សេចក្តីប្រកាសរបស់ក្រសួងយុត្តិធម៌ដែលចុះហត្ថលេខាដោយលោក កើត រិទ្ធិ រដ្ឋមន្រ្តីក្រសួងយុត្តិធម៌ កាលពីថ្ងៃទី២១ ខែកក្កដា ហើយដែលសារព័ត៌មាន The Cambodia Daily ទើបទទួលបានឲ្យដឹងថា សាលាឧទ្ធរណ៍ខេត្តព្រះសីហនុ មានសមត្ថកិច្ចជំនុំជម្រះរឿងក្តីដែលស្ថិតនៅក្នុងសមត្ថកិច្ចដែនដីដែលគ្របដណ្តប់លើខេត្តព្រះសីហនុ ខេត្តកោះកុង ខេត្តកំពត ខេត្តកែប។
សេចក្តីប្រកាសដដែលឲ្យដឹងទៀតថា ចំពោះសំណុំរឿងទាំងឡាយដែលស្ថិតនៅក្រោមសមត្ថកិច្ចដែនដីរបស់សាលាឧទ្ធរណ៍ព្រះសីហនុ ប៉ុន្តែដែលសាលាឧទ្ធរណ៍ភ្នំពេញបានទទួលជាសមត្ថកិច្ចនៅមុនថ្ងៃទី០១ ខែកញ្ញា ឆ្នាំ២០២០ ត្រូវកំណត់ជាសមត្ថកិច្ចរបស់សាលាឧទ្ធរណ៍ភ្នំពេញដើម្បីចាត់ការបន្ត។ មន្រ្តីជាន់ខ្ពស់របស់របស់ក្រសួងយុត្តិធម៌ដែលថ្លែងក្នុងលក្ខខណ្ឌមិនបញ្ចេញឈ្មោះឲ្យដឹងថា ការបង្កើតសាលាឧទ្ធរណ៍ក្នុងខេត្តព្រះសីហនុ នេះគឺស្ថិតនៅក្នុងចំណោមយុទ្ធនាការដោះស្រាយការកកស្ទះសំណុំរឿងនៅតាមតុលាការ។
រដ្ឋមន្ដ្រីក្រសួងយុត្តិធម៌ថ្មី លោក កើត រិទ្ធ ធ្លាប់និយាយក្នុងសន្និសីទកាសែតនៅទីស្តីការក្រសួងយុត្តិធម៌ កាលពីថ្ងៃទី១៨ ខែឧសភា ដោយព្រមានទុកជាមុនថា សម្រាប់ចៅក្រម ព្រះរាជអាជ្ញា ដែលប្រព្រឹត្តកំហុសវិជ្ជាជីវៈ ឬប្រព្រឹត្តអំពើពុករលួយ ក្នុងអំឡុយពេលយុទ្ធនាការដោះស្រាយបញ្ហាកកស្ទះសំណុំ រឿងនៅតាមតុលាការអាចប្រឈមនឹងការបញ្ឈប់ពីការងារភ្លាមៗ ព្រមទាំងប្រឈមមុខនឹងផ្លូវច្បាប់តែម្ដង ហើយលោកក៏បានពិភាក្សាជាមួយអង្គភាពប្រឆាំងអំពើពុករលួយក្នុងករណីនេះដែរ។លោកបន្តថា ក្រសួងយុត្តិធម៌មិនអនុញ្ញាតឲ្យមានករណីត្រីងៀតឆ្លៀតពងនោះទេ។
យុទ្ធនាការដោះស្រាយបញ្ហាកកស្ទះសំណុំរឿងនៅតាមសាលាជម្រះក្តីនេះ ធ្វើឡើងក្រោយពេលក្រសួងពាក់ព័ន្ធរកឃើញថា ភាពចង្អៀតណែនក្នុងពន្ធនាគារ បណ្តាលមកកត្តាមួយផ្នែកនៃការបន្តឃុំខ្លួនអ្នកជាប់ឃុំ ដោយមិនទាន់មានការជំនុំជម្រះ ពិសេសអ្នកជាប់ឃុំពាក់ព័ន្ធបញ្ហាគ្រឿងញៀន។ រដ្ឋមន្ត្រីក្រសួងមហាផ្ទៃ លោកស ខេង ធ្លាប់អះអាងថាអ្នកជាប់ឃុំបច្ចុប្បន្នមានចំនួនជិត៤ម៉ឺននាក់ ដោយ២ភាគ៣ ជាអ្នកជាប់ឃុំពាក់ព័ន្ធបញ្ហាគ្រឿងញៀន ហើយអ្នកជាប់ឃុំភាគច្រើនមិនទាន់កាត់ក្តី ពោលគឺជាការឃុំខ្លួនបណ្តោះអាសន្នប៉ុណ្ណោះ។
