អាជ្ញាធរក្រុងភ្នំពេញ ដែលមានទាំងក្រុមសន្តិសុខខណ្ឌ៧មករា រាប់សិបនាក់ បានប្រើកម្លាំងបាយដើម្បីបំបែកការតវ៉ារបស់សមាជិកគ្រួសារអតីតមន្ត្រី និងសកម្មជនគណបក្សសង្រ្គោះជាតិដែលភាគច្រើនជាស្ត្រី ដោយមិនឱ្យពួកគេឈរតវ៉ានៅជាប់របងសាលាដំបូងរាជធានីភ្នំពេញឡើយ។
ក្រុមអាជ្ញាធរក្រុងភ្នំពេញជាច្រើននាក់នៅថ្ងៃទី២៤ ខែកក្កដានេះ បានចាប់អូសក្រុមស្ត្រីជាអ្នកតវ៉ាទាំងនោះកាត់ថ្នល់ទាំងបង្ខំ បណ្តាលឱ្យមានស្ត្រីខ្លះរបួសដៃជើង ក្បាល ដងខ្លួន ខណៈពួកគេប្រមាណ៥០នាក់នាំតវ៉ានៅខាងមុខសាលាដំបូងរាជធានីភ្នំពេញ ទាមទារឱ្យដោះលែងស្វាមី ឬឪពុករបស់ពួកគេចំនួន១៧នាក់ ដែលត្រូវបានអាជ្ញាធររបស់លោកហ៊ុន សែន ចាប់ខ្លួន និងចោទប្រកាន់ពាក់ព័ន្ធបទល្មើសផ្សេងៗ។
ការតវ៉ារបស់ក្រុមស្ត្រីដែលជាភរិយា ជាកូនៗ និងជាសាច់ញាតិរបស់អតីតមន្ត្រីបក្សប្រឆាំងទាំងនោះ ធ្វើឡើងខណៈ សាលាដំបូងរាជធានីភ្នំពេញ និងសាលាឧទ្ធរណ៍បើកសវនាការសំណុំរឿងអតីតមន្ត្រីបក្សសង្គ្រោះជាតិពីរនាក់នៅថ្ងៃសុក្រនេះ។ នៅក្នុងវីដេអូដែលត្រូវបានចែកចាយនៅលើបណ្តាញសង្គមហ្វេសប៊ុក បានឱ្យដឹងថា ការតវ៉ានោះ ក្រុមស្ត្រី និងសាច់ញាតិអ្នកជាប់ឃុំទាំងនោះទាមទារឱ្យដោះលែងប្តីឬសាច់ញាតិរបស់ខ្លួនឱ្យមានសេរីភាពវិញ ព្រោះពួកគេមិនបានធ្វើខុសដូចការចោទប្រកាន់ឡើយ។
លើសពីនេះ ការបន្តឃុំខ្លួនសមាជិកគ្រួសារបស់ពួកគាត់ក្នុងស្ថានភាពនេះ ធ្វើឱ្យប៉ះពាល់ធ្ងន់ធ្ងរដល់ជីវភាពគ្រួសាររបស់ពួកគេទាំងមូលតែម្តង។យ៉ាងនេះក្តី ការតវ៉ារបស់សាច់ញាតិអតីតមន្ត្រីបក្សប្រឆាំងនៅមុខសាលាដំបូងមិនបានជោគជ័យឡើយ ដោយសារអាជ្ញាធរក្រុងភ្នំពេញបានបំបែកក្នុងរូបភាពប្រើកម្លាំងបាយ និងរំខានដល់សកម្មភាពរបស់ពួកគេតែម្តង ក្រោមហេតុផលថាដើម្បីរក្សាសន្តិសុខសណ្តាប់ធ្នាប់សាធារណៈ។
ក្រោយការតវ៉ានៅមុខសាលាដំបូងមិនបានជោគជ័យ ក្រុមស្ត្រីដែលជាសាច់ញាតិរបស់អតីតមន្ត្រីបក្សប្រឆាំង អមដោយកូនតូចៗមួយចំនួនផង បាននាំគ្នាធ្វើដំណើរដោយថ្មើរជើងយកញ្ញត្តិទៅដាក់នៅស្ថានទូតអង់គ្លេសប្រចាំកម្ពុជាដើម្បីស្វែងរកកិច្ចអន្តរាគមន៍ដោះលែងសាច់ញាតិរបស់ខ្លួនឱ្យមានសេរីភាពឡើងវិញ។មកទល់ពេលនេះ សំណុំរឿងធំៗពាក់ព័ន្ធមន្ត្រីគណបក្សសង្រ្គោះជាតិជិត២០ករណី ដោយរួមទាំងសំណុំរឿងរបស់ប្រធានបក្សមួយនេះ គឺលោក កឹម សុខា កំពុងស្ថិតនៅក្នុងដៃតុលាការនៅឡើយ។
អ្នកទាំងនោះត្រូវបានតុលាការចោទប្រកាន់ពាក់ព័ន្ធបទល្មើសផ្សេងៗ ដូចជាត្រូវរ៉ូវជាមួយរដ្ឋបរទេស ការរួមគំនិតក្បត់ ការចោទប្រកាន់ពីបទញុះញង់ឱ្យប្រព្រឹត្តបទល្មើស និងការញុះញង់កុំឱ្យយោធាស្តាប់បង្គាប់ជាដើម។អ្នកវិភាគនយោបាយនៅក្រៅប្រទេសលោក គឹម សុខ លើកឡើងនៅថ្ងៃសុក្រនេះថា «គ្មានយុត្តិធម៌ គឺអត់ប្រជាធិបតេយ្យ និងជាសន្តិភាពក្នុងភ្លើង»។លោកបន្តថា វីរបុរសជាតិ ដែលបានលះបង់ជីវិត គឺជាគំរូដ៏អស្ចារ្យ បំផុត។
យ៉ាងណាលោកថា ដើម្បីសង្គ្រោះជីវិតប្រជាធិបតេយ្យកម្ពុជា យើងត្រូវការវីរបុរសភ្នែករស់ បន្តដឹកនាំសកម្មភាពទាមទារយុត្តិធម៌នៅសង្វៀនកម្ពុជា។វីរបុរសភ្នែករស់ គឺបុគ្គលដែលហ៊ានចូលរួម ឬដឹកនាំសមរភូមិតស៊ូមតិសកម្ម ដោយមិនខ្លាចធ្វើពលិកម្មគ្រប់យ៉ាង ដើម្បីបុព្វហេតុជាតិ តាមបំណងប្រាថ្នារបស់ប្រជាពលរដ្ឋទូទៅ ដូចវីរបុរសពលីជីវិតដែរ។លោកជឿជាក់ថា ប្រទេសកម្ពុជានឹងអាចមានវីរបុរសភ្នែករស់ ក្នុងពេលមិនយូរឆ្នាំខាងមុខ។ បើមិនដូច្នេះទេ កម្ពុជានឹងលិចលង់ ស្រង់លែងរួចតែម្តង៕