករ​កធាតុ​ដើម​វិញ ក្រោយ​ជំពាក់​លុយ​ធនាគារ​វ័ណ្ឌក ខណៈ​អ្នកវិនិយោគទុន​ចិន មិនទាន់​ត្រឡប់​វិញ

មន្ត្រី​រាជការ​ថ្នាក់ទាប រួម​ជាមួយ​ពលរដ្ឋ​រស់នៅ​ក្រុង​ព្រះសីហនុ ជាពិសេស​មន្ត្រី​រាជការ និង​ពលរដ្ឋ​រស់នៅ​ផ្ទះ​ជួល​ឲ្យដឹង​ថា បុគ្គល​មួយចំនួន ដែល​នាំគ្នា​ដើរ​ទិញ លក់​ដី ឬសង់ផ្ទះ និង​សង់​អគារ​លោតឆ័ត្រ​ទុក​លក់ ឬជួល​ឲ្យ​អ្នកវិនិយោគទុន​ជនជាតិ​ចិន នៅមុន​ពេល​ចិន ចាកចេញ​ពី​ខេត្ត​ព្រះសីហនុ កាលពី​ចុងឆ្នាំ២០១៩ រហូត​មកទល់​ពេលនេះ​នៅ​មិនទាន់​វិលត្រឡប់​ចូល​ខេត្ត​ព្រះសីហនុ ច្រើន​កុះករ​ដូចដើម​វិញ​នៅឡើយ។

បច្ចុប្បន្ន​នេះ​ចំពោះ​បុគ្គល​មួយចំនួន ដែល​ធ្លាប់តែ​ជ្រួលជ្រើម ហើយ​មាន​អត្តចរិត​ក្រអើត​ក្រទម ពេលនេះ បុគ្គល ដែល​មាន​អចលនទ្រព្យ​ជួល​ឲ្យ​ចិន ទទួល​បាន​ប្រាក់ចំណូល​ខ្ពស់​ទាំងនោះ ហាក់​បាន​ងាក​មក​កែប្រែ​អត្តចរិត​ខ្លួន មករ​កធាតុ​ដើម​ឡើងវិញ ជា​បណ្តើរ​ៗហើយ។ ការ​ផ្លាស់​ប្តូរ​អត្តចរិត របស់​ក្រុម​មនុស្ស ឬបុគ្គល​អ្នករក​ស៊ី​អចលនទ្រព្យ​មួយចំនួន​នេះ ក៏​ព្រោះតែ​អ្នកវិនិយោគទុន​ចិន ដែល​បាន​ចាកចេញ​ពី​ខេត្ត​ព្រះសីហនុ កាលពី​ចុងឆ្នាំ២០១៩ ប៉ុន្តែ​រហូតមកដល់​ខែកក្កដា ឆ្នាំ២០២០ទៅ​ហើយ នៅឡើយ​វត្តមាន​អ្នកវិនិយោគទុន​ចិន ឬអាជីវករ​ចិន​ទាំងនោះ មិនទាន់​វិល​ចូល​កម្ពុជា​វិញ​នៅឡើយ។

សម្រាប់​មន្ត្រី​រាជការ និង​ពលរដ្ឋ​រស់នៅ​ផ្ទះ​ជួល បាន​អះអាង​ថា ក្រោយ​អ្នកវិនិយោគទុន​ចិន បាន​សម្រុកចូល​មករ​កស៊ី នៅក្នុង​ទីប្រជុំជន​ក្រុង​ព្រះសីហនុ ហើយ​អ្នកមាន​អចលនទ្រព្យ សម្រាប់​លក់ ជួល​ដី ផ្ទះ ឬអគារ ឲ្យ​ចិន មានតម្លៃ​ខ្ពស់​ចាប់ពី ១រាប់​ម៉ឺន រហូតដល់​រាប់​សិប​ម៉ឺន​ដុល្លារ​អាមេរិក ក្នុង​មួយ​ខែៗ​នោះ គឺ​ពួក​គេ បែរជា​បាន​កែប្រែ​អត្តចរិត​ដើម ដែល​ធ្លាប់​រួសរាយ​រាក់ទាក់ និង​មាន​សុជីវធម៌ ក្នុង​ការ​និយាយ​ស្តី​កន្លងមក ដោយ​ប្តូរ​ទៅ​មាន​អត្តចរិត​ផ្ទុយ​ស្រឡះ​ពីអ​ត្ត​ចរិត​ដើម របស់​ពួក​គេ។

