ស្ថាបនិកអង្គការចលនាមាតាធម្មជាតិ បានជំរុញឱ្យរដ្ឋាភិបាលបង្ហាញទិន្នន័យពិតប្រាកដជុំវិញទុនបម្រុងទុកដែលជាមាសរបស់កម្ពុជា ដើម្បីបង្ហាញតម្លាភាព និងធានាថាអ្វីដែលរដ្ឋាភិបាលធ្លាប់លើកឡើងកន្លងមកមិនបោកប្រាស់ពលរដ្ឋ។
ស្ថាបនិកអង្គការចលនាមាតាធម្មជាតិ លោក អាឡិច ហ្គន់សាឡេស ដេវិតសុន បានលើកឡើងថា លោកមិនដែលឃើញអ្នកកាសែត អ្នកនយោបាយ ឬអង្គការសង្គមស៊ីវិល និយាយអំពីបញ្ហាមាសដែលជាទុនបម្រុងទុករបស់កម្ពុជាសោះឡើយ។ ដូច្នេះលោកនឹងសួរដោយខ្លួនឯងចុះ បើទោះបីលោកគ្រាន់តែជាសកម្មជនដ៏សាមញ្ញម្នាក់ក៏ដោយ។លោកលើកឡើងថា លោកនាយករដ្ឋមន្ត្រី ហ៊ុន សែន មានប្រសាសន៍កាលពីខែតុលា ឆ្នាំ២០១៩ថា បច្ចុប្បន្នកម្ពុជា មានមាសចំនួន៣០ តោន។ ក្នុងនោះ១២តោន តម្កល់នៅប្រទេសស្វីស ហើយ១៥តោនតម្កល់នៅប្រទេសអង់គ្លេស និង ៣តោនទៀតតម្កល់នៅធនាគារជាតិនៃកម្ពុជា។
លោក អាឡិច ជឿថាពលរដ្ឋកម្ពុជាគ្រប់គ្នាពិតជាសប្បាយចិត្តពេលឮព័ត៌មានមួយនេះ ជាពិសេសនៅពេលដែលជំងឺកូវីដដ៏កាចសាហាវ កំពុងតែធ្វើឲ្យប៉ះពាល់មកដល់សេដ្ឋកិច្ចកម្ពុជា និងទូទាំងពិភពលោកយ៉ាងធ្ងន់ធ្ងរ ហើយដែលរដ្ឋអាចនឹងខ្វះខាតលុយក្នុងពេលដ៏ខ្លីខាងមុខ។ក៏ប៉ុន្តែ ការអះអាងរបស់លោកហ៊ុន សែន នេះ នៅមានបញ្ហាឬចម្ងល់ច្រើន ត្បិតលោកអាឡិចថាកម្ពុជាមិនបានរាយការណ៍ទៅស្ថាប័នអន្តរជាតិ រួមទាំង មូលនិធិរូបិយវត្ថុអន្តរជាតិ ឬហៅថា IMF ថា ខ្លួនមានមាស៣០តោននោះទេ ប៉ុន្ដែផ្ទុយទៅវិញ របាយការណ៍បានបញ្ជាក់ថា កម្ពុជាមានមានត្រឹមតែជាង ១២តោនប៉ុណ្ណោះ (១២.៤) ពោលគឺវាខុសគ្នារហូតទៅដល់ជាង ១៧តោន (១៧.៥តោន) ដែលមានតម្លៃប្រហាក់ប្រហែលមួយពាន់លានដុល្លារ។
បញ្ហានេះ សកម្មជនបរិស្ថានជាជនជាតិអេស្ប៉ាញរូបនេះ ចោទជាសំណួរថា នៅពេលលោកហ៊ុន សែន និយាយថា កម្ពុជា មានមាស៣០តោន តើលោកនាយករដ្ឋមន្ត្រីមានឯកសារបញ្ជាក់ដែរឬទេ? បើមានសូមរដ្ឋាភិបាលបញ្ជាក់ផង ដើម្បីអោយសារធាណៈជនជឿជាក់ថា កម្ពុជាពិតជាមានមាស៣០តោនប្រាកដមែន ហើយស្ថាប័នអន្តរជាតិទាំងអស់នោះផ្ដល់តួលេខខុស។ពាក់ព័ន្ធបញ្ហានេះ នៅថ្ងៃទី២៣ ខែកក្កដា ធនាគារជាតិនៃកម្ពុជាបានចេញលិខិតបញ្ជាក់ពីទុនបម្រុងជាមាសរបស់កម្ពុជា ដែលតម្កល់នៅធនាគារជាតិ និងអន្តរជាតិមានជាង៣៦តោន។
ធនាគារជាតិនៃកម្ពុជាអះអាងថា គិតត្រឹមចុងខែមិថុនា ឆ្នាំ២០២០នេះ កម្ពុជាមានទុនបម្រុងអន្តរជាតិជាមាសសរុបចំនួន៣៦តោនកន្លះ ដែលមានតម្លៃជិត២០ប៊ីលានដុល្លារ ហើយត្រូវគ្រប់គ្រងដោយប្រុងប្រយ័ត្ន។មាសទាំងជាង៣៦តោន គឺបានតម្កល់ក្នុងប្រទេសស្វីសមានចំនួនជាង១២តោន។
ដោយឡែក មាសចំនួនជាង១៤តោនកំពុងវិនិយោគនៅធនាគារកណ្តាលប្រទេសអង់គ្លេស និងចំនួន១០តោនត្រូវបានរក្សាក្នុងធនាគារជាតិនៃកម្ពុជា។ជាមួយគ្នានេះលោកនាយករដ្ឋមន្ត្រី ហ៊ុន សែន បានលើកឡើងនៅថ្ងៃព្រហស្បតិ៍នេះថា ដោយលើកឡើងពីបញ្ហាមាសនេះផងដែរ ដោយថារដ្ឋាភិបាលលោកមិនមែនកញ្ជើធ្លុះនោះឡើយ។ទោះបីយ៉ាងណាក៏ដោយ ទាំងធនាគារជាតិនៃកម្ពុជា និងទាំងលោកហ៊ុន សែន ផ្ទាល់ មិនបានបង្ហាញរបាយការណ៍ឬឯកសារជាក់លាក់ណាមួយ ជុំវិញតួលេខមាសនេះនៅឡើយទេ៕