លោក ហ៊ុន សែន បញ្ជា​ឲ្យ​ចុះ​ស្រាវជ្រាវ​ករណី​ទន្ទ្រាន​យក​ដី​រដ្ឋ ខុសច្បាប់ នៅ​ខេត្តមណ្ឌលគិរី ឲ្យបាន​ម៉ត់ចត់

​រដ្ឋមន្ត្រី​ក្រសួងមហាផ្ទៃ លោក ស ខេង កាលពី​ថ្ងៃទី២២ ខែកក្កដា ឆ្នាំ២០២០ បាន​ចេញ​សេចក្ដីសម្រេច​ស្ដីពី ការបង្កើត​ក្រុមការងារ​អន្តរក្រសួង ដើម្បី​ចុះ​សិក្សា​ស្រាវជ្រាវ លើ​ករណី​កាប់​រានទន្ទ្រាន និង​កាន់កាប់​ដី​ព្រៃ​របស់​រដ្ឋ ដោយ​ខុសច្បាប់ ក្នុង​តំបន់ការពារធម្មជាតិ ស្ថិត​ក្នុង​ខេត្តមណ្ឌលគិរី។

សេចក្ដីសម្រេច​នេះ ធ្វើឡើង​តាម​ចំណា របស់​លោក ហ៊ុន សែន ចុះ​ថ្ងៃទី៨ ខែក​ក្ដ​ដា ឆ្នាំ២០២០ ដែល​បញ្ជា​ឲ្យ​ចុះ​ស្រាវ​ជ្រា​វរ​កឲ្ត​ឃើញ​អ្នក​ជាប់ពាក់ព័ន្ធ​ការទន្ទ្រាន​ដី​ព្រៃ របស់​រដ្ឋ​ធ្វើ​កម្មសិទ្ធិ​ខុសច្បាប់​មក​ផ្តន្ទា​ទោស។

ទាក់ទិន​ករណីនេះ​តាម​ប្រភព​ព័ត៌មាន​ពី​មន្ត្រី​ក្រសួងមហាផ្ទៃ ស្នើ​មិន​បញ្ចេញ​ឈ្មោះ បាន​ឲ្យដឹង​ថា យ៉ាងហោចណាស់​មាន​មន្ត្រី​ជាប់ពាក់ព័ន្ធ​សកម្មភាព​ទន្ទ្រាន​កាន់កាប់​ដី​ព្រៃ​រដ្ឋ​ខុសច្បាប់​នី​ខេត្តមណ្ឌលគិរី​នេះ ជាង២០នាក់ មាន​ជាប់ពាក់ព័ន្ធ។ ក្នុង​នោះ​រួម​ទាំង​អភិបាលខេត្ត​មណ្ឌលគីរី , អភិបាលស្រុក​កោះញែក​, ស្រុក​អូររាំង​, សមាជិកព្រឹទ្ធសភា និង​មន្ត្រី​ថ្នាក់ឧត្ដម​សេនីយ៍​ជាដើម ត្រូវ​បាន​លោក ប៊ិន ឈិន ឧបនាយក​រដ្ឋមន្ត្រី និង​ជារ​ដ្ឋ​មន្ត្រី ទីស្ដីការ​គណៈរដ្ឋ​មន្ត្រី បាន​ស្នើសុំ​គោលការណ៍​ពី លោក ហ៊ុន សែន ដើម្បី​កែសម្រួល​ភារកិច្ច និង ដកហូត​មុខតំណែង ព្រោះ​មន្ត្រី​ទាំងនោះ មាន​ជាប់ពាក់ព័ន្ធ​នឹង​ការ​គប់គិត​គ្នា​ទន្ទ្រាន​យក​ដី​រដ្ឋ​ធ្វើជា​កម្មសិទ្ធិ​ឯកជន​ខុសច្បាប់។ជាក់ស្តែង លោក សេង សុវណ្ណារ៉ា អនុរដ្ឋ​លេខាធិការ​ក្រសួង​យុត្តិធម៌ ត្រូវ​បាន​ដកហូត​មុខតំណែង និង​ចាប់ខ្លួន​បញ្ជូន​ទៅ​ឃុំខ្លួន ដាក់​ពន្ធនាគារ​ជា​បណ្ដោះអាសន្ន ពាក់ព័ន្ធ​នឹង​ការទន្ទ្រាន​យក​ដី​រដ្ឋ នៅ​ខេត្តមណ្ឌលគិរី ជាង១ពាន់​ហិ​កតា។

ក្រុម​អ្នកឃ្លាំមើល​ផែនការ​អភិវឌ្ឍន៍​សង្គម​, សាធារណជន ក៏ដូចជា​ពលរដ្ឋ និង​មន្ត្រី​រាជការ​មាន​តួនាទី​ទាប នាំគ្នា​គាំទ្រ​ទៅលើ​ចំណាត់ការ​នេះ។ ប៉ុន្តែ​ពួក​គេ​រង់ចាំ​មើល ថា​តើ​ការអនុវត្ត​ច្បាប់ របស់​ក្រុមការងារ គណៈកម្មការ​អន្តរក្រសួង ដែល​ក្រសួងមហាផ្ទៃ បាន​បង្កើត​ឡើង​នេះ នឹង​មានប្រសិទ្ធភាព​ការងារ​ត្រឹម​កំរិត​ណា។