ក្រុម​មនុស្ស ឬបុគ្គល​មួយចំនួន​នោះ នៅ​គ្រា​ពួក​គេ​រកចំណូល​បាន​ច្រើន ពី​ការជួល​ផ្ទះ​, សណ្ឋាគារ​, អគារ​ផ្សេង​ៗ និង​ដី ឲ្យ​ចិន​បាន​តម្លៃ​ខ្ពស់ ក៏បាន​ប្រែក្លាយ​អត្តចរិត ដែល​ធ្លាប់​មាន​ពីមុន ទៅ​មាន​ចរិត​ក្រអើត​ក្រទម អ៊ួ​តអាង ឈ្លើយ ច្រ​លើ​មច្រលើស​បើស ឬពាក្យ​ម្យ៉ាង​គេ​និយម​និ​យា​យតៗ​គ្នា​ថា មានដំណើរ​បូស​ឃ្លៀ​កនោះ។ ប៉ុន្តែ​ភាព​ក្រអើត​ក្រទម​ខាងលើ​នេះ ក៏​ត្រូវ​បាន​ប្តូរ ភ្លាម​ៗដែរ ដោយ​គិត​ចាប់ពី​ថ្ងៃទី២៥ ខែធ្នូ ឆ្នាំ២០១៩ បន្ត​រហូតមកដល់​ថ្ងៃទី២២ ខែកក្កដា ឆ្នាំ២០២០នេះ សង្កេតឃើញ​ថា​ក្រុម​មនុស្ស ដែល​មានដំណើរ​បូស​ឃ្លៀ​ក ពេល​ចិន​ចូល​មក​ខេត្ត​ព្រះសីហនុ​ច្រើន ក៏បាន​ប្តូរ​ពី​មានដំណើរ​បូស​ឃ្លៀ​កម​កមានដំណើរ​ធម្មតា ជា​បណ្តើរ​ៗឡើងវិញ​ហើយ។

ជាង​នេះ​ទៀត ពួក​គេ​ក៏បាន​ផ្លាស់​ប្តូរ​អត្តចរិត ពី​មាន​ទង្វើ​អើត​ក្រ​ទម​ច្រ​លើ​មច្រលើស​បើស មក​មាន​សភាព​ធម្មតា​វិញ​ដែរ។ ដោយឡែក ងាក​មក​បច្ចុប្បន្នភាព នៃ​តម្លៃ​ផ្ទះ​, អគារ​, សណ្ឋាគារ និង​ដី​ជួល​ជាដើម ក៏​សង្កេតឃើញ​ថា មាន​ម្ចាស់​ទីតាំង​ភាគច្រើន នៅ​ទីប្រជុំជន​ក្រុង​ព្រះសីហនុ ចាប់តាំងពី​អំឡុង​ពេល​រាជរដ្ឋាភិបាល​បាន​ចេញ​សារាចរ​បិទ​ល្បែង​អន​ឡាញ កាលពី​ខែសីហា ឆ្នាំ២០១៩មក អ្នកវិនិយោគទុន​ចិន ក៏បាន​សម្រុក​ចាកចេញ​ពី​ខេត្ត​ព្រះសីហនុ ដោយ​បន្សល់ទុក​វិ​ក័យ​បត្រ​ទឹក​ភ្លើង ហើយ​មាន​ចិន​ខ្លះ ចាកចេញ​ដោយ​មិន​ប្រាប់​ម្ចាស់ផ្ទះ ឬមិន​បង់​ថ្ងៃ​ជួលផ្ទះ ជួល​ដី និង​អគារ​ផ្សេង​ៗជាដើម។

