ពលរដ្ឋ ឬអាណាព្យាបាលមួយចំនួន រស់នៅខេត្តព្រះសីហនុ កំពុងព្រួយបារម្ភអំពីមេរោគ ឬជំងឺគ្រុនឈីក ដែលកំពុងរាតត្បាត នៅតាមឃុំ-សង្កាត់មួយចំនួន ក្នុងមូលដ្ឋានខេត្តជាប់ឆ្នេរសមុទ្រមួយនេះ។ ពលរដ្ឋរស់នៅក្រុងកោះរ៉ុង និងស្រុកព្រៃនប់ បានសំណូមពរដល់ លោកស្រី លឹម សាមាន ប្រធានមន្ទីរសុខាភិបាលខេត្តព្រះសីហនុ ឲ្យបញ្ចូនក្រុមគ្រូពេទ្យជំនាញ ចុះពិនិត្យផ្ទាល់ដល់ទីតាំងនៃការផ្ទុះជំងឺចម្លែក ដែលពួកគាត់សង្ស័យថា ជាជំងឺគ្រុនឈីកនេះ ឲ្យបានឆាប់ និងពន្យល់អប់រំពួកគាត់ ឲ្យបានយល់ដឹងអំពីវិធីទប់ស្កាត់ជំងឺប្រភេទនេះ។
ពាក់ព័ន្ធបញ្ហានេះ មន្ត្រីជំនាញផ្នែកជំងឺឆ្លង នៃមន្ទីរសុខាភិបាលខេត្តព្រះសីហនុ បានចុះពិនិត្យតាមដានការ វិវត្តន៍អ្នកជំងឺ ដែលមករកសេវាព្យាបាល នៅមន្ទីរពេទ្យបង្អែកខេត្តព្រះសីហនុ ដើម្បីឲ្យបាកដថា ពលរដ្ឋទាំងនោះកើតជំងឺគ្រុនឈីក ឬជំងឺអ្វីផ្សេងឲ្យពិតប្រាកដ។ គេហទំព័រសាព័ត៌មាន “កម្ពុជាថ្ងៃនេះ” ឬ camday.news នៅថ្ងៃចន្ទ ទី២៧ ខែកក្កដា នេះ បានស្រង់សំដី មន្ត្រីជំនាញមន្ទីរសុខាភិបាល ខេត្តព្រះសីហនុ មកចុះផ្សាយថា ករណីជំងឺគ្រុនឈាម កំពុងរាតត្បាតនៅតាមមូលដ្ឋានស្រុក និងក្រុងមួយចំនួន នាខេត្តព្រះសីហនុ មិនមានស្ថានភាពធ្ងន់ធ្ងរ ដូចការព្រួយបារម្ភ របស់ពលរដ្ឋនោះទេ។
យ៉ាងនេះក្តី មន្ត្រីមន្ទីរសុខាភិបាលខេត្តព្រះសីហនុ បានអំពាវនាវដល់ ពលរដ្ឋ ដែលមានកូនចៅសាច់ញាតិ កើតរោគសញ្ញាដូចជា៖ ក្តៅខ្លួនខ្លាំង, ចេញកន្ទួលរមាស់ និងឈឺសន្លាក់ដៃជើងជាដើម ហើយសង្ស័យថា ជាជំងឺគ្រុនឈីក សូមនាំអ្នកជំងឺ មកពិគ្រោះជាមួយគ្រូពេទ្យតាមមណ្ឌលសុខភាព ឬមន្ទីរពេទ្យបង្អែកខេត្តព្រះសីហនុ ជាបន្ទាន់។
មន្ត្រីមន្ទីរសុខាភិបាល បញ្ជាក់ថា ចំពោះការវិនិច្ឆ័យរកជំងឺគ្រុនឈីក គឺទាល់តែគ្រូពេទ្យបូមឈាម ឬយកសំណាកអ្នកជំងឺ ទៅពិសោធន៍នៅវិទ្យាស្ថានប៉ាស្ទ័រ ឯរាជធានីភ្នំពេញ ទើបដឹងរោគសញ្ញាជំងឺប្រភេទគ្រុនឈីកនេះ។មន្ត្រីសុខាភិបាលរូបនេះបន្តថា ជំងឺគ្រុនឈីកនេះមិនបណ្តាលឲ្យអ្នកជំងឺរងគ្រោះដល់អាយុជីវិតភ្លាមៗ ដូចជំងឺគ្រុនឈាម ឬជំងឺឆ្លងផ្សេងទៀតទេ ដោយគ្រាន់តែប៉ះពាល់មកលើសុខភាពអ្នកជំងឺ និងខាតបង់ពេលវេលា ដែលចាំបាច់ទាមទារឲ្យពលរដ្ឋទាំងក្មេងចាស់ ត្រូវចូលរួមរក្សា អនាម័យ និងលុបបំបាត់ជម្រកមូសខ្លា នៅក្បែរផ្ទះរៀងៗខ្លួនឲ្យអស់ ព្រោះមូសខ្លា ជាប្រភពនាំឲ្យពលរដ្ឋកើតជំងឺគ្រុនឈីកនេះ។
សាព័តមានក្នុងស្រុកបានដកស្រង់សម្តីលោកវេជ្ជបណ្ឌិត សេង ណុង ប្រធានមន្ទីរពេទ្យបង្អែកខេត្តព្រះសីហនុ ចុះផ្សាយថា មន្ទីរពេទ្យបង្អែកខេត្តនេះ បានទទួលអ្នកជំងឺចំនួន១៤នាក់ រស់នៅក្រុងកោះរ៉ុង ដោយពួកគាត់មានអការៈក្តៅខ្លួន និងចេញកន្ទួល ក្រហមជាដើម បានមករកសេវាព្យាបាល នៅក្នុងមន្ទីរពេទ្យបង្អែកខេត្តព្រះសីហនុ។
លោកវេជ្ជបណ្ឌិត សេង ណុង បន្តថា ពេលនេះអ្នកជំងឺទាំង១៤នាក់នោះ ត្រូវបានមន្ត្រីជំនាញមន្ទីរសុខាភិបាល បូមឈាមបញ្ចូនទៅពិសោធន៍នៅវិទ្យាស្ថានប៉ាស្ទ័ររួចហើយ ដើម្បីឲ្យប្រាកដថា អ្នកជំងឺទាំងនោះកើតជំងឺគ្រុនឈីក ឬជំងឺអ្វីផ្សេង ឲ្យពិតប្រាកដ។យ៉ាងណាក៏ដោយចុះ លោកវេជ្ជបណ្ឌិត សេង ណុង បញ្ជាក់ថា អ្នកជំងឺទាំង១៤នាក់ ដែលកំពុងសម្រាកព្យាបាលនៅក្នុងមន្ទីរពេទ្យបង្អែកខេត្តព្រះសីហនុ ខាងលើនេះ មិនមានសភាពធ្ងន់ធ្ងរទេ៕