ចំណែក​ពលរដ្ឋ​រស់នៅ​ខេត្តមណ្ឌលគិរី បាន​ផ្តល់​ព័ត៌មាន​មក​ថា ដី​ព្រៃ​ស្រល់ និង​ដី​អូរ​ធម្មជាតិ រាប់​រយ​ពាន់​ហិ​កតា មាន​ទីតាំងនៅ​ទល់​ពីមុខ​បន្ទាយ​យោធា​ស្រុក​អូររាំង និង​ដី​ព្រៃ​នៅ​តំបន់​ផ្សេង​ៗទៀត ត្រូវ​ក្រុម​បុគ្គល​អ្នកមាន​អំណាច និង​មាន​លុយ​មួយចំនួន​រំលោភ​យក​ធ្វើជា​កម្មសិទ្ធិ​ខុសច្បាប់​យ៉ាង​អនាធិបតេយ្យ។

ប្រភព​ដដែល​បន្ត​ទៀត​ថា ដី​អូរ​រាប់​រយ​ហិ​កតា មាន​ទីតាំងនៅ​ពីក្រោយ​ចំការ​ស្រល់ ទល់​ពីមុខ​បន្ទាយ​យោធា​ស្រុក​អូររាំង ត្រូវ​បាន​អ្នកមាន​អំណាច​ម្នាក់ រំលោភ​យក​ធ្វើជា​កម្មសិទ្ធិ​ផ្ទាល់ខ្លួន ដោយ​ខុសច្បាប់​ហើយ​បុគ្គល​មានអំណាច​រូប​នោះ បាន​នាំ​យក​គ្រឿងចក្រ​មក​ឈូស​ឆាយ​លុប​អូរ​ធម្មជាតិ ដើម្បី​រាន​ដី​ធ្វើ​កម្មសិទ្ធិ ខណៈ​មន្ត្រី​ជំនាញ​ក៏ដូចជា​អាជ្ញាធរ​រដ្ឋបាល​ខេត្តមណ្ឌលគិរី ហាក់​មើល​រំលង ឬមិន​រវល់​អើពើ​រឿង​នេះ។

ពលរដ្ឋ​ជនជាតិ​ដើម​ភាគ​តិត​ព្នង រស់នៅ​ភូមិ​ពី​រាំង ឃុំ​សែនមនោរម្យ ស្រុក​អូររាំង ស្នើរ​សុំ​មិន​បញ្ចេញ​ឈ្មោះ បាន​ឲ្យដឹង​ថា ដី​ចំណី​អូរ​រាប់​រយ​ហិ​កតា ត្រូវ​បុគ្គល​ឯកជន​ប្រើ​គ្រឿងចក្រ​ឈូស​កាយ​លុប​អូរ ដើម្បី​រាន​ដី​ធ្វើ​កម្មសិទ្ធិ​ផ្ទាល់ខ្លួន។ ជាង​នេះ​ទៀត ដីចំការ​ស្រល់ របស់​រដ្ឋ​រាប់​រយ​ហិ​កតា​ទៀត ក៏​ត្រូវ​គេ​ប្រើ​គ្រឿងចក្រ​ឈូស​ចំ​ផ្លាញ​រាន​ដី ដើម្បី​ធ្វើ​កម្មសិទ្ធិ​យ៉ាង​អនាធិបតេយ្យ​ផង​ដែរ។

ប្រភព​បញ្ជាក់​ទៀត​ថា បុគ្គល​ដែល​អះអាង​ថា ជា​ម្ចាស់​ទីតាំង​ដី​ខាងលើ​នេះ ត្រូវ​ប្រភព​បង្ហើប​ឲ្យដឹង​ថា ជា​កូ​នប្រ​សារ របស់​ថ្នាក់ដឹកនាំ​ម្នាក់ នៅ​ក្រសួង​ដែនដី នគរ​រូ​បនីយ៍​កម្ម និង​សំណង់ ឈ្មោះ ម៉ឹង មករា។ យ៉ាងណាក៏ដោយ​ចុះ The Cambodia Daily នៅ​មិនទាន់​អាច​មាន​ប្រភព​ទាក់ទង លោក អភិបាលខេត្ត​មណ្ឌលគិរី និង​លោក ម៉ឹង មករា ដើម្បី​បំភ្លឺ​ជុំវិញ​ការចោទប្រកាន់​លើ​ករណី​ជាប់ពាក់ព័ន្ធ​ការទន្ទ្រាន​កាន់កាប់​ដី​ព្រៃ​រដ្ឋ​ខុសច្បាប់​នៅ​ខេត្តមណ្ឌលគីរី​នេះ​បា​ទេ​នៅ​រសៀល​ថ្ងៃទី២៣ ខែកក្កដា​នេះ​៕

© 2020, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.