ចំណែក អគារ ឬសំណង់​ធំ​ស្កឹមស្កៃ​ភាគច្រើន ដែល​សាងសង់​នៅក្នុង​ក្រុង​ព្រះសីហនុ ក៏បាន​ផ្អាក​ដំណើរការ​សាងសង់ ស្ទើរ​ទាំងស្រុង​គិត​ចាប់ពី​ចុងខែ​ធ្នូ ឆ្នាំ២០១៩ រហូតមកដល់​ខែកក្កដា ឆ្នាំ២០២០នេះ ទើប​ឃើញ​សំណង់​អគារ​ខ្លះ​បាន​ចាប់ផ្តើម​ដំណើរ​កា​រសាង់​សង់​ឡើងវិញ​ជា​បណ្តើរ​ៗ។

ដោយឡែក ចំពោះ​សកម្មភាព​ពុះ​ច្រៀក​ដី​ឡូ​តិ៍​លក់ និង​ការសាងសង់​ផ្ទះល្វែង​លក់​ជាដើម ក៏​ហាក់​បាន​ផ្អាក​ចលនា ឬមាន​សភាព​នៅ​ទ្រឹង ប៉ុន្តែ​មិនទាន់​មាន​សញ្ញាណ​ណាមួយ ក្នុង​ការ​បញ្ចុះតម្លៃ​លក់​ចេញ​នោះ​ទេ។ ហើយ​ថា ជំនួញ​ពុះ​ដី​ឡូ​តិ៍ និង​សង់ផ្ទះ​ល្វែង​លក់ របស់​ឈ្មួញ ឬក្រុមហ៊ុន​អចលនទ្រព្យ​ភាគច្រើន ក៏​ឃើញ​ផ្អាក​មិន​បន្ត​គម្រោ​ងថ្មី​ៗទៀត​នោះ​ដែរ។ ការ​ចាកចេញ របស់​អ្នកវិនិយោគទុន​ចិន ចេញពី​ខេត្ត​ព្រះសីហនុ​ជាបន្តបន្ទាប់​មកនេះ សម្រាប់​ប្រជាពលរដ្ឋ ឬបុគ្គល ដែល​បាន​ហក់លោត ទៅ​រក​កម្ចី​ពី​ឥណទាន​មីក្រូហិរញ្ញវត្ថុ និង​ធនាគារ ដើម្បី​យក​មក​វិនិយោគ ឬរកស៊ី គឺ​បច្ចុប្បន្ន​នេះ កំពុងតែ​ជួប​ហារ​និ​ភ័យ​ខ្ពស់។

មកទល់​ពេលនេះ​មនុស្ស​ខ្លះ​ទទួលទាន​ចំណីអាហារ​មិន​ឆ្ងាញ់ សម្រាន្ត​មិន​លក់ និង​បក់​មិន​ល្ហើយ​ជាដើម​, រហូត​ឈាន​ដល់​មាន​បុគ្គល​ខ្លះ បាន​ធ្លាក់ខ្លួន​ឈឺ​ស្គមរីង​រ៉ៃ ឬចង់​ធ្វើ​អត្តឃាត​ជាដើម ដោយសារតែ​ភ័យ​ព្រួយ​ខ្លាច​មិន​មាន​ប្រាក់​សង​មីក្រូហិរញ្ញវត្ថុ និង​ធនាគារ ដែល​ដង្ហោយហៅ​ជា​រៀងរាល់​ចុង​ខែ​ម្តង​ៗ ហើយ​បុគ្គល​មួយចំនួន​នោះ ក៏បាន​បង្ខំចិត្ត​លក់ឡាយឡុង​អចលនទ្រព្យ របស់​ខ្លួន ក្នុង​តម្លៃ​ទាប ដើម្បី​យក​ប្រាក់​មក​ដោះបំណុល ដែល​ពួក​គេ លោភលន់ ឬពាក្យ​សាមញ្ញ​និយាយ​ថា ឃើញ ដំរី​ជុះ ចង់​ជុះ​តាម​ដំរី​នោះ។

