សារព័ត៌មានបរទេសបានលើកឡើងថា ប្រជានេសាទរស់នៅតំបន់បឹងទន្លេសាបមួយចំនួនកំពុងប្រឈមបញ្ហាកង្វះស្បៀងអាហារ សម្រាប់ផ្គត់ផ្គង់ជីវភាពប្រចាំថ្ងៃ ខណៈទិន្នផលត្រីកាន់តែខ្សត់ព្រោះតែចរន្តទឹកឡើងនៅឆ្នាំនេះយឺតយ៉ាវ។សារព័ត៌មាន រ៉យទ័រ(Reuters) បានចេញផ្សាយអត្ថបទមួយកាលពីថ្ងៃអង្គារ៍នេះដោយលើកឡើងថាចរន្តទឹកហូរចូលពាសពេញបឹងទន្លេសាប ដែលជាបឹងធំជាងគេនៅអាស៊ីអាគ្នេយ៍ ត្រូវបានពន្យាពេលអស់រយៈពេល ២ឆ្នាំជាប់គ្នា ដែលធ្វើឱ្យប៉ះពាល់យ៉ាងខ្លាំងដល់ការនេសាទ និងគំរាមកំហែងដល់ការផ្គត់ផ្គង់ស្បៀងអាហាររបស់ប្រជាជនច្រើនជាងមួយលាននាក់។
ប្រភពដដែលបន្តទៀត ដោយលើកយកការលើកឡើងរបស់មន្ត្រីជំនាញថា ចរន្តទឹកហូរចូលបឹងទន្លេសាបតាមរដូវកាល នឹងត្រូវពន្យាររហូតដល់ខែក្រោយ ដោយសារស្ថានភាពគ្រោះរាំងស្ងួត និងទំនប់វារីអគ្គិសនីរាប់សិបនៅក្នុងប្រទេសចិន និងឡាវ ដែលជាមូលហេតុបង្អាក់ចរន្តលំហូរទឹកធម្មជាតិមកផ្ទៃទន្លេខាងក្រោម។បញ្ហានេះ ធ្វើឱ្យប្រជានេសាទរស់នៅតំបន់បឹងទន្លេសាប ក្នុងឃុំកំពង់ឃ្លាំង ស្រុកសូទ្រនិគម ខេត្តសៀមរាប ជាច្រើនគ្រួសារកំពុងប្រឈមក្នុងជីវភាពប្រចាំថ្ងៃ ដោយពួកគេត្រូវតស៊ូដើម្បីជម្នះនូវឧបសគ្គមួយនេះ ត្បិតពលរដ្ឋរស់នៅក្នុងឃុំបណ្តែតទឹកនេះភាគច្រើនរស់ពឹងអាស្រ័យលើផលនេសាទ ដោយសារពួកគេគ្មានដីសម្រាប់ធ្វើកសិកម្មឡើយ។
ប្រភពដដែលបន្តថា ប្រជានេសាទខ្លះបានចេញទៅនេសាទជាច្រើនថ្ងៃ ប៉ុន្តែពួកគេនៅតែរកត្រីសម្រាប់យកមកលក់ដូរ ឬយកមកហូបចុកស្ទើរតែមិនបាន។ ពួកគេថា បច្ចុប្បន្នក្នុងមួយថ្ងៃអាចរកត្រីមកលក់សម្រាប់ទ្រទ្រង់ជីវភាពគ្រួសារបានប្រមាណ១ម៉ឺន ២ពាន់រៀល ខណៈកាលពីឆ្នាំមុនៗ ពួកគេអាចរកចំណូលបានប្រមាណ១០ម៉ឺនរៀលក្នុងមួយថ្ងៃ ពីការនេសាទរបស់ខ្លួន។ពលរដ្ឋស្នើទៅរដ្ឋាភិបាលកម្ពុជាឱ្យចរចាជាមួយរដ្ឋាភិបាលចិនអំពីការ បើកទ្វារទឹកនៃទំនប់វារីអគ្គិសនីផ្នែកខាងលើទន្លេមេគង្គ ដើម្បីឱ្យចរន្តទឹកអាចហូរធ្លាក់មកផ្នែកខាងក្រោមជាប្រក្រតីបាន៕