ក្រសួងសុខាភិបាល អះអាងថា ទាហានឬកងទ័ពមួកខៀវកម្ពុជាដែលបានទៅបំពេញបេសកកម្មក្រោមឆត្រអង្គការសហប្រជាជាតិនៅប្រទេសម៉ាលីចំនួន៤នាក់ បានរកឃើញថា ឆ្លងជំងឺកូវីដ១៩។ក្នុងសេចក្តីប្រកាសព័ត៌មានរបស់ខ្លួននៅថ្ងៃទី២៤ ខែកក្កដានេះ ក្រសួងសុខាភិបាលបញ្ជាក់ថាកងទ័ពមួកខៀវកម្ពុជាទាំង៤នាក់ ដែលរកឃើញផ្ទុកជំងឺកូវីដ១៩ នោះ ក្រោយពេលពួកគេទើបនឹងត្រឡប់មកពីប្រទេសម៉ាលីវិញ។
ក្រសួងបន្តថាអ្នកឆ្លងជំងឺទាំង៤នាក់នេះ ស្ថិតក្នុងចំណោមកងទ័ពមួកខៀវកម្ពុជាចំនួន៨០នាក់ ដែលបានវិលមកកម្ពុជាវិញកាលពីថ្ងៃទី១០ ខែកក្កដា។ក្រសួងបានបន្ថែមថា ការរកឃើញអ្នកឆ្លងជំងឺកូវីដ១៩លើទាហានមួកខៀវ៤នាក់នោះបន្ទាប់ពីទទួលបានលទ្ធផលវិជ្ជមាន ក្នុងការធ្វើតេស្តជាលើកទី២កាលពីថ្ងៃទី២៣កក្កដា ខណៈការធ្វើតេស្តលើកទី១ កាលពីថ្ងៃទី១០ខែកក្កដា លទ្ធផលបង្ហាញថាអវិជ្ជមានទាំងអស់។
កងទ័ពមួកខៀវទាំង៤នាក់ដែលមានជំងឺកូវីដ១៩ ត្រូវបានបែងចែកក្នុងការសម្រាកព្យាបាល ដោយ៣នាក់ជាបុរសត្រូវស្នាក់នៅ មណ្ឌលសុខភាពចាក់អង្រែ និងម្នាក់ទៀតជាស្រ្តីកំពុងសម្រាកនៅមន្ទីរពេទ្យរុស្ស៊ី។គិតត្រឹមព្រឹកថ្ងៃទី២៤ ខែកក្កដា កម្ពុជារកឃើញករណីកូវីដ១៩សរុបចំនួន២០២នាក់ហើយ ដោយក្នុងនោះព្យាបាលជាសះស្បើយសរុបចំនួន១៤២នាក់។
ចំណែក៦០នាក់ទៀតកំពុងសម្រាកព្យាបាល ដោយ៥៨នាក់សម្រាកព្យាបាលជំងឺនៅមន្ទីរពេទ្យរដ្ឋ និង២នាក់ទៀតដែលជាជនជាតិអាមេរិកាំងកំពុងសម្រាកព្យាបាលជំងឺនៅក្នុងស្ថានទូតអាមេរិកប្រចាំក្រុងភ្នំពេញ៕