រដ្ឋមន្ត្រីក្រសួងយុត្តិធម៌វ័យក្មេងរូបនេះ បានកំណត់ទិសដៅថា ប្រសិនបើមានការចូលរួមប្រកបដោយសុឆន្ទៈពីតួអង្គពាក់ព័ន្ធទាំងអស់ ក្នុងរយៈពេលពី ៦ខែ ទៅ៩ខែ នឹងអាចសម្រេចលទ្ធផលកកស្ទះសំណុំរឿងនេះប្រហែល៥០ ទៅ៧០ភាគរយ។របាយការណ៍របស់ក្រសួងយុត្តិធម៌ឲ្យដឹងថាបច្ចុប្បន្ន សំណុំរឿងដែលកំពុងចាត់ការនៅតាមសាលាដំបូងរាជធានី-ខេត្ត មានចំនួនជិត៤ម៉ឺនសំណុំរឿង (៣៩ ១៥២)និងមានអ្នកជាប់ឃុំចំនួនជាង១ម៉ឺននាក់(១២៦៥១)។ ក្នុងនោះ សំណុំរឿងគ្រឿងញៀនមានចំនួនជាង៦ពាន់សំណុំរឿង (៦ ២៦០) និងមានអ្នកជាប់ឃុំពាក់ព័ន្ធបញ្ហានេះចំនួន ជិត៧ពាន់នាក់(៦ ៩០០)។
គម្រោងយុត្តិធម៌ពិភពលោក (World Justice Project) បានចេញរបាយការណ៍កាលពីឆ្នាំ២០១៩ ដោយវាយតម្លៃថា កម្ពុជាគឺជាប្រទេសដែលមាននីតិរដ្ឋទាប ពោលគឺប្រព័ន្ធយុត្តិធម៌ស្ថិតនៅជិតបាតតារាង ព្រោះក្នុងចំណោម ១១៣ប្រទេស កម្ពុជាស្ថិតនៅលំដាប់ថ្នាក់លេខ ១១២។យ៉ាងនេះក្តី ក្រុមសង្គមស៊ីវិល ក៏តែងជំរុញឱ្យក្រសួងយុត្តិធម៌ធ្វើការងារនេះដោយតម្លាភាព គ្មានអំពើពុករលួយលាយឡំ ដែលបង្កឱ្យមានភាពអយុត្តិធម៌ដល់អ្នកជាប់ឃុំ ពិសេសអ្នកជាប់ឃុំក្រីក្របន្ថែមទៀត។
ក្នុងអាណត្តិអតីតរដ្ឋមន្ត្រីក្រសួងយុត្តិធម៌ចាស់ លោកអង្គ វង្សវឌ្ឍនា ប្រព័ន្ធយុត្តិធម៌ ពិសេសវិស័យតុលាការនៅកម្ពុជារងការរិះគន់គ្រប់ទិសទីថា គ្មានឯករាជ្យ ស្ថិតក្រោមឥទ្ធិពលបក្សកាន់អំណាច ពុករលួយ បក្ខពួកនិយម លម្អៀងទៅរកក្រុមហ៊ុន ឬអ្នកមានប្រាក់ មានអំណាច ច្រើនជាងគោលការណ៍យុត្តិធម៌ពិត។ តែយ៉ាងនេះក្តី គេនៅរង់ចាំមើលរដ្ឋមន្ត្រីថ្មី ព្រោះក្រោយទទួលបានតំណែងភ្លាម រដ្ឋមន្ត្រីក្រសួងយុត្តិធម៌លោក កើត រិទ្ធ បានប្តេជ្ញាថា នឹងសហការជាមួយមន្ត្រីខ្លួន បន្តធ្វើកំណែទម្រង់ប្រព័ន្ធយុត្តិធម៌ ដើម្បីធានាដល់ការពង្រឹងនីតិរដ្ឋនៅកម្ពុជា៕