សាធារណជន ជាពិសេស​ក្រុម​អ្នកឃ្លាំមើល​ផែនការ​អភិវឌ្ឍ​សង្គម ប្រចាំ​ខេត្ត​ព្រះសីហនុ ថ្លែង​ថា វា​អាច​នឹង​ប៉ះពាល់​ធ្ងន់ធ្ងរ ដល់​ប្រជាពលរដ្ឋ ឬបុគ្គល​មួយចំនួន ដែល​សង់ផ្ទះ​, អគារ និង​ទិញ​ដី​ស្តុក សម្រាប់​ទុក​ជួល​ឲ្យ​ចិន ហើយ​បាន​ទៅ​ខ្ចី​លុយ​ពី​ធនាគារ ដើម្បី​វិនិយោគ​របរ របស់​ពួក​គាត់។ អ្នកឃ្លាំមើល​សង្គម អះអាង​ថា មុន​បំណាច់​ឆ្នាំ២០១៩ គឺ​នៅ​គ្រា​វិស័យ​កាស៊ីណូ​អន​ឡាញ បាន​រីក​ដូច​ផ្សិត​ដូច​រដូវ​ខែវស្សា​នា​ខេត្ត​ព្រះសីហនុ គេ​សង្កេតឃើញ អ្នកវិនិយោគទុន​ចិន បាន​ហូរ​ចូល​មក​ខេត្ត​ជាប់​សមុទ្រ​មួយ​នេះ​យ៉ាង​គំហុក។ ហើយ​ថា ចរន្ត​នៃ​លំហូរ​សាច់ប្រាក់ ឬលុយ ចេញពី​តំបន់​មួយ​ទៅ​តំបន់​មួយទៀត តាមរយៈ​អ្នកមាន​ផ្ទះ សណ្ឋាគារ និង​ដី​ជួល ឬលក់​ឲ្យ​ចិន បាន​ជម្រុ​ញឲ្យ​មាន​ចលនា​ក្រុមហ៊ុន​អចលនទ្រព្យ ឬឈ្មួញ​ពុះ​ច្រៀក​ដី​ឡូ​តិ៍ លក់​, សង់ផ្ទះ​ល្វែង និង​សង់​អគារ ធំ​ស្កឹមស្កៃ សម្រាប់​ជួល​ឲ្យ​ចិន​នៅពេល​នោះ គឺ​បាន​ចំណេញ​ប្រាក់​ច្រើន​សន្ធឹក​សន្ធាប់។

យ៉ាងណាក៏ដោយ​ចុះ បច្ចុប្បន្ន​នេះ ចំពោះ​ក្រុម​មនុស្ស ដែល​ឃើញ​ដំរី​ជុះ ចង់​ជុះ​តាម​ដំរី នោះ ក៏បាន​ដាច​រហែក​គូថ ជា​បណ្តើរ​ៗហើយ​ដែរ។ ហើយ​ថា ពេលនេះ អ្នក​ទាំងនោះ នៅ​តឬបន្ត​ទន្ទឹងរង់ចាំ​អ្នកវិនិយោគទុន​ចិន ចូល​មក​ខេត្ត​ព្រះសីហនុ​ជា​ថ្មូ​ទៀត ក្រែងលោ ពួក​គេ​អាច​មាន​ឱសថ​ព្យាបាល​គូថ របស់​ពួក​គេ ដែល​ខំប្រឹង​ជុះ​តាម​ដំរី​នោះ​បាន​ជាសះស្បើយ​ឡើងវិញ​៕

© 2